ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញដឹកនាំកិច្ចប្រជុំសំណេះសំណាល និងផ្សព្វផ្សាយច្បាប់ស្តីពីជលផល ជាមួយថ្នាក់ដឹកនាំខណ្ឌរដ្ឋបាលជលផលចំនួនពីរខេត្ត

ចេញ​ផ្សាយ​ ៩ មិថុនា ២០២៦ 313

នៅថ្ងៃទី៨-៩ ខែមិថុនា ឆ្នាំ២០២៦ ឯកឧត្ដម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្ដមរដ្ឋមន្ត្រី ឌិត ទីណា  បានជួបប្រជុំសំណេះសំណាល និងផ្សព្វផ្សាយច្បាប់ស្តីពីជលផល ជាមួយថ្នាក់ដឹកនាំ និងមន្ត្រីខណ្ឌរដ្ឋបាលជលផលខេត្តកែប និងខេត្តកំពត។
កិច្ចប្រជុំនោះក៏មានការចូលរួម អគ្គនាយកដ្ឋានអធិការកិច្ចនៃអគ្គនាយកដ្ឋានជលផល អធិការនៃអធិការដ្ឋានរដ្ឋបាលជលផលសមុទ្រ មន្ទីរកសិកម្ម រុក្ខាប្រមាញ់ និងនេសាទ ខេត្តកែប និងខេត្តកំពត និងនាយខណ្ឌរដ្ឋបាលជលផលខេត្តកែប និងខេត្តកំពត នៅសាលប្រជុំមន្ទីរកសិកម្ម រុក្ខាប្រមាញ់ និងនេសាទខេត្ត។
ក្នុងកិច្ចប្រជុំសំណេះសំណាលនេះឯកឧត្ដមក៏បានស្តាប់របាយការណ៍ស្តីពីវឌ្ឍនភាពការងារអធិការកិច្ចលើអនុវិស័យជលផលក្នុងដែនសមុទ្រនៃខេត្ដទាំងពីរនេះដែលមានភូមិសាស្រ្តជាប់គ្នានេះ លោក កែវ មុនីរិទ្ធ នាយអធិការដ្ឋានរដ្ឋបាលជលផលសមុទ្រក៏បានលើកឡើងពីការបង្កើតបាននូវគណៈកម្មការជាតិសន្តិសុខលម្ហសមុទ្រនៃខេត្តជាប់សមុទ្រទាំងបួន ដែលលោកនាយខណ្ឌនៃខេត្តនីមួយៗជាមេបញ្ជាការរង ដោយឡែកសម្រាប់ខេត្តទាំងពីរនេះគឺខេត្តកំពតមានបុស្តិ៍ប្រចាំការនៅកោះសេះ និងកែបនៅកោះពោធិ។ 
តាមការរាយការណ៍ពីលោកនាយខណ្ឌទាំងពីរមន្រ្តីរដ្ឋបាលជលផលខណ្ឌកំពតមានសមាសភាព១៦នាក់ ក្នុងនោះមន្រ្តីកិច្ចសន្យាចំនួន៤នាក់ ឯខេត្តកែបមាន១០នាក់ រួមជាមួយមន្រ្តីកិច្ចសន្យា៤នាក់ផងដែរ។ 
ឯកឧត្តមអនុរដ្ឋលេខាធិការ ក៏បានកោតសរសើរដល់ថ្នាក់ដឹកនាំអធិការរដ្ឋបាលជលផលសមុទ្រ និងខណ្ឌរដ្ឋបាលជលផលទាំងពីរ ដែលបានខិតខំបំពេញភារកិច្ចដោយទទួលបានលទ្ធផលល្អប្រសើរ បានជួយអភិវឌ្ឍ ទប់ស្កាត់ និងបង្ក្រាបបទល្មើសជលផលក្នុងភូមិសាស្រ្តរបស់ខ្លួន រហូតដល់ខេត្តទាំងពីរនេះបានបង្ហាញឡើងវិញនូវប្រភេទសត្វកម្រផ្សេងៗដូចជាផ្សោត អណ្តើកសមុទ្រជាដើម ហើយក៏បានសហការបានល្អជាមួយគណ:បញ្ជាការឯកភាពខេត្ត និងអង្គការដៃគូ។
ជាមួយគ្នានេះឯកឧត្តមក៏បានទទួលយកសំណូមពរពីអង្គភាពនីមួយៗដើម្បីដាក់ជូនទៅថ្នាក់ដឹកនាំ ហើយក៏បានជំរុញឱ្យចុះផ្សព្វផ្សាយច្បាប់ស្តីពីជលផលថ្មី និងអនុក្រឹត្យលេខ៩១អនក្រ.បក ដែលនឹងចាប់ផ្តើមអនុវត្តជាធរមានចន្លោះពេលបីខែទៀតដែលជាពេលដ៏ខ្លីខាងមុខនេះ។ 
ជាចុងក្រោយឯកឧត្តមក៏បានថ្លែងអំណរគុណ និងសូមសរសើរដល់ក្រុមការងារចម្រុះ ដែលជានិច្ចកាលតែងតែខិតខំប្រឹងប្រែងទប់ស្កាត់បទល្មើសជលផល និងឱ្យពួកគាត់ជួយផ្សព្វផ្សាយបន្តដល់អ្នកនេសាទ ដើម្បីជួយទប់ស្កាត់បទល្មើស និងចូលរួមអភិរក្ស ដើម្បីអភិវឌ្ឍធនធានជលផល៕