ឯកឧត្តមរដ្ឋលេខាធិការ អ៊ួង កុសល នាំយកគ្រាប់ពូជបន្លែ និងជីសរីរាង្គចែកដល់កសិករនៅក្នុងស្រុកកោះញែក ខេត្តមណ្ឌលគិរី

ចេញ​ផ្សាយ​ ៨ តុលា ២០២៥ 646

នៅថ្ងៃទី៧ ខែតុលា ឆ្នាំ២០២៥ ឯកឧត្ដម អ៊ួង កុសល រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោកបណ្ឌិត សុង ឃាង ប្រធាន-អនុប្រធានមន្ទីរកសិកម្ម ប្រធាន-អនុប្រធានការិយាល័យក្សេត្រសាស្ត្រ និងផលិតភាពកសិកម្ម ដោយសហការជាមួយអាជ្ញាធរមូលដ្ឋាន មន្រ្តីកសិកម្មឃុំ បាននាំយកគ្រាប់ពូជបន្លែ និងជីសរីរាង្គ ចែកដល់កសិករ សរុបចំនួន ២២គ្រួសារ នៅឃុំចំនួន៣ ក្នុងស្រុកកោះញែក ខេត្តមណ្ឌលគិរី។
ឯកឧត្តមរដ្ឋលេខាធិការបានគូសបញ្ជាក់ថា ឃុំដែលទទួលបានពូជបន្លែ និងជីសរីរាង្គ រួមមាន ឃុំអបួនលើ ចំនួន១២គ្រួសារ ឃុំស្រែសង្គម ចំនួន ៣គ្រួសារ ឃុំសុខសាន្ត ចំនួន ៣គ្រួសារ ដោយក្នុង ១គ្រួសារ ទទួលបាន គ្រាប់ពូជបន្លែ ចំនួន ៤កញ្ចប់ (ត្រសក់ ១កញ្ចប់ ត្រាប់ស្រួយ ១កញ្ចប់ ត្រឡាច ២កញ្ចប់ និងជីសរីរាង្គ ចំនួន ២៥គីឡូក្រាម) ដើម្បីដាំដុះស្ដារឡើងវិញលើផ្ទៃដីដែលរងការខូចខាត ដោយជំនន់ទឹកភ្លៀង កាលពីថ្ងៃ  ទី២៣-២៤ ខែកញ្ញា ឆ្នាំ២០២៥ កន្លងមក នៅសាលាឃុំអបួនលើ ស្រុកកោះញែក ខេត្តមណ្ឌលគិរី។  
ជាមួយគ្នានេះ ឯកឧត្ដមរដ្ឋលេខាធិការ បានចុះពិនិត្យទីតាំងចំការបន្លែ និងស្រែដែលរងផលប៉ះពាល់  នៅឃុំ   អបួនលើ និងឃុំស្រែសង្គម ស្រុកកោះញែកផងដែរ។ ទន្ទឹមនឹងនេះ ឯកឧត្ដមរដ្ឋលេខាធិការ ក៏បានណែនាំដល់កសិករបន្តយកចិត្តទុកដាក់ ក្នុងការដាំដុះបន្លែ ដោយរៀបចំប្រតិទិនដាំដុះច្បាស់លាស់ សមស្របទៅតាមតម្រូវការទីផ្សារ និងដើម្បីជៀសពីផលប៉ះពាល់ ឬខូចខាតដោយគ្រោះធម្មជាតិផ្សេង៕