ឯកឧត្តមបណ្ឌិតរដ្ឋលេខាធិការ យ៉ង សាំង កុមារ អញ្ជើញដឹកនាំ​កិច្ច​ប្រជុំគណៈកម្មាធិការតម្រង់ទិសគម្រោង PEARL ពិនិត្យវឌ្ឍនភាព និង​បញ្ហាប្រឈមនានា

ចេញ​ផ្សាយ​ ១ មេសា ២០២៦ 3138

នៅថ្ងៃទី៣១ ខែមីនា ឆ្នាំ២០២៦ ឯកឧត្តមបណ្ឌិត យ៉ង សាំង កុមារ រដ្ឋលេខា​ធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញ​ដឹកនាំកិច្ចប្រជុំគណៈកម្មាធិការតម្រង់ទិសគម្រោង PEARL ដើម្បី​ពិភាក្សា​អំពីវឌ្ឍនភាព និងបញ្ហាប្រឈមនានានៃគម្រោង រួមទាំងផល​ប៉ះពាល់ពីភាពតានតឹងតាមព្រំដែនកម្ពុជា-ថៃ ដែលបានបណ្តាលឱ្យ​កសិករមួយចំនួននៅខេត្តព្រះវិហារ និងឧត្តរមានជ័យ ត្រូវបោះបង់​លំនៅ​ដ្ឋានរបស់ពួកគេ។
កិច្ចប្រជុំនេះមានការចូលរួម ពីឯកឧត្តមបណ្ឌិត មាស ពិសិដ្ឋ រដ្ឋ​លេខាធិការក្រសួងកសិកម្ម រុក្ខាប្រមាញ់ និងនេសាទ លោកស្រី Rebekah Bell តំណាងអង្គការស្បៀង និងកសិកម្មនៃអង្គការ​សហប្រជាជាតិ (FAO) ប្រចាំព្រះរាជាណាចក្រកម្ពុជា  រួមជាមួយ​សហការី ។
គណៈកម្មាធិការបានអនុម័តការផ្តល់ជំនួយបន្ទាន់ ដល់កសិករដែល​បានផ្លាស់ទីលំនៅ ដើម្បីធានាថាពួកគេមានសុវត្ថិភាព និងសុខភាព​ល្អ។ កិច្ចប្រជុំក៏បានឯកភាពលើវិធានការនានា ដើម្បីពន្លឿនការអនុវត្ត​គម្រោង បង្កើនការសហការជាមួយដៃគូ និងធ្វើឱ្យប្រសើរឡើងនូវកា​រទិញសម្ភារៈ និងការគ្រប់គ្រងគម្រោង ដើម្បីផ្តល់ការគាំទ្រដល់កសិករ​ឱ្យមានប្រសិទ្ធភាពខ្ពស់។
សូមបញ្ជាក់ថា គម្រោង PEARL ត្រូវបានគាំទ្រដោយមូលនិធិអាកាស​ធាតុបៃតង (Green Climate Fund) និងអនុវត្តដោយក្រសួង​កសិកម្ម រុក្ខាប្រមាញ់ និងនេសាទ និងក្រសួងបរិស្ថាន ដោយមាន​ការគាំទ្រផ្នែកបច្ចេកទេសពីអង្គការ FAO ដោយមានគោលបំណង​គាំទ្រកសិករតូចចំនួន ៤៥០ ០០០ នាក់ នៅតំបន់អាងទន្លេសាប​ភាគខាងជើង៕