ព័ត៌មានផ្សេងៗទៀត
ឯកឧត្តម ឃុន សាវឿន រដ្ឋលេខាធិការក្រសួងកសិកម្ម បានដឹកនាំមន្ត្រីជំនាញចុះពិនិត្យ វាយតម្លៃលទ្ធផលនៃការអន្តរាគមន៍លើការកម្ចាត់ដង្កូវហ្វូងនៅស្រុកចំនួន២ ក្នុងខេត្តសៀមរាប
ចេញផ្សាយ ២៧ មិថុនា ២០២៤ 2333
នៅថ្ងៃទី២៧ ខែមិថុនា ឆ្នាំ២០២៤ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទបានដឹកនាំមន្ត្រីជំនាញចុះពិនិត្យ វាយតម្លៃលទ្ធផលនៃការអន្តរាគមន៍បាញ់ថ្នាំកសិកម្មកម្ចាត់ដង្កូវហ្វូងនៅស្រុកចំនួន២ ក្នុងខេត្តសៀមរាប ដោយមានការចូលរួមពីអភិបាលរងខេត្តទទួលបន្ទុកកសិកម្ម ប្រធានមន្ទីរកសិកម្មខេត្ត អាជ្ញាធរពាក់ព័ន្ធ មន្រ្តីកសិកម្មឃុំ និងប្រជាកសិករ។
ការចុះអន្តរាគមន៍នោះ មន្ត្រីជំនាញកសិកម្មសង្កេតឃើញថា ២ទៅ៣ថ្ងៃកន្លងមកនេះ នៅក្នុងស្រុកជីក្រែង និងស្រុកសូត្រនិគម ដង្កូវហ្វូងមានការថមថយ ឬកម្ចាត់បានស្ទើរតែ១០០% ដោយសារតែប្រជាកសិករបានយកថ្នាំកសិកម្មបាញ់កម្ចាត់ដង្កូវហ្វូង តាមការណែនាំរបស់មន្ត្រីច្ចេកទេសនៃក្រសួងកសិកម្ម និងមួយផ្នែកទៀតមេឃភ្លៀងខ្លាំងក៏ធ្វើឱ្យដង្កូវក្លាយជាឌុកឌឿងាប់ស្ទើរទាំងស្រុងផងដែរ។
ឯកឧត្តម ឃុន សាវឿន រដ្ឋលេខាធិការក្រសួងកសិកម្មក៏បានណែនាំទៅកសិករទាំងអស់ត្រូវដែលជួបបញ្ហាប្រឈមណាមួយពាក់ព័ន្ធនិងដង្កូវបំផ្លាញដំណាំស្រូវ ត្រូវសហការណ៍ និងរាយការណ៍ជាបន្ទាន់ទៅអាជ្ញាធរមូលដ្ឋាន ដើម្បីឱ្យពួកគាត់ចុះជួយអន្តរាគមន៍ ទប់ស្កាត់ដង្កូវហ្វូងឱ្យបានទាន់ពេលវេលា ទើបទទួលបានប្រសិទ្ធភាព និងប្រសិទ្ធផលខ្ពស់៕
