ឯកឧត្តមរដ្ឋលេខាធិការ យ៉ង សាំង កុមារ អញ្ជើញដឹកនាំកិច្ចប្រជុំតម្រង់​ទិស​លើការអភិវឌ្ឍផលិតកម្មស្រូវកាបោនទាប រវាងក្រុមហ៊ុន និងសហ​គមន៍​កសិករ នៅខេត្តបាត់ដំបង

ចេញ​ផ្សាយ​ ៣០ មករា ២០២៦ 38

នៅរសៀលថ្ងៃទី២៩ ខែមករា ឆ្នាំ២០២៦ ឯកឧត្តមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយមាន​ការអមដំណើរដោយ ឯកឧត្តម ឡឹក សុធា អនុរដ្ឋលេខាធិការ បានដឹកនាំ​ការ​ប្រជុំតម្រង់ទិស និងសម្របសម្រួលកិច្ចសហការរវាង ក្រុមហ៊ុន Green Carbon, ក្រុមហ៊ុន Seed and Feed ជាមួយនិងសហគមន៍​កសិករ​ប្រើប្រាស់ទឹកកំពីងពួយ នៅខេត្តបាត់ដំបង លើការអភិវឌ្ឍ ផលិត​កម្ម​ស្រូវកាបោនទាប (Low Carbon Rice Production)។
នៅក្នុងកិច្ចប្រជុំ ឯកឧត្តម យ៉ង សាំង កុមារ បានណែនាំឱ្យអ្នកពាក់ព័ន្ធ ដែលធ្វើកិច្ចសហការនេះ ត្រូវឈរលើគោលការណ៍ និងគោលបំណង​សំខាន់​ៗ​​រួមមាន៖ អនុវត្តកសិកម្មកាបោនទាប ដោយគិតគូរពីប្រសិទ្ធភាព​សេដ្ឋកិច្ចរបស់កសិករ សហការជំរុញផលិតកម្មស្រូវ ដែលកាត់បន្ថយ​ហានិភ័យ​ពីការប្រើប្រាស់ថ្នាំកសិកម្ម និងពង្រីកឱកាសទីផ្សារ និងបែង​ចែក​ចំណូលពីឥណទានកាបោន (Carbon Credit) ដើម្បីទ្រទ្រង់ការ​ថែរក្សា និងអភិវឌ្ឍប្រព័ន្ធធារាសាស្ត្រឱ្យមាននិរន្តរភាព៕