ឯកឧត្តមរដ្ឋលេខាធិការ ហាស់ សារ៉េត អញ្ជើញដឹកនាំក្រុមការងារចុះពិនិត្យទីតាំងដាក់បាំងធ្នស់របស់ «សហគមន៍នេសាទពាមឃ្លាំង» ស្ថិតនៅឃុំលើកដែក ខេត្តកណ្តាល

ចេញ​ផ្សាយ​ ៩ មករា ២០២៦ 1466

នៅថ្ងៃទី៨ ខែមករា ឆ្នាំ២០២៦ ឯកឧត្តម ហាស់ សារ៉េត រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំក្រុមការងារចុះពិនិត្យទីតាំងដាក់បាំងធ្នស់របស់ «សហគមន៍នេសាទពាមឃ្លាំង» (អតីតឡូតិ៍លេខ៧) ស្ថិតនៅឃុំលើកដែក ស្រុកកោះធំ ខេត្តកណ្តាល។
ក្នុងដំណើរនេះ ក៏មានការចូលរួមអមដំណើរដោយ ឯកឧត្តម ទឹម បូរក្ស អនុរដ្ឋលេខាធិការ លោក សុង ហុង អនុប្រធានរដ្ឋបាលជលផល លោកបណ្ឌិត លាង សុផា ប្រធាននាយកដ្ឋានអភិវឌ្ឍន៍សហគមន៍ព្រមទាំងសហការី អនុប្រធានមន្ទីរកសិកម្មខេត្តកណ្តាល នាយខណ្ឌខេត្តកណ្តាល  នាយផ្នែករដ្ឋបាលជលផលបាសាក់ មន្ត្រីខណ្ឌ អភិបាលរងស្រុកកោះធំ មន្ត្រីកសិកម្មស្រុក ជំទប់ទី១ឃុំលើកដែក មេភូមិពាក់ព័ន្ធ និងគណៈកម្មការ សហគមន៍នេសាទ សរុបចំនួន២៣នាក់។ 
លោកប្រធានសហគមន៍នេសាទពាមឃ្លាំង បានធ្វើសេចក្ដីរាយការណ៍អំពីស្ថានភាពសហគមន៍ ដោយក្នុងសហគមន៍នេសាទមានសមាជិកចំនួន៦៦០នាក់គណៈកម្មការ១១នាក់ កន្លងមកសហគមន៍បានអនុវត្តការងារដូចជា ការចុះល្បាត អភិរក្សត្រីមេពូជ លែងត្រីចូលក្នុងដែនធម្មជាតិ ការពារព្រៃលិចទឹក ចូលរួមប្រជុំជាមួយឃុំ ចូលរួមសហការជាមួយអាជ្ញាធរមូលដ្ឋាន និងដាក់របាំងធ្នស់។ ចំពោះករណីដាក់របាំងធ្នស់នេះ ប្រជាពលរដ្ឋមានការគាំទ្រ និងសប្បាយរីករាយ ព្រោះមានសារប្រយោជន៍ដូចជា ជួយឱ្យសហគមន៍មានប្រាក់ចំណូល រក្សាទឹកសម្រាប់ធ្វើកសិកម្ម ប្រជាពលរដ្ឋអាចធ្វើនេសាទនៅតំបន់ខ្សែទឹកខាងលើ ថែរក្សាត្រីមេពូជ ជួយទប់ស្កាត់ការធ្វើចរាចរណ៍ត្រីទៅប្រទេសវៀតណាម គណៈកម្មការបែងចែកផលនេសាទដល់សមាជិកសហគមន៍ ជាកន្លែងចែកចាយត្រីសម្រាប់អ្នកទិញក្នុងតម្លៃសមរម្យ។ 
ជាមួយគ្នានេះ ឯកឧត្តមរដ្ឋលេខាធិការ ក៏បានជួបសំណេះសំណាលចែករំលែកបទពិសោធន៍ការងារ ព្រមទាំងជំរុញឱ្យគណៈកម្មការ សមាជិកសហគមន៍នេសាទ ចូលរួមគោរពច្បាប់ លក្ខន្តិកៈ បទបញ្ជាផ្ទៃក្នុងរបស់សហគមន៍ ចូលរួមការពារ បន្តការចុះល្បាត ដោយសហការជាមួយមន្ត្រីជំនាញ និងអ្នកពាក់ព័ន្ធ ថែរក្សាដាំព្រៃលិចទឹកដែលជាជម្រកត្រីពងកូន អភិរក្សត្រីមេពូជ និងប្រើប្រាស់ធនធានក្នុងមូលដ្ឋានប្រកបដោយនិរន្តរភាព។ 
ទាក់ទងទៅនឹងការដាក់របាំងធ្នស់ ឯកឧត្ដមបានស្នើអោយផ្នែកជំនាញធ្វើការសិក្សាទាំងលើទិដ្ឋភាពច្បាប់ សេដ្ឋកិច្ច និងមតិសាធារណៈដើម្បីជួយពង្រឹងសហគមន៍ឲ្យមានការអភិវឌ្ឍន៍ឈានឡើង។
ក្នុងឱកាសនោះផងដែរ ឯកឧត្តមរដ្ឋលេខាធិការ បានជំរុញឱ្យសហគមន៍ អាជ្ញាធរភូមិ ឃុំ ស្រុក សូមជួយបន្តផ្សព្វផ្សាយទៅកាន់ប្រជាពលរដ្ឋ ចូលរួមការពារធនធានជលផល ធនធានធម្មជាតិក្នុងតំបន់ ហើយត្រូវលែងកូនត្រីបន្ថែម បង្កើនមុខរបរចិញ្ចឹមជីវិតបន្ថែមលើការធ្វើនេសាទ អភិរក្សត្រីមេពូជ ការពារនិងដាំព្រៃលិចទឹក ព្រមទាំងចូលរួមគោរពច្បាប់ជលផលទាំងអស់គ្នា៕