ព័ត៌មានផ្សេងៗទៀត
ឯកឧត្តមរដ្ឋលេខាធិការ ឃុន សាវឿន អញ្ជើញដឹកនាំសម្របសម្រួល វេទិកាសាធារណៈ ស្តីពី «ការត្រួតពិនិត្យ និងគាំទ្រការអនុវត្តយុទ្ធសាស្ត្របញ្ចកោណ ដំណាក់កាលទី១» នៅស្រុកវ៉ារិន ខេត្តសៀមរាប
ចេញផ្សាយ ១៦ ឧសភា ២០២៦ 3640
នៅថ្ងៃទី១៥ ខែឧសភា ឆ្នាំ២០២៦ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកវ៉ារិន ខេត្តសៀមរាប បានអញ្ជើញដឹកនាំសម្របសម្រួលវេទិកាសាធារណៈ ស្តីពី «ការត្រួតពិនិត្យ និងគាំទ្រការអនុវត្តយុទ្ធសាស្ត្របញ្ចកោណ ដំណាក់កាលទី១» នៅស្រុកវ៉ារិន ខេត្តសៀមរាប។
វេទិកានេះប្រារព្ធឡើង ក្នុងគោលបំណងដើម្បីផ្សព្វផ្សាយនូវគោលនយោបាយ កម្មវិធីកំណែទម្រង់ សមិទ្ធិផលសំខាន់ៗសម្រេចបាន ព្រមទាំងវិធានការនានា របស់រាជរដ្ឋាភិបាល ព្រមទាំងស្តាប់កង្វល់ និងសំណូមពរ ដោះស្រាយឆ្លើយតបទៅនឹងសំណើសេចក្តីត្រូវការរបស់ប្រជាពលរដ្ឋ សំដៅធ្វើការអភិវឌ្ឍមូលដ្ឋាន ការលើកកម្ពស់ការផ្តល់សេវាសាធារណៈ ប្រកបដោយប្រសិទ្ធភាព និង គណនេយ្យភាព។
ថ្លែងនាឱកាសនៃអង្គវេទិកាសាធារណៈ ឯកឧត្តម ឃុន សាវឿន បានគូសបញ្ជាក់ថា រាជរដ្ឋាភិបាល បានកំពុងជំរុញការអភិវឌ្ឍសេដ្ឋកិច្ចកម្ពុជា ឱ្យរីកចម្រើនជាបន្តបន្ទាប់ និងអភិវឌ្ឍន៍ហេដ្ឋារចនាសម្ព័ន្ធ ស្ពាន ថ្នល់ មន្ទីរពេទ្យ សាលារៀន គ្រប់ទីកន្លែង។ រាជរដ្ឋាភិបាល ក៏បានបន្តយកចិត្តទុកដាក់ធ្វើកំណែទម្រង់គ្រប់វិស័យ សំដៅបម្រើផលប្រយោជន៍ និងលើកកម្ពស់ជីវភាពរស់នៅរបស់ប្រជាពលរដ្ឋកាន់តែប្រសើរជាងមុន។
ជាចុងបញ្ចប់ ឯកឧត្ដម ឃុន សាវឿន បានជំរុញឱ្យអាជ្ញាធរមូលដ្ឋានពាក់ព័ន្ធ ធ្វើការដោះស្រាយនូវបញ្ហាប្រឈម សំណើ សំណូមពរនានា ដែលប្រជាពលរដ្ឋបានលើកឡើងតាមរយៈវេទិកាសាធារណៈ ប្រកបដោយប្រសិទ្ធភាព និងការទទួលខុសត្រូវខ្ពស់ ដោយផ្អែកលើច្បាប់ លិខិតបទដ្ឋានគតិយុត្ត គោលនយោបាយ វិធានការរបស់រាជរដ្ឋាភិបាល និងបន្តយកចិត្តទុកដាក់លើកកម្ពស់នូវគោលនយោបាយភូមិឃុំមានសុវត្ថិភាពជាដើម៕
