ព័ត៌មានផ្សេងៗទៀត
ឯកឧត្តមរដ្ឋមន្ត្រីរំលឹកពីសារសំខាន់សួនសត្វភ្នំតាម៉ៅ
ចេញផ្សាយ ២២ មករា ២០១៨ 4490
ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានពិពណ៌នាអំពីសារសំខាន់ នៃសួនសត្វភ្នំម៉ៅ ជាមួយនឹងការអំពាវនាវ ឲ្យចូលរួមថែរក្សាការពារពីសំណាក់អាជ្ញាធរប្រជាពលរដ្ឋផងដែរ។ ជាផ្នែកមួយ នៃការរំលឹកអនុស្សាវរីយ៍ពីកុមារភាព ដែលធ្លាប់សិក្សានៅសាលាបឋមសិក្សាសំរោងយោង កាលពីពេលថ្មីៗនេះ ឯកឧត្តមរដ្ឋមន្ត្រី បានជួបជាមួយលោកគ្រូអ្នកគ្រូចំនួន១០៥នាក់ មកពីសាលាចំនួន៦ និងប្រជាជន១៤៥នាក់ នៃភូមិខ្សាច់លប់ឃុំត្រពាំងសាប ស្រុកបាទី។
ទីនោះនៅមិនឆ្ងាយប៉ុន្មានពីសួនសត្វភ្នំម៉ៅទេ។ ឯកឧត្តមរដ្ឋមន្ត្រី បានពិពណ៌នាថា សួនសត្វភ្នំម៉ៅ គឺជាសយនសត្វរដ្ឋ តែមួយគត់នៅទីនេះ ដូចនេះសូមអាជ្ញាធរប្រជាពលរដ្ឋចូលរួមថែរក្សាការពារសត្វព្រៃឈើទាំងឡាយនៅទីនេះឲ្យបានល្អ។ ឯកឧត្តមបន្តថា ដោយសារសួនសត្វ និងរមណីយដ្ឋានធម្មជាតិភ្នំតាម៉ៅនេះ មានមុខរបរប្រមាណ១០០មុខដែលប្រជាជនអាចរកទទួលទានបាន និងទទួលបានចំណូលបន្ថែម សម្រាប់គ្រួសារក្រៅពីការធ្វើស្រែចម្ការ។
លោកជា សំអាង អនុន្រធានរដ្ឋបាលព្រៃឈើ បានឲ្យដឹងថា ភ្នំតាម៉ៅមានផ្ទៃដីចំនួន២.៥០០ហិកតា ដែលមានព្រៃល្បោះព្រៃខ្នែង។ ជាតំបន់ព្រៃធម្មជាតិ ដែលនៅជិតរាជធានីភ្នំពេញបំផុត ហើយជារឿយៗ បានទាក់ទាញភ្ញៀវទេសចរជាតិ អន្តរជាតិ និងអ្នកសិក្សាស្រាវជ្រាវ មកធ្វើទស្សនកិច្ច។ នាឆ្នាំ១៩៩២ ក្រោមការផ្តួចផ្តើម របស់ឯកឧត្តមរដ្ឋមន្ត្រី បានរៀបចំទីនេះជាតំបន់ការពារ ហើយបានបង្កើតជាសួនសត្វ និងមជ្ឈមណ្ឌលសង្គ្រោះសត្វព្រៃភ្នំម៉ៅ ជាផ្លូវការនាឆ្នាំ១៩៩៤។
បច្ចុប្បន្នសួននេះមានសត្វរាប់ពាន់ក្បាលត្រូវបានដោះលែងទៅក្នុងព្រៃធម្មជាតិវិញ។ ឯកឧត្តមបន្តទៀតថា ដោយសារសួនសត្វ និងរមណីយដ្ឋានធម្មជាតិមួយនេះ ប្រជាជនចំនួន១៨០គ្រួសារ បានមកលក់ដូររកចំណូលបន្ថែម។
ឯកឧត្តមរដ្ឋមន្ត្រី បានបន្ថែមពីលើអ្វីដដែលលោកអនុប្រធានរដ្ឋបាលព្រៃឈើបានលើកឡើង ដោយបញ្ជាក់ថាដោយសារតែគុណប្រយោជន៍នេះហើយ ដែលប្រជាជនអាស្រ័យពីសួនសត្វរមណីយដ្ឋាន ត្រូវចូលរួមថែរក្សា និងចាត់ទុកទីនេះ ជាអាយុជិវិតរបស់ខ្លួនដូច្នោះដែរ។ ឯកឧត្តម ក៏បានណែនាំដល់មន្ត្រីរដ្ឋបាលព្រៃឈើឲ្យយកចិត្តទុកដាក់យកពួជឈើក្នុងស្រុកមានតម្លៃមកដាំទីនេះឲ្យបានច្រើន ដើម្បីឲ្យទីនេះក្លាយជាព្រៃធម្មជាតិវិញ។ ជាមួយនេះ គួរបញ្ចូលឈើហូបផ្លែ ដើម្បីក្លាយជាចំណីសត្វបន្ថយចំណាយរបស់រដ្ឋ។ រៀបចំពិធីជប់លៀងសត្វ រៀបចំអាពាហ៍ពិពាហ៍ដំរីឬពិធីផ្សេងៗទាក់ទងនឹងសត្វ ដើម្បីទាក់ទាញទេសចរណ៍៕
