ឯកឧត្តមបណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបើកវេទិកាភ្ជាប់ទំនាក់ទំនងរវាងកសិករនាំមុខនៃខ្សែច្រវាក់តម្លៃមាន់ស្រែ

ចេញ​ផ្សាយ​ ១៧ កក្កដា ២០២៦ 3510

នៅព្រឹកថ្ងៃទី ១៧ ខែកក្កដា ឆ្នាំ ២០២៦ ឯកឧត្តមបណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានធ្វើជាប្រធានគណៈអធិបតីក្នុងពិធីបើកវេទិកាភ្ជាប់ទំនាក់ទំនងរវាងកសិករនាំមុខនៃខ្សែច្រវាក់តម្លៃមាន់ស្រែ នៅកសិដ្ឋានមាន់ស្រែរបស់កសិករនាំមុខឈ្មោះ ទ្រី សុកខឿន ដែលស្ថិតនៅភូមិស្មោញ ឃុំល្ងៀង ស្រុកត្បូងឃ្មុំ  ខេត្តត្បូងឃ្មុំ។
វេទិកា ដែលត្រូវបានរៀបចំ និងដំណើរការដោយកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (Agriculture Services Programme for an Inclusive Rural Economy and Agricultural Trade, ASPIRE-AT) ដែលជាយន្តការមួយរបស់ក្រសួងកសិកម្ម រុក្ខាប្រមាញ់ និងនេសាទនេះ ត្រូវបានចូលរួមដោយសិក្ខាកាមសរុបចំនួន ១០៣ នាក់ ក្នុងនោះមានស្រ្តី ២៨ នាក់ ។ អ្នកចូលរួមទាំងនោះ រួមមានប្រធាន និងមន្ត្រីបច្ចេកទេសនៃមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ ទីប្រឹក្សានៃកម្មវិធី ASPIRE-AT និងគម្រោងបង្កើនភាពធន់នឹងអាកាសធាតុក្នុងខ្សែច្រវាក់តម្លៃកសិកម្មនៅកម្ពុជា (CREA project) មន្ត្រីធនាគារអភិវឌ្ឍន៍ជនបទ និងកសិកម្ម (ARDB) និងកសិករនាំមុខនៃខ្សែច្រវាក់តម្លៃមាន់ស្រែ។
វេទិកានេះមានគោលបំណងផ្តល់ឱកាសជូនកសិករនាំមុខ ឬ កសិករឆ្នើម ក្នុងការផ្លាស់ប្តូរមេរៀន និងបទពិសោធល្អៗពីគ្នាទៅវិញទៅមក អំពីការចិញ្ចឹម និងលក់មាន់ស្រែ ព្រមទាំងរួមគ្នាកំណត់ដំណោះស្រាយចំពោះបញ្ហាប្រឈមនានា ដូចជាការកែច្នៃចំណីមាន់ដោយប្រើប្រាស់វត្ថុធាតុដើមដែលអាចរកបាននៅក្នុងមូលដ្ឋាន ដើម្បីកាត់បន្ថយការប្រើប្រាស់ចំណីសម្រេច និងការរៀបចំផែនការផលិតកម្មឱ្យឆ្លើយតបនឹងតម្រូវការរបស់ទីផ្សារជាដើម។ លើសពីនេះ វេទិកាក៏ផ្តោតលើការជំរុញបង្កើនសមត្ថភាពរបស់កសិករនាំមុខក្នុងការផ្ទេរចំណេះដឹង ការបញ្ជ្រាបយេនឌ័រ ការគាំពារសង្គម បរិស្ថាន និងអាកាសធាតុ និងការបញ្ចូលប្រើប្រាស់បច្ចេកវិទ្យាដែលប្រើប្រាស់ថាមពលព្រះអាទិត្យ ព្រមទាំងចងក្រងនូវមេរៀន បទពិសោធ និងបច្ចេកទេសល្អៗ ដើម្បីផ្សព្វផ្សាយ និងពង្រីកការអនុវត្តជូនសមាជិកផ្សេងទៀតនៃសហគមន៍កសិកម្ម។
នៅក្នុងពិធីបើក ឯកឧត្តមរដ្ឋលេខាធិការបានលើកឡើងអំពីសភាពការណ៍រួមនៃវិស័យកសិកម្ម គោលនយោបាយ និងយុទ្ធសាស្ត្រថ្មីៗរបស់រាជរដ្ឋាភិបាល និងក្រសួងកសិកម្ម សារៈសំខាន់នៃកិច្ចសហការរបស់គ្រប់តួអង្គនៃខ្សែច្រវាក់តម្លៃ ដើម្បីធ្វើឱ្យផលិតផលកសិកម្មកម្ពុជាមានផលិតភាព គុណភាព និងបរិមាណស្របនឹងតម្រូវការរបស់ទីផ្សារក្នុងស្រុក និងទីផ្សារបរទេស ពោលគឺលក់បានច្រើន ហើយទាំងអស់គ្នាទទួលបានផលចំណេញប្រកបដោយសមធម៌ ។ ឯកឧត្តមក៏បានណែនាំឱ្យអ្នកចូលរួមយកចិត្តទុកដាក់ស្តាប់ និងពិភាក្សាឱ្យបានសកម្ម ដើម្បីជាប្រយោជន៍សម្រាប់ខ្លួនផ្ទាល់ សមាជិកផ្សេងទៀតនៃសហគមន៍កសិកម្ម ឬ អ្នកភូមិស្រុករបស់ខ្លួន ដែលជាអ្នកចិញ្ចឹម និងលក់មាន់ស្រែ ព្រមទាំងរួមចំណែកអភិវឌ្ឍវិស័យកសិកម្មជាតិ ជាពិសេសគឺធ្វើឱ្យមានស្បៀងអាហារកាន់តែសម្បូរ កាន់តែមានគុណភាពល្អ និងមានតម្លៃសមរម្យ សម្រាប់អ្នកទិញយកទៅបរិភោគ ។ 
គួរបញ្ជាក់ថាកម្មវិធី ASPIRE-AT កំពុងត្រូវបានគ្រប់គ្រង និងដឹកនាំអនុវត្តដោយក្រសួងកសិកម្ម រុក្ខាប្រមាញ់ និងនេសាទ ដោយប្រើប្រាស់ការគាំទ្រថវិកា និងបច្ចេកទេស ដែលរាជរដ្ឋាភិបាលកម្ពុជាបានខ្ចី និងទទួលជាជំនួយពីមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) សហភាពអឺរ៉ុប (EU) ធនាគារវិនិយោគអឺរ៉ុប (EIB) មូលនិធិបរិស្ថានសាកល (GEF) និងអង្គការសហប្រតិបត្តិការត្រីកោណ ត្បូង-ត្បូង (SSTC)៕