ព័ត៌មានផ្សេងៗទៀត
ឯកឧត្តមរដ្ឋលេខាធិការ ប្រាក់ ដាវីដ បានអញ្ជើញចូលរួមសន្និសីទអន្តរជាតិស្តីពី “ពាណិជ្ជកម្មលើសេវាកសិកម្ម” ឆ្នាំ២០២៥ នៅសាធារណរដ្ឋប្រជាមានិតចិន
ចេញផ្សាយ ២៨ តុលា ២០២៥ 1023
នាព្រឹកថ្ងៃទី២៨ ខែតុលា ឆ្នាំ២០២៥ នៅទីក្រុងគ័ងចូវ ខេត្តគ័ងទុង សាធារណរដ្ឋប្រជាមានិតចិន ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមថ្លែងសុន្ទរកថានៅក្នុងសន្និសីទអន្តរជាតិស្តីពី “ពាណិជ្ជកម្មលើសេវាកសិកម្ម” ឆ្នាំ២០២៥ ដែលសន្និសីទនេះរៀបចំដោយក្រសួងកសិកម្ម និងកិច្ចការជនបទចិន។
ថ្លែងទៅកាន់អង្គសន្និសីទ ឯកឧត្តមរដ្ឋលេខាធិការ បានរំលេចពីការពង្រឹងកិច្ចសហប្រតិបត្តិការលើវិស័យកសិកម្ម ជាពិសេសការធ្វើពាណិជ្ជកម្មលើសេវាកសិកម្ម តាមរយៈការចាប់យកឌីជីថលូបនីយកម្ម ដែលនឹងជួយពន្លឿនដំណើរការខ្សែច្រវាក់តម្លៃផលិតផលកសិកម្មឱ្យកាន់មានប្រសិទ្ធភាព ឆ្លើយតបតាមតម្រូវការទីផ្សារ និងទាន់ពេលវេលា។
តាមរយ:យុទ្ធសាស្ត្របញ្ចកោណ និងកម្មវិធីគោលនយោបាយអាទិភាពទី៥ និងទី៦ ក្រសួងកសិកម្ម រុក្ខាប្រមាញ់ និងនេសាទដែលជាសេនាធិការរបស់រាជរដ្ឋាភិបាលកម្ពុជា បាននឹងកំពុងលើកកម្ពស់ការប្រើប្រាស់ឌីជីថលនៅក្នុងផ្នែកសេវាកសិកម្ម តាមរយ:ការដាក់ពង្រាយមន្ត្រីកសិកម្មឃុំដោយផ្សារភ្ជាប់ជាមួយការប្រើប្រាស់ Tablet និងកម្មវិធី App ទូរស័ព្ទ ដើម្បីប្រមូល គ្រប់គ្រងទិន្នន័យ និងដោះស្រាយបញ្ហាប្រឈមនានាបានទាន់ពេលវេលា។
ក្រសួងក៏កំពុងរៀបចំបង្កើតកម្មវិធី App ទូរស័ព្ទផ្សារភ្ជាប់ទំនាក់ទំនងរវាងអ្នកផ្គត់ផ្គង់ (កសិករ) ពាណិជ្ជករ(អ្នកទិញ) និងភ្នាក់ងារផ្តល់សេវាកម្មនានាផ្សេងទៀត ក្នុងវិស័យកសិកម្ម សំដៅបើកឱកាសទីផ្សារកាន់តែទូលាយលើផលិតផលកសិកម្ម និងធានាការផ្តល់សេវាកម្មនានាកាន់តែងាយស្រួល និងទាន់ពេលវេលា។ បន្ថែមពីនេះ ឯកឧត្តមរដ្ឋលេខាធិការបានបន្តគូសបញ្ជាក់ពីតួនាទី និងសារៈសំខាន់របស់ “បញ្ជរជាតិតែមួយ” ដែលជាយន្តការថ្នាក់ជាតិដើម្បីជួយសម្រួល និងពន្លឿននីតិវិធីនៃការនាំចេញ-នាំចូលសម្រាប់វិនិយោគិនផងដែរ។
ឆ្លៀតក្នុងឱកាសសន្និសីទនេះ ឯកឧត្តមរដ្ឋលេខាធិការ បានអញ្ជើញថ្នាក់ដឹកនាំនៃបណ្តាប្រទេស និងវិស័យឯកជន ចូលរួមកម្មវិធីវេទិកានិងពិព័រណ៍កសិកម្មកម្ពុជាឆ្នាំ២០២៥ (CAFE25) ដែលនឹងប្រព្រឹត្តទៅចាប់ពីថ្ងៃទី១៣ ដល់ថ្ងៃទី១៦ ខែវិច្ឆិកា ឆ្នាំ២០២៥ ខាងមុខនេះ ដើម្បីស្វែងយល់ពីសក្តានុពលវិស័យកសិកម្មកម្ពុជា និងឱកាសក្នុងការផ្គូផ្គងដៃគូវិនិយោគនៅក្នុងការធ្វើពាណិជ្ជកម្ម និងសេវាកម្មកសិកម្មនៅកម្ពុជា និងជាមួយបណ្តាប្រទេសផ្សេងទៀត៕
