ឯកឧត្តមបណ្ឌិតរដ្ឋលេខាធិការ យ៉ង សាំងកុមារ អញ្ជើញដឹកនាំសិក្ខា​សាលា​ស្តីអំពី «ការត្រៀមសម្របសម្រួលទីផ្សារស្រូវផ្ការំដួល និងការផ្តល់សេវាកម្ម​កសិកម្មរួម (One Stop Service)» ដល់មន្ត្រីកសិកម្មឃុំ នៅខេត្តព្រះវិហារ

ចេញ​ផ្សាយ​ ១១ តុលា ២០២៥ 606

នៅថ្ងៃទី១០ ខែតុលា ឆ្នាំ២០២៥ ឯកឧត្តមបណ្ឌិត យ៉ង សាំងកុមារ រដ្ឋលេខា​ធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំសិក្ខាសាលា ស្តីអំពី «ការត្រៀមសម្របសម្រួលទីផ្សារស្រូវផ្ការំដួល និងការផ្តល់សេវាកម្ម​កសិកម្មរួម (One Stop Service)»  ដល់មន្ត្រីកសិកម្មឃុំ៥៧នាក់ នៅខេត្ត​ព្រះវិហារ ដែលកម្មវិធីគាំទ្រដោយមូលនិធិសហប្រតិបត្តិការ​អន្តរជាតិ​អាឡឺម៉ង់(GIZ)។ សិក្ខាសាលាមានការចូលរួមពីឯកឧត្តម ខាត់ សុធី អនុរដ្ឋលេខាធិការ លោកពឹង ទ្រីដា ប្រធានមន្ទីរកសិកម្មខេត្តព្រះវិហារ លោកស៊ុន ទ្រី អនុ​ប្រធាន​នាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ និងវិស័យ​ឯកជន​ពាក់ព័ន្ធផងដែរ។
សិក្ខាសាលាធ្វើឡើងក្នុងគោលបំណង ផ្តល់ព័ត៌មានអំពីការផ្តួចផ្តើម ដើម្បី​ភាព​ប្រសើរឡើងនូវវិស័យស្រូវអង្ករកម្ពុជា (BRIC) ផ្តល់ព័ត៌មានអំពី​គំនិត​ផ្តួចផ្តើម ការផ្តល់សេវាកសិកម្មរួម និងកិច្ចសហការរវាងក្រសួងកសិកម្ម BRIC និង One Stop Service ផ្តល់ព័ត៌មានអំពីការកាត់បន្ថយការ​បំភាយឧស្ម័ន​កាបូន​ពីផលិតកម្មស្រូវ និងឱកាសដើម្បីទទួលបានឥណទានកាបូន(Carbon Credit) និងប្រមូលមតិត្រឡប់ ពីភាគីពាក់ព័ន្ធទាំងអស់។
នាឱកាសនោះ ឯកឧត្តមបណ្ឌិត យ៉ង សាំងកុមារ បានគូសបញ្ជាក់ថា One Stop Service គឺជាយន្តការសំខាន់នៃការកាត់បន្ថយថ្លៃដើមផលិត ឆ្ពោះទៅ​បង្កើនប្រាក់ចំណូលរបស់កសិករ លើផលិតកម្មដំណាំស្រូវ ។ ឯកឧត្តមបាន​ជំរុញដល់មន្រ្តីកសិកម្មខេត្តព្រះវិហារ ឱ្យត្រៀមខ្លួនលើការសម្របសម្រួល​ទីផ្សារ​ស្រូវផ្ការំដួល នាខែវិច្ឆិកាខាងមុខ និងការរៀបចំក្រុមកសិករដើម្បី​ងាយ​ស្រួលទទួលបានកញ្ចប់សេវារួមតែមួយនៅរដូវបន្ទាប់ (One Stop Services) ដោយចាប់ផ្តើមពីសេវាច្រូតនៅខែវិច្ឆិកា ការភ្ជួរលុប​ជញ្ជ្រាំង​ដែលចាប់ផ្តើមពីខែធ្នូ និងសេវាបន្តបន្ទាប់ទៀត។
នៅចុងបញ្ចប់ ឯកឧត្តមបណ្ឌិត យ៉ង សាំងកុមារ បានណែនាំដល់អ្នកពាក់ព័ន្ធ​ក្នុងការអនុវត្តន៍គម្រោង ត្រូវ​យកចិត្ត​ទុកដាក់សហការឱ្យគម្រោង ដើរត្រូវគ្នា​ជាមួយគោលនយោ​បាយរាជរដ្ឋាភិបាល ជាពិសេសក្នុងការសហការ​ជាមួយ​មន្រ្តីកសិកម្មឃុំ បង្កើន​គុណភាព និងប្រសិទ្ធភាពសេវាបម្រើកសិករជាដើម៕