ចេញពីខេត្តពោធិសាត់ ឯកឧត្តមរដ្ឋមន្ត្រី និងសហការីបានបន្តដំណើរទៅខេត្តបាត់ដំបង ដើម្បីចុះពិនិត្យ មើលស្ថានភាពគ្រោះរាំងស្ងួត

ចេញ​ផ្សាយ​ ២២ កក្កដា ២០១៩ 3940

ខេត្តបាត់ដំបង
-កម្មវិធីទី០៤: 
ចេញពីខេត្តពោធិសាត់ លោក និងសហការីបានបន្តដំណើរទៅខេត្តបាត់ដំបង ដើម្បីចុះពិនិត្យ មើលស្ថានភាពគ្រោះរាំងស្ងួត នៅភូមិទួលព្រំ ឃុំកកោះ ស្រុកមោងឫស្សី។ តាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទ បានឲ្យដឹងថាគិតមកត្រឹមថ្ងៃទី១៩ ខែកក្កដា ផ្ទៃដីស្រូវវស្សាដើមរដូវ (ស្រូវស្រាល និងស្រូវកណ្តាល) ចំនួនជាង ១៥ពាន់ហ.ត កំពុងប្រឈមបញ្ហាខ្វះទឹក ក្នុងនោះប៉ះពាល់ធ្ងន់ធ្ងរចំនួនជាង ១ពាន់ហ.ត។ ឆ្នាំ២០១៩ នេះមន្ទីរមានផែនការដាំដុះដំណាំស្រូវ ជាង ៣០ម៉ឺនហត បច្ចុប្បន្នទូទាំងខេត្តផ្ទៃដីជាង ១៩ពាន់ហត ហើយក្នុងនោះជាង ៣០% កំពុងរងផលប៉ះពាល់ដោយគ្រោះរាំងស្ងួត។ ប្រភពទឹក និងប្រឡាយទឹកមេមួយចំនួនត្រូវបានគោក ហួតហែង ដែលជាឧបសគ្គក្នុងការធ្វើអន្តរាគមន៍បូមទឹកជួយសង្គ្រោះសន្ទូងដែលនៅជាប់តំបន់នោះ។

ពិនិត្យជារួម ស្ថានភាពគ្រោះរាំងស្ងួតនៅទីនេះ មិនខុសពីខេត្តពោធិសាត់ទេ។ ដូច្នេះ លោកបានណែនាំឲ្យអគ្គនាយកដ្ឋានកសិកម្ម មន្ទីរកសិកម្ម រុក្ខាប្រមាញ់ និងនេសាទ សហការជាមួយមន្ទីរជំនាញពាក់ព័ន្ធចុះតាមដានស្ថានការណ៍នេះឲ្យបានជាប់ជាប្រចាំដើម្បីប្រមូល និងគ្រប់គ្រងតួលេខប៉ះពាល់ឲ្យបានច្បាស់លាស់ ត្រឹមត្រូវ និងជាពិសេសស្វែងរកប្រភពទឹក ដើម្បីរិះរកមធ្យោបាយគ្រប់បែបយ៉ាង ជាពិសេសដោះស្រាយពូជ សម្រាប់ធ្វើការស្តារឡើងវិញ ជូនប្រជាកសិករឲ្យបានទាន់ពេលវេលា ក្នុងករណីគ្មានភ្លៀងប៉ុន្មានថ្ងៃខាងមុខនេះ។