កិច្ចប្រជុំស្តីពីការពិភាក្សាការងារផ្តល់សេវាសាធារណៈ នីតិវិធីនៃការរៀបចំផ្តល់ព័ត៌មានអំពីសេវា និងនីតិវិធីនៃការអនុវត្តការផ្តល់សេវាក្នុងកម្រងព័ត៌មានសេវាសាធារណៈ (Cambodia Public Service App)

ចេញ​ផ្សាយ​ ៣០ មករា ២០២០ 27906

នារសៀលថ្ងៃអង្គារ ៤កើត ខែមាឃ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២៨ ខែមករា ឆ្នាំ២០២០ មជ្ឈមណ្ឌលព័ត៌មាន និងឯកសារកសិកម្ម បានចូលរួមកិច្ចប្រជុំស្តីពីការពិភាក្សាការងារផ្តល់សេវាសាធារណៈ នីតិវិធីនៃការរៀបចំផ្តល់ព័ត៌មានអំពីសេវា និងនីតិវិធីនៃការអនុវត្តការផ្តល់សេវាក្នុងកម្រងព័ត៌មានសេវាសាធារណៈ (Cambodia Public Service App) នៅទីស្តីការក្រសួង កសិកម្ម រុក្ខាប្រមាញ់ និងនេសាទ អាគារផ្ការំដួល (បន្ទប់ផ្ការមៀត) ក្រោមអធិបតីឯកឧត្តម ស្រី វុឌ្ឍី អគ្គលេខាធិការក្រសួងកសិកម្ម រុក្ខាប្រមាញ់ និងនេសាទ។ ដោយមានការរចូលរួមពីថ្នាក់ដឹកនាំអង្គភាពក្រោមឱវាទក្រសួងកសិកម្ម រុក្ខាប្រមាញ់ និងនេសាទរួមមាន រដ្ឋបាលជលផល អគ្គនាយកដ្ឋានកៅស៊ូ រដ្ឋបាលព្រៃឈើ អគ្គនាយកដ្ឋានកសិកម្ម អគ្គនាយកដ្ឋានសុខភាពសត្វ និងផលិតកម្មសត្វ សាកលវិទ្យាល័យភូមិន្ទកសិកម្ម វិទ្យាស្ថានជាតិកសិកម្មកំពង់ចាម វិទ្យាស្ថានជាតិកសិកម្មព្រែកលៀប នាយកដ្ឋានបុគ្គលិក និងអភិវឌ្ឍន៍ធនធានមនុស្ស វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា នាយកដ្ឋាននីតិកម្មកសិកម្ម វិទ្យាស្ថានស្រាវជ្រាវកៅស៊ូកសិកម្ម នាយកដ្ឋានកសិ-ឧស្សាហកម្ម នាយកដ្ឋានផ្សព្វផ្សាយ កសិកម្ម រុក្ខាប្រមាញ់ និងនេសាទ និងមជ្ឈមណ្ឌលព័ត៌មាន និងឯកសារកសិកម្ម។ កិច្ចប្រជុំពិភាក្សាការងារផ្តល់សេវាសាធារណៈ នីតិវិធីនៃការរៀបចំផ្តល់ព័ត៌មានអំពីសេវា និងនីតិវិធីនៃ ការអនុវត្តការផ្តល់សេវាក្នុងកម្រងព័ត៌មានសេវាសាធារណៈ (Cambodia Public Service App) នេះមានគោលបំណង ដើម្បី៖

• រៀបចំកម្រងសេវាសាធារណៈរបស់អង្គភាពដែលផ្តល់សេវានៃក្រសួងកសិកម្ម រុក្ខាប្រមាញ់ និងនេសាទ ដើម្បីបញ្ជូនទៅក្រសួងមុខងារសាធារណៈ ក្នុងការដាក់បញ្ចូលទៅក្នុង Cambodia Public Service App ដើម្បីផ្សព្វផ្សាយជាសាធារណៈជ្រាបជាព័ត៌មាន និងយល់ដឹងអំពីនីតិវិធី
• រៀបចំបែងចែកក្រុមការងារទទួលខុសត្រូវទៅតាមអង្គភាពជំនាញនីមួយៗដើម្បីធ្វើការរៀបចំឯកសារ។

ជាលទ្ធផលបន្ទាប់ពីប្រជុំពិភាក្សារួមគ្នារួចមក អង្គប្រជុំបានសម្រេចដូចតទៅ៖

• អង្គភាពជំនាញនីមួយៗត្រូវបំពេញ និងផ្ញើឯកសារនីតិវិធី ទៅតាមទម្រង់លិខិតដែលបានស្នើសុំដោយ ក្រសួងមុខងារសាធារណៈ
• មជ្ឈមណ្ឌលព័ត៌មាន និងឯកសារកសិកម្មត្រូវរៀបចំប្រអប់សម្រាប់បញ្ចូលនីតិវិធីទៅក្នុង MAFF App របស់ក្រសួងកសិកម្ម រុក្ខាប្រមាញ់ និងនេសាទ និងបញ្ជូនឯកសារនីតិវិធីទាំងនោះបន្តទៅ ក្រសួងមុខងារសាធារណៈ។