ទស្សនកិច្ចកម្ពុជា-អូស្ត្រាលី ចុះពិនិត្យ «ជណ្ដើរត្រី» នៅទំនប់​តាអួន ខេត្តកំពង់ស្ពឺ បង្ហាញពី​កិច្ច​សហប្រតិបត្តិ​ការជំរុញ ការអភិវឌ្ឍវិស័យកសិកម្ម និងការ​អភិរក្ស​ធនធានធម្មជាតិ

ចេញ​ផ្សាយ​ ១ សីហា ២០២៦ 3276

នៅថ្ងៃទី៣១ ខែកក្កដា ឆ្នាំ២០២៦ ឯកឧត្តម ឃុន សាវឿន រដ្ឋ​លេខា​ធិការ តំណាងឱ្យឯកឧត្តម ឌិត ទីណា រដ្ឋមន្ត្រីក្រសួង​កសិកម្ម រុក្ខាប្រមាញ់ និងនេសាទ បានទទួលជួបស្វាគមន៍ លោកជំទាវបណ្ឌិត Anne Aly រដ្ឋមន្ត្រីអូស្ត្រាលីទទួលបន្ទុក កិច្ចការអភិវឌ្ឍអន្តរជាតិ ក្នុងដំណើរ​ទស្សន​កិច្ចសិក្សាអំពី «ជណ្ដើរត្រី» ស្ថិតនៅទំនប់តាអួន ខេត្តកំពង់ស្ពឺ។
ដំណើរទស្សនកិច្ចនេះ ក៏មានការអញ្ជើញចូលរួមពី ឯកឧត្តម Derek Yip ឯកអគ្គរដ្ឋទូតអូស្ត្រាលីប្រចាំកម្ពុជា លោក ហន ពិសិដ្ឋ អភិ​បាលរងខេត្តកំពង់ស្ពឺ លោក តុប ចាន់អូន អនុ​ប្រធានវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប (IFReDI) និងមន្ត្រីជំនាញខណ្ឌជលផលខេត្តកំពង់ស្ពឺផងដែរ។
ក្នុងឱកាសនោះ គណៈប្រតិភូបានចុះពិនិត្យសំណង់ជណ្ដើរត្រី និងបានស្វែងយល់ផ្ទាល់ពីផលប្រយោជន៍ជាក់ស្តែង ដែល​ប្រជាពលរដ្ឋក្នុងមូលដ្ឋានទទួលបានពីសមិទ្ធផលនេះ។ លោកជំទាវបណ្ឌិត Anne Aly បានជួបសំណេះសំណាល និងសម្ភាសន៍ផ្ទាល់ជាមួយតំណាងអ្នកនេសាទប្រចាំតំបន់ចំនួន ៤នាក់ (ក្នុងនោះមានស្ត្រី ៣នាក់) ដែលពិភាក្សាអំពី៖ ស្ថានភាព​នៃការធ្វើនេសាទ ផលនេសាទ ប្រភេទត្រី អាហារូបត្ថម្ភ និងសារៈ​សំខាន់នៃជណ្ដើរត្រីក្នុងតំបន់ផងដែរ។
សូមបញ្ជាក់ថា ការសាងសង់ជណ្តើត្រី គឺជាសំណង់ហេដ្ឋារចនា​សម្ព័ន្ធអេកូឡូស៊ី ដ៏មានសារៈសំខាន់សម្រាប់ប្រទេសកម្ពុជា ដោយ​ជួយស្តារការតភ្ជាប់ប្រព័ន្ធទឹក និងផ្លូវចរាចរណ៍របស់ត្រី ជួយអភិរក្សជីវចម្រុះ និងរក្សានិរន្តរភាពធនធានជលផល ដែល​ជាមូលដ្ឋានសម្រាប់សន្តិសុខស្បៀង និងអាហារូបត្ថម្ភរបស់​ប្រជាពលរដ្ឋ៕