ព័ត៌មានផ្សេងៗទៀត
ឯកឧត្តមរដ្ឋលេខាធិការ ហាស់ សារ៉េត តំណាងដ៏ខ្ពង់ខ្ពស់ ឯកឧត្តមរដ្ឋមន្រ្តី ឌិត ទីណា អញ្ជើញដឹកនាំក្រុមការងារជំនាញចុះសួរសុខទុក្ខ និងនាំយកអំណោយឧបត្ថម្ភ ជូនដល់ក្រុមអន្តរាគមន៍ថ្នាក់ជាតិ ប្រចាំការនៅស្រុកក្រគរ ខេត្ដពោធិ៍សាត់
ចេញផ្សាយ ៧ កុម្ភៈ ២០២៥ 2924
នៅរសៀលថ្ងៃទី០៦ ខែមករា ឆ្នាំ២០២៥ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ ឯកឧត្តមរដ្ឋមន្រ្តី ឌិត ទីណា បានអញ្ជើញដឹកនាំមន្រ្តីជំនាញចុះសួរសុខទុក្ខ និងនាំយកអំណោយឧបត្ថម្ភ មានថវិកាមួយចំនួន និងគ្រឿងឧបភោគបរិភោគ ប្រេងម៉ាស៊ូតជូនដល់ក្រុមអន្តរាគមន៍ថ្នាក់ជាតិ បង្ក្រាបបទល្មើសជលផលនៅបឹងទន្លេសាប ដែលប្រចាំការកន្លែងអភិរក្សជលផល ក្នុងឃុំកំពង់លួង ស្រុកក្រគរ ខេត្ដពោធិ៍សាត់។
ក្នុងដំណើរបេសកកម្មនេះ មានការចូលរួមអមដំណើរពី ឯកឧត្តម ប៉ែន ផល្លីកា ឯកឧត្តម ទឹម បូរក្ស លោកជំទាវ អ៊ឹម រចនា អនុរដ្ឋលេខាធិការ ឯកឧត្តម ពុំ សុថា ប្រតិភូរាជរដ្ឋាភិបាល ទទួលបន្ទុកជាប្រធានរដ្ឋបាលជលផល នាយខណ្ឌជលផល កងកម្លាំង និងមន្រ្តីជំនាញពាក់ព័ន្ធ។
នាឱកាសនោះឯកឧត្តមរដ្ឋលេខាធិការ បានពាំនាំនូវការសួរសុខទុក្ខពីសំណាក់ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ជូនដល់កងអន្តរាគមន៍ថ្នាក់ជាតិបង្ក្រាបបទល្មើសជលផលនៅបឹងទន្លេសាបនោះ ព្រមជាមួយសម្តែងនូវការកោតសរសើរដល់សមត្ថកិច្ចជលផលគ្រប់ជាន់ថ្នាក់ និងក្រុមអន្តរាគមន៍ថ្នាក់ជាតិ ដែលបានខិតខំបំពេញកិច្ចការបង្រ្កាបបទល្មើសជាប្រចាំ ដោយទទួលបានលទ្ធផល និងសមិទ្ធផលល្អ។
ជាចុងបញ្ចប់ ឯកឧត្តមក៏បានផ្តល់ការណែនាំ និងអនុសាសន៍ដល់សមត្ថកិច្ចជលផលគ្រប់ជាន់ថ្នាក់ សូមបន្តបំពេញតួនាទី ភារកិច្ចបន្ថែមទៀតដើម្បីឱ្យការងារបង្រ្កាបបទល្មើស ទទួលបានប្រសិទ្ធភាព និងប្រសិទ្ធផលខ្ពស់ចំពោះការអភិរក្សធនធានជលផល និងធនធានធម្មជាតិនេះ៕
