ព័ត៌មានផ្សេងៗទៀត
ឯកឧត្ដមបណ្ឌិត ហ៊ាន វណ្ណហន អញ្ជើញដឹកនាំកិច្ចប្រជុំពិគ្រោះយោបល់លើសំណើគម្រោង «ប្រព័ន្ធកសិកម្មចម្រុះផ្អែកលើដំណាំស្រូវសម្រាប់ជីវភាពជនបទប្រកបដោយភាពធន់នឹងអាកាសធាតុ (RICE+)»
ចេញផ្សាយ ១០ កញ្ញា ២០២៦ 476
នាព្រឹកថ្ងៃទី១០ ខែកញ្ញា ឆ្នាំ២០២៦ នៅទីស្តីការក្រសួងកសិកម្ម រុក្ខាប្រមាញ់ និងនេសាទ បានរៀបចំកិច្ចប្រជុំពិគ្រោះយោបល់លើសំណើគម្រោងស្តីពី «ប្រព័ន្ធកសិកម្មចម្រុះផ្អែកលើដំណាំស្រូវសម្រាប់ជីវភាពជនបទប្រកបដោយភាពធន់នឹងអាកាសធាតុ (RICE+)» ក្រោមអធិបតីភាព ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងមានអញ្ជេីញចូលរួមផងដែរពីតំណាង ឯកឧត្តម អាន ពេជ្រហត្ថដា រដ្ឋលេខាធិការក្រសួងធនធានទឹក និងឧតុនិយម និងជាសហប្រធានក្រុមការងារបច្ចេកទេសចម្រុះស្តីពីកសិកម្ម និងទឹក (TWG-AW) ព្រមទាំងតំណាងក្រសួង-ស្ថាប័នរដ្ឋពាក់ព័ន្ធ ដៃគូអភិវឌ្ឍន៍ តំណាងអង្គរកានានា និងវិស័យឯកជន សរុបចំនួន ៨៣រូប។
កិច្ចប្រជុំនេះធ្វេីឡើង ក្នុងគោលបំណងពិគ្រោះយោបល់ និងប្រមូលធាតុចូលលើសំណើគម្រោង RICE+ ដែលជាកិច្ចសហការរវាងក្រសួងកសិកម្ម រុក្ខាប្រមាញ់ និងនេសាទ និងក្រសួងសេដ្ឋកិច្ច និងហិរញ្ញវត្ថុ ដោយមានការគាំទ្រពីមូលនិធិអន្តរជាតិដើម្បីអភិវឌ្ឍន៍កសិកម្ម(IFAD) និងអង្គការស្បៀងអាហារ និងកសិកម្ម(FAO) សំដៅដាក់ស្នើទៅកម្មវិធីសន្តិសុខស្បៀង និងកសិកម្មពិភពលោក(GAFSP) ដោយផ្តោតលើការប្រែក្លាយតំបន់ស្រូវប្រាំង និងតំបន់ពឹងផ្អែកលើទឹកភ្លៀង ឱ្យទៅជាប្រព័ន្ធផលិតកម្មចម្រុះ ធន់នឹងការប្រែប្រួលអាកាសធាតុ និងផ្តោតលើទីផ្សារ ដោយប្រើប្រាស់ «សហគមន៍កសិកម្មទំនើប(MACs)» ជាយន្តការស្នូល។
អង្គប្រជុំបានពិភាក្សាលើសមាសធាតុសំខាន់ៗទាំង៥ រួមមាន៖ (១)ការពង្រឹងសហគមន៍កសិកម្មទំនើប និងសម្ព័ន្ធសហគមន៍កសិកម្មទំនើប (២)ការប្រែក្លាយតំបន់ផលិតស្រូវឱ្យធន់នឹងអាកាសធាតុ (៣)ការពង្រឹងលទ្ធភាពទទួលបានហិរញ្ញប្បទាន និងការគ្រប់គ្រងហានិភ័យ (៤)ការតភ្ជាប់ទីផ្សារ និងតម្លៃបន្ថែម និង(៥)ការពង្រឹងបរិយាកាសអំណោយផល និងកសាងសមត្ថភាពស្ថាប័ន។
លទ្ធផលនៃកិច្ចប្រជុំនេះ នឹងត្រូវយកទៅប្រើប្រាស់ជាធាតុចូលយ៉ាងសំខាន់ក្នុងការកែលម្អសំណើគម្រោង (RICE+) ឱ្យកាន់តែមានភាពគ្រប់ជ្រុងជ្រោយ និងស៊ីសង្វាក់ជាមួយយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ក៏ដូចជាកម្មវិធីគោលនយោបាយអាទិភាពរបស់ក្រសួងកសិកម្ម ដើម្បីធានាបានប្រសិទ្ធភាពនៃការអភិវឌ្ឍជីវភាពកសិករខ្នាតតូច និងមាននិរន្តរភាព៕
