ឯកឧត្តមអនុរដ្ឋលេខាធិការ ឈុំ ឆុនលី អញ្ជើញដឹកនាំក្រុមការងារ និងមន្រ្តីកសិកម្មឃុំ ពិនិត្យវាយតម្លៃលើការងារកសិកម្ម នៅស្រុកចំនួន២ ក្នុងខេត្តតាកែវ

ចេញ​ផ្សាយ​ ១ កុម្ភៈ ២០២៦ 2425

នៅថ្ងៃទី៣០ ខែមករា ឆ្នាំ២០២៦ ឯកឧត្តម ឈុំ ឆុនលី អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារជំនាញ និង​មន្រ្តីកសិកម្មឃុំ ចុះពិនិត្យការងារកសិកម្ម នៅស្រុកគិរីវង់ និងស្រុក​ត្រាំកក់ ក្នុងខេត្តតាកែវ។
ដំណើរបេសកកម្មនោះ មានការចូលរួមពីលោក ញ៉ិប ស្រ៊ន ប្រធាន​មន្ទីរ​កសិកម្ម រុក្ខាប្រមាញ់ និងនេសាទខេត្តតាកែវ តំណាងមន្រ្ដីនៃអគ្គនាយក​ដ្ឋាន​កសិកម្ម អាជ្ញាធរស្រុក-ឃុំ ការិយាល័យកសិកម្ម ធនធានធម្មជាតិ និងបរិស្ថានស្រុក មន្រ្តីកសិកម្មឃុំ រួមជាមួយប្រជាកសិករនៅតំបន់​នោះ​ផងដែរ។
សូមបញ្ជាក់ថា បើតាមរបាយការណ៍របស់មន្ទីរកសិកម្មខេត្តតាកែវ បាន​ឱ្យ​ដឹង​ថា នៅក្នុងឆ្នាំ២០២៥ ផ្ទៃដីផលិតកម្មដំណាំស្រូវអនុវត្តបាន ៣៤៩ ៥៨៤ ហិកតា បរិមាណផលសរុប ១ ៤១៦ ៣៥០ តោន ក្រោយកាត់​ទុក​ពូជ ចំណីសត្វ និងស្បៀងសម្រាប់ប្រជាជន នៅសល់ស្រូវ ១ ០០១ ៦២៤ តោនសម្រាប់នាំចេញ។ សម្រាប់រដូវប្រាំងឆ្នាំ២០២៥-២០២៦ ផែនការដាំដុះ ១០០ ០០០ហិកតា អនុវត្តបាន ៩៤ ១២៥ ហិកតា ស្មើនឹង ៩៣.១៣% (ស្រុក​​គិរីវង់​អនុវត្តបាន ១៧ ០៧០ហិកតា)។ 
ទន្ទឹមនឹងនោះដែរ ចំពោះដំណាំដីប្លី មានចំនួន ៣៩២គ្រួសារ ក្នុង៦ឃុំ នៃស្រុក​គិរិវង់ ដាំមានចំនួនសរុប ៧២ ៨១៥ គុម្ព បរិមាណផលសរុបប្រមាណ ២១៨តោន(១គុម្ព ៣គ.ក ក្នុង១ឆ្នាំ)។ ការងារចិញ្ចឹមសត្វ ចំនួនទាសរុប ៩០១ ១៧២ក្បាល អាចផលិតបានស៊ុតទាប្រមាណ ៣៥០ ០០០ក្នុង១ថ្ងៃ​សម្រាប់នាំចេញ។ ការងារជលផល ចំនួនបរិមាណផលបង្កងសរុប ៧៩​តោន ផលបង្កងវារីវប្បកម្មមានចំនួន៣៧តោន៕