ឯកឧត្តមរដ្ឋលេខាធិការ តូច ប៊ុនហួរ អញ្ជើញដឹកនាំក្រុមការងារចុះពិនិត្យស្ថានភាពដំណាំដែលរងផលប៉ះពាល់ដោយសារគ្រោះទឹកជំនន់ទន្លេមេគង្គនៅខេត្តចំនួន២

ចេញ​ផ្សាយ​ ៨ សីហា ២០២៥ 663

នៅថ្ងៃទី៦ដល់ថ្ងៃទី៧ ខែសីហា ឆ្នាំ២០២៥ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយឯកឧត្តម សុទ្ធ គឹមកុលមុនី អគ្គលេខាធិការរងនៃគណ:កម្មាធិការជាតិគ្រប់គ្រងគ្រោះមហន្តរាយ ឯកឧត្តម ស្រ៊ុន សុខុន ទីប្រក្សាក្រសួងកសិកម្ម រុក្ខាប្រមាញ់ និងនេសាទ លោក គង់ គា ប្រធាននាយកដ្ឋានដំណាំស្រូវ និងក្រុមការងារលេខាធិការដ្ឋានគ្រប់គ្រង់គ្រោះមហន្តរាយប្រចាំក្រសួង ព្រមទាំងមានការអញ្ជើញចូលរួមពីតំណាងមន្ទីរកសិកម្មខេត្តកំពង់ចាម និងខេត្តត្បូងឃ្មុំ និងមន្ត្រីជំនាញ លោកអភិបាលស្រុក និងលោកអភិបាលរងស្រុក ជួបសំណេះសំណាលមួយអាជ្ញាធរមូលដ្ឋានឃុំ និងមន្ត្រីកសិកម្មឃុំ និងចុះពិនិត្យស្ថានភាពភាពដំណាំដែលទទួលរងផលប៉ះពាល់ដោយសារគ្រោះទឹកជំនន់ទន្លេមេគង្គ ក្នុងខេត្តកំពង់ចាម និងខេត្តត្បូងឃ្មុំ។

ឯកឧត្តមរដ្ឋលេខាធិការបានគូសបញ្ជាក់ថា ខេត្តកំពង់ចាមផ្ទៃដីដែលទទួលរងផលប៉ះពាល់ក្នុងស្រុកស្ទឹងត្រង់លើដំណាំស្រូវសរុប ១៧០ ហិកតា ខូតខាត ១៥៣ ហិកតា និងពោតសរុប ១៧៤ ហិកតា ខូចខាត១៥៣ ហិកតា និងក្នុងស្រុកកោះសូទិនលើដំណាំពោតសរុប ១២៣ ហិកតា ខូចខាត ៧៩ ហិកតា។ ភាគច្រើនស្រូវស្ថិតនៅក្នុងដំណាក់កាលពង្រោះ។ ស្ថានភាពប៉ះពាល់ ខូចខាតដំណាំពោត ស្ថិតក្នុងដំណាក់កាលទុំ ៧៥%-៨៥% និង ៥៩ ហិកតា បានប្រមូលផល។

បើតាមឯកឧត្តមរដ្ឋលេខាធិការ មន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម នឹងបន្តចុះសហការជាមួយមន្ត្រីការិយាល័យកសិកម្ម ធនធានធម្មជាតិ និងបរិស្ថានស្រុក អាជ្ញាធរមូលដ្ឋាន និងអ្នកពាក់ព័ន្ធ ដើម្បីចុះពិនិត្យតាមដានស្ថានភាព ដំណាំបន្តទៀត។

ចំណែក នៅឯខេត្តត្បូងឃ្មុំ ផ្ទៃដីដែលទទួលរងផលប៉ះពាល់ក្នុងស្រុកក្រូចឆ្មារលើដំណាំស្រូវសរុប ៨៣៧ ហិកតា ខូតខាត ៥៥ ហិកតា ពោតសរុប ២ ១៩៩ ហិកតា និងល្ងសរុប ៨ ហិកតា និងស្រុកត្បូងឃ្មុំលើដំណាំស្រូវសរុប ១ ២៦៦ ហិកតា ខូចខាត ១១៣៤ ហិកតា ពោតសរុប ៣៣៩ ហិកតា ខូចខាត ៤០ ហិកតា បន្លែសរុប ៣ ហិកតា ខូចខាត ៣ ហិកតា និងឈូកសរុប ៦២ ហិកតា ខូចខាត ២២ ហិកតា។ តំបន់ដំណាំដែលជន់លិច ស្ថិតក្នុងតំបន់ទំនាបដែលងាយរងការជន់លិចពីរបបទឹកទន្លេមេគង្គ។ កសិករមិនទាន់អាចដាំដុះបានទេ ដោយត្រូវរង់ចាំរហូតដល់ទឹកស្រកទៅវិញ ទើបអាចធ្វើការដាំដុះដំណាំជាថ្មីបាន។

ជាចុងបញ្ចប់ឯកឧត្តមបានបន្ថែមថា មន្ទីរកសិកម្ម រុក្ខាប្រមាញ់ និងនេសាទខេត្ត បានសហការជាមួយអាជ្ញាធរមូលដ្ឋាន ដោយកំណត់ទីតាំងទាំងនោះ ជាតំបន់ងាយរងគ្រោះនិងធ្វើការ ផ្សព្វផ្សាយជាទៀងទាត់នៅរាល់ចុងរដូវប្រាំង ដើម្បីឲ្យកសិករធ្វើការពិចារណាហ្មត់ចត់ មុនធ្វើការសម្រេចចិត្តដាំដុះ៕