ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានទទួលជួបពិភាក្សាការងារជាមួយគណៈប្រតិភូក្រុង Yunfu ខេត្តក្វាងទុង ប្រទេសចិន

ចេញ​ផ្សាយ​ ២៧ មីនា ២០២៤ 2654

នាព្រឹកថ្ងៃទី២៧ ខែមីនា ឆ្នាំ២០២៤ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានទទួលជួបពិភាក្សាការងារជាមួយគណៈប្រតិភូក្រុង  Yunfu ខេត្តក្វាងទុង ប្រទេសចិន ដឹកនាំដោយលោក Liang Shao Xiong អភិបាលរងក្រុង។

នៅក្នុងជំនួបពិភាក្សានេះ គណៈប្រតិភូបានបង្ហាញពីបំណងក្នុងការបង្កើតកិច្ចសហប្រតិបត្តិការលើវិស័យកសិកម្មរវាងកម្ពុជា និងក្រុង Yunfu ខេត្តក្វាងទុង និងឱកាសដែលក្រុមហ៊ុន/សហគ្រាសចិនអាចវិនិយោគលើវិស័យកសិកម្ម ព្រមទាំងមានបំណងសិក្សាអំពីទីផ្សារថ្នាំបុរាណចិននៅកម្ពុជា  ការនាំចេញផ្លែទុរេនទៅ Yungfu និងការកែច្នៃផលិតផលជលផល។

ជាការឆ្លើយតប ឯកឧត្តម ប្រាក់ ដាវីដ បានស្វាគមន៍ចំពោះកិច្ចសហប្រតិបត្តិការនេះ ដោយបានជម្រាបជូនពីស្ថានភាពកសិកម្មកម្ពុជា និង ផលិតផលសក្តានុពលដែលក្រុមហ៊ុន/សហគ្រាសអាចសម្លឹងមើល រួមមាន ស្រូវ/អង្ករ ស្វាយ ស្វាយចន្ទី និងម្រេច ហើយកម្ពុជាក៏មានច្បាប់វិនិយោគដែលផ្ដល់អត្ថប្រយោជន៍ច្រើនដល់វិនិយោគិនបរទេស។ 

ឯកឧត្តម ប្រាក់ ដាវីដ ក៏បានជម្រាបជូនគណៈប្រតិភូចិនអំពីយន្តការច្រករបៀងមច្ឆា និងអង្ករ ដែលនឹងផ្ដល់សក្តានុពល ជារួមលើការកែច្នៃ វេចខ្ចប់ និងនាំចេញទៅកាន់ទីផ្សារចិនដោយផ្ទាល់ ឬទីផ្សារនៅក្នុងតំបន់ តាមរយៈកិច្ចព្រមព្រៀងពាណិជ្ជកម្មតំបន់ (RCEP) និងកិច្ចព្រមព្រៀងទ្វេភាគី (FTA)។

ជាកិច្ចបញ្ចប់នៃជំនួបពិភាក្សា ភាគីទាំងពីរនឹងពិនិត្យលទ្ធភាពបង្កើតកិច្ចសហប្រតិបត្តិការរវាងកម្ពុជា និងក្រុង Yunfu សំដៅជំរុញកំណើនសេដ្ឋកិច្ចប្រទេសទាំងពីរ៕