ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម អញ្ជើញជាអធិបតីភាព ក្នុងកិច្ចប្រជុំស្តីពី ការផ្សព្វផ្សាយទស្សនាទានសហគមន៍កសិកម្មទំនើប នៅខេត្តតាកែវ

ចេញ​ផ្សាយ​ ៣០ មេសា ២០២៤ 2891

នៅថ្ងៃទី២៩ ខែមេសា ឆ្នាំ២០២៤ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញជាអធិបតីភាពក្នុងកិច្ចប្រជុំ ស្តីពី ការផ្សព្វផ្សាយទស្សនាទានសហគមន៍កសិកម្មទំនើប និងមានការអញ្ជើញចូលរួមពី ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។

កិច្ចប្រជុំប្រព្រឹត្តទៅនៅមន្ទីរកសិកម្ម រុក្ខាប្រមាញ់ និងនេសាទខេត្តតាកែវ ដោយមានការអញ្ជើញចូលរួមពីសំណាក់ ឯកឧត្តម ញ៉ែម ស្រស់ អភិបាលរងខេត្តតាកែវ លោក ជា សាំងដូណា ប្រធាននាយកដ្ឋានអភិវឌ្ឍន៍សហគមន៍កសិកម្ម នៃអគ្គនាយកដ្ឋានកសិកម្ម លោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវ លោក ម៉េង សុធី និង លោកស្រី ង៉ែត សុភា អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវ ព្រមទាំងអស់លោក លោកស្រី ប្រធានការិយាល័យជំនាញចំណុះមន្ទីរ លោកនាយរងខណ្ឌរដ្ឋបាល ជលផល និងព្រៃឈើ និងថ្នាក់ដឹកនាំសហគមន៍កសិកម្ម សមាគមន៍ពងទា ក្រុមកសិករចិញ្ចឹមសត្វ និងក្រុមកសិករចិញ្ចឹមបង្កង សរុបអ្នកចូលរួមចំនួន៦៦នាក់ ក្នុងនោះស្រី ១៦នាក់។

នៅក្នុងកិច្ចប្រជុំផ្សព្វផ្សាយនោះ ឯកឧត្តម ឃឹម ហ្វីណង់ អនុរដ្ឋលេខាធិការ បានធ្វើបទបង្ហាញពីគោលគំនិតជារួមរបស់សហគមន៍កសិកម្មទំនើប យន្តការគាំទ្ររបស់ក្រសួងកសិកម្ម រុក្ខាប្រមាញ់ និងនេសាទ ចំពោះសហគមន៍កសិកម្មទំនើប លក្ខខណ្ឌទទួលបានឥណទានដែលមានអាត្រាការប្រាក់ទាប និងអត្ថប្រយោជន៍នៃការបង្កើត និងអនុវត្តសហគមន៍កសិកម្មទំនើប។

ដោយឡែក ឯកឧត្តម តូច ប៊ុនហួរ រដ្ឋលេខាធិការ បានបូកសរុបលទ្ធផលនៃកិច្ចពិភាក្សា និងបានផ្ដល់អនុសាសន៍សំខាន់ៗ ជូនដល់សមាជិក សមាជិកានៃអង្គប្រជុំទាំងមូល ដើម្បីត្រៀមខ្លួនសម្រាប់ការចងក្រងសហគមន៍កសិកម្មទំនើប ស្របតាមគោលនយោបាយអាទិភាព​របស់រាជរដ្ឋាភិបាល។

សូមបញ្ជាក់ថាក្រោយការប្រជុំនិងធ្វើបទបង្ហាញរួចមក មានសហគមន៍កសិកម្មចំនួន០៤ បានបង្ហាញចំណាប់អារម្មណ៍ និងចង់ប្រែក្លាយខ្លួនជាសហគមន៍កសិកម្មទំនើប គឺសហគមន៍ផលិតកម្មស្រូវ១ បន្លែ១ និង មាន់ស្រែ២។ តំណាងសហគមន៍បញ្ជាក់ថា នឹងយកខ្លឹមសារដែលទទួលបានពីបទបង្ហាញនិងទស្សនាទាននេះ យកទៅប្រជុំផ្ទៃក្នុងជាមួយសមាជិករបស់ខ្លួនជាបន្តទៀត៕