ព័ត៌មានផ្សេងៗទៀត
ថ្នាក់ដឹកនាំក្រសួងកសិកម្ម បើកកិច្ចប្រជុំពិនិត្យវឌ្ឍនភាពគម្រោង (EMPOWER) និងការកំណត់អ្នកទទួលផល និងពង្រឹងកិច្ចសហការជាមួយអាជ្ញាធរមូលដ្ឋាន នៅស្រុករលាប្អៀរ ខេត្តកំពង់ឆ្នាំង
ចេញផ្សាយ ២៧ សីហា ២០២៦ 1811
នៅថ្ងៃទី២៦ ខែសីហា ឆ្នាំ២០២៦ ឯកឧត្តម ឱម គឹមស៊ា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានអនុវត្តគម្រោងលើកកម្ពស់ជីវភាព ប្រកបដោយប្រសិទ្ធភាពសេដ្ឋកិច្ច ដើម្បីកាត់បន្ថយភាពងាយរងគ្រោះ និងពង្រឹងភាពធន់ (EMPOWER) ប្រចាំស្រុករលាប្អៀរ បានអញ្ជើញដឹកនាំកិច្ចប្រជុំពិនិត្យ ពិភាក្សា និងវាយតម្លៃវឌ្ឍនភាពនៃការអនុវត្តគម្រោង នៅសាលប្រជុំមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង។
កិច្ចប្រជុំនេះមានការអញ្ជើញចូលរួមពី លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង លោក ម៉ី សុផល្លី អភិបាលរងនៃគណៈអភិបាលស្រុករលាប្អៀរ លោក រ័ត្ន បុរី អ្នកសម្របសម្រួលគម្រោងថ្នាក់ស្រុក ព្រមទាំងតំណាងរដ្ឋបាលឃុំគោលដៅទាំង៦ និងមន្ត្រីកសិកម្មឃុំ-សង្កាត់ពាក់ព័ន្ធ។ ឃុំគោលដៅទាំង៦ រួមមាន៖ ឃុំស្វាយជ្រុំ ឃុំភ្នំក្រាំងដីមាស ឃុំព្រៃមូល ឃុំពង្រ ឃុំបន្ទាយព្រាល និងឃុំក្រាំងលាវ។
កិច្ចប្រជុំធ្វើឡើងក្នុងគោលបំណងសំខាន់ ដើម្បីពិនិត្យ និងវាយតម្លៃលើវឌ្ឍនភាពនៃការអនុវត្តគម្រោង ព្រមទាំងពិភាក្សាអំពីលទ្ធផលនៃការវាយតម្លៃ និងការកំណត់អ្នកទទួលផលដែលជាប្រជាពលរដ្ឋក្រីក្រ កម្រិត១ (ក្រ១) កម្រិត២ (ក្រ២) និងគ្រួសារដែលមានប័ណ្ណសមធម៌ ឬប័ណ្ណងាយរងហានិភ័យ ស្របតាមលក្ខខណ្ឌ និងគោលការណ៍ដែលបានកំណត់របស់គម្រោង។
តាមលទ្ធផលនៃការវាយតម្លៃ គ្រួសារចំនួន ១០១៥ គ្រួសារ ត្រូវបានកំណត់ថា បានបំពេញតាមលក្ខខណ្ឌ និងមានសិទ្ធិទទួលផលពីគម្រោង EMPOWER។ ជាមួយគ្នានេះ អង្គប្រជុំក៏បានពិភាក្សា និងស្នើសុំកិច្ចសហការពីរដ្ឋបាលឃុំ-សង្កាត់ ក្នុងការចូលរួមសម្របសម្រួល និងជ្រើសរើស ជនបង្គោលតាមភូមិ ឱ្យបានសមស្របទៅតាមមុខរបរ ជំនាញ និងលក្ខខណ្ឌដែលគម្រោងបានកំណត់។ ការចូលរួមរបស់អាជ្ញាធរមូលដ្ឋាន ត្រូវបានចាត់ទុកថាជាកត្តាសំខាន់ក្នុងការធានាបាននូវប្រសិទ្ធភាព តម្លាភាព និងភាពត្រឹមត្រូវក្នុងការអនុវត្តគម្រោង៕
