ឯកឧត្តមអគ្គលេខាធិការ​ សរ​ ចិត្រា​ អញ្ជើញជាអធិបតីភាពក្នុងពិធីបើកសិក្ខាសាលាផ្សព្វផ្សាយលទ្ធផលគម្រោង​ ស្តីពីការបង្កើត​ប្រព័ន្ធព័ត៌មាន​ សន្តិសុខស្បៀងអាស៊ាន​ និងការអភិវឌ្ឍធនធានមនុស្ស​ (ដំណាក់កាលទី៣​)

ចេញ​ផ្សាយ​ ២៧ វិច្ឆិកា ២០២៥ 1715

នាព្រឹកថ្ងៃទី២៧​ ខែវិច្ឆិកា​ ឆ្នាំ២០២៥​ ឯកឧត្តម​ សរ​ ចិត្រា​ អគ្គលេខាធិការក្រសួងកសិកម្ម​ រុក្ខាប្រមាញ់​ និងនេសាទ​ អញ្ជើញជាអធិបតីភាពក្នុងពិធីបើកសិក្ខាសាលាផ្សព្វផ្សាយលទ្ធផលគម្រោង​ ស្តីពីការបង្កើត​ប្រព័ន្ធព័ត៌មាន​ សន្តិសុខស្បៀងអាស៊ាន​ និងការអភិវឌ្ឍធនធានមនុស្ស​ (ដំណាក់កាលទី៣​) នៅសណ្ឋាគារ​ សាន់​ អេន​ ម៉ូន​ រាជធានីភ្នំពេញ។
ថ្លែងទៅកាន់អង្គសិក្ខាសាលា​ ឯកឧត្តមអគ្គលេខាធិការ​ បានកោតសរសើរ​ និងវាយតម្លៃខ្ពស់ដល់ក្រសួងកសិកម្ម ស្បៀងអាហារ និងកិច្ចការជនបទ(MAFRA) សាជីវកម្មសហគមន៍ជនបទកូរ៉េ(KRC) និងដៃគូពាក់ព័ន្ធទាំងអស់ ចំពោះការចូលរួម​ និងរៀបចំកម្មវិធីនាថ្ងៃនេះ ព្រមទាំងភាពជោគជ័យក្នុងការអនុវត្តការងារ ២ដំណាក់កាលកន្លងមក ដើម្បីពង្រឹងសមត្ថភាពមន្រ្តីលើការប្រមូលទិន្នន័យស្ថិតិកសិកម្ម ប្រកបដោយប្រសិទ្ធភាព និងទាន់ពេលវេលា។
ឯកឧត្តមអគ្គលេខាធិការ​ ការគ្រប់គ្រងទិន្នន័យពិតជាមានសារៈសំខាន់ក្នុងការជំរុញរៀបចំគោលនយោបាយ ដោយផ្តោតនូវការឆ្លុះបញ្ចាំងស៊ីជម្រៅពីស្ថានភាពកសិកម្ម និងកាលានុវត្តភាពសម្រាប់កំណើនសេដ្ឋកិច្ច ប្រកបដោយប្រសិទ្ធភាព ស័ក្តិសិទ្ធិភាព សម្រាប់ការអភិវឌ្ឍដោយយល់ពីតម្រូវការជាក់លាក់ ឆ្ពោះទៅកាន់គោលដៅអភិវឌ្ឍន៍សេដ្ឋកិច្ច និងសង្គម ហើយការងារនេះនឹងជួយក្នុងការទាក់ទាញការវិនិយោគ និងការធ្វើធុរកិច្ចរបស់វិស័យឯកជន កាត់បន្ថយហានិភ័យ និងទិដ្ឋភាពនានាក្នុងវិស័យកសិកម្ម។
ជាថ្មីម្តងទៀត ឯកឧត្តមអគ្គលេខាធិការ សង្ឃឹមថាសិក្ខាសាលានេះនឹងជួយតម្រង់ទិសដៅការងារ ការផ្ទៀងផ្ទាត់ទិន្នន័យតាមរយៈដ្រូនលើដំណាំស្រូវ​ និងពង្រឹងសមត្ថភាពលើការងារប្រមូលទិន្នន័យស្ថិតិកសិកម្មតាមបច្ចេកវិទ្យាស្តង់ដារក្នុងតំបន់អាស៊ាន​ សំដៅសម្រេចបាននូវទិសដៅការងារប្រកបដោយប្រសិទ្ធភាពខ្ពស់។
តាងនាមក្រសួងកសិកម្ម រុក្ខាប្រមាញ់ និងនេសាទ ឯកឧត្តមអគ្គលេខាធិការ បានថ្លែងអំណរគុណ និងលើកទឹកចិត្តដល់ភាគីកូរ៉េ និងដៃគូពាក់ព័ន្ធ​ទាំងអស់ ពិនិត្យលទ្ធភាពបន្តការងារគម្រោងនេះថែមទៀត និងផ្តល់នូវគំរូប្រព័ន្ធការងារនេះសម្រាប់វិស័យកសិកម្មកម្ពុជា ប្រើប្រាស់ជាប្រយោជន៍ និងពង្រីកវិសាលភាពការងារទៅកាន់ដំណាំសក្កានុពលផ្សេងៗទៀត៕