ឯកឧត្តមអនុរដ្ឋលេខាធិការ ឃី វិបុលបុត្រា អញ្ជើញចូលរួមវគ្គបណ្តុះបណ្តាលស្តីពី “ការគ្រប់គ្រងគ្រោះមហន្តរាយក្នុងវិស័យកសិកម្ម" ដល់មន្រ្តីកសិកម្មឃុំចំនួន ៥០នាក់ ក្នុងខេត្តរតនគិរី

ចេញ​ផ្សាយ​ ៧ មករា ២០២៦ 2675

នៅថ្ងៃទី៦ ខែមករា ឆ្នាំ២០២៦ ឯកឧត្តម ឃី វិបុលបុត្រា អនុរដ្ឋលេខាធិការ និងជាអនុប្រធានក្រុមការងារគ្រោះមហន្តរាយ នៃក្រសួង កសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី “ការគ្រប់គ្រងគ្រោះមហន្តរាយក្នុងវិស័យកសិកម្ម" ដល់មន្រ្តីកសិកម្មឃុំទូទាំងខេត្តរតនគីរីសរុបចំនួន ៥០នាក់ នៅក្នុងមន្ទីរកសិកម្ម រុក្ខាប្រមាញ់ និងនេសាទខេត្ត។ 
ឯកឧត្តមបានគូសបញ្ជាក់ថា វគ្គនេះ រៀបចំឡើងក្នុងគោលបំណងពង្រឹងសមត្ថភាពដល់មន្ត្រីកសិកម្មឃុំលើការងារសំខាន់ៗដូចជា ការត្រៀមបង្ការនិងតាមដានមុននិងក្រោយគ្រោះមហន្តរាយកើតឡើង ការប្រមូលទិន្នន័យនិងរាយការណ៍អំពីគ្រោះមហន្តរាយក្នុងឃុំ និងផែនការសកម្មភាពដើម្បីបន្ធូរបន្ថយផលប៉ះពាល់ពីគ្រោះមហន្តរាយ។
នាឱកាសនោះ ឯកឧត្តមក៏បានបានណែនាំដល់សិក្ខាកាមឱ្យយកចិត្តទុកដាក់ខិតខំសិក្សារៀនសូត្របន្ថែមដើម្បីបង្កើនសមត្ថភាពការងារ ព្រមទាំងបន្តតាមដានជាប់ជាប្រចាំនូវស្ថានភាពគ្រោះមហន្តរាយដែលអាចកើតមាន ឡើងនៅមូលដ្ឋានរបស់ខ្លួនផ្ទាល់រួមមានជំងឺឆ្លងសត្វ, សត្វល្អិតចង្រៃបំផ្លាញដំណាំ តាមដានតម្លៃកសិផលដូចជាដំឡូងមីនិងគ្រាប់ស្វាយចន្ទី ពិសេសភ្លើងឆេះព្រៃ ជាពិសេស ត្រូវក្តាប់ឱ្យបាននូវទិន្នន័យផលិតកម្ម តួលេខសំខាន់ រួមមាន សត្វ ដំណាំនិងផ្ទៃដីស្រែ។ 
ជាចុងបញ្ចប់ ឯកឧត្តមអនុរដ្ឋលេខាធិការ បានសង្កត់ធ្ងន់លើ គុណភាពរបាយការណ៍យោងទៅលើពេលវេលា, ទិន្នន័យច្បាស់លាស់និងគ្រប់ជ្រុងជ្រោយដើម្បីងាយដល់ការវាយតម្លៃ និងចុះធ្វើអន្តរាគមន៍ទាន់ពេលធានាបានប្រសិទ្ធភាព និងប្រសិទ្ធផលខ្ពស់៕