ព័ត៌មានផ្សេងៗទៀត
មន្រ្តីកសិកម្មឃុំ នៅស្រុកបរសេដ្ឋ ខេត្តកំពង់ស្ពឺ សម្របសម្រួលទីផ្សារស្រូវសែនក្រអូបជូនកសិករក្នុងឃុំមួយចំនួននៅតំបន់នោះ ទៅកាន់រោងម៉ាស៊ីនស្រូវ
ចេញផ្សាយ ២៨ កញ្ញា ២០២៤ 3490
នៅក្នុងការប្រមូលផលស្រូវដើមរដូវវស្សា ឆ្នាំ២០២៤ មន្រ្តីកសិកម្មឃុំស្វាយចចឹប សហការជាមួយមន្រ្តីកសិកម្មឃុំពោធិ៍អង្ក្រង និងឃុំកាត់ភ្លុកស្រុកបរសេដ្ឋ ខេត្តកំពង់ស្ពឺ បានធ្វើការសម្របសម្រួលទីផ្សារស្រូវសែនក្រអូបជូនកសិករនៅឃុំស្វាយចចឹប ទៅកាន់រោងម៉ាស៊ីនខ្មែរហ្វូត។
ជាលទ្ធផលនៃការសម្របសម្រួលទីផ្សារ មានកសិករចំនួន៦៧គ្រួសារ មកពី៩ភូមិ រួមមាន ភូមិចេក ភូមិចចឹប ភូមិអណ្តូងល្វា ភូមិត្រពាំងខ្ទុំ ភូមិត្រពាំងធ្លក ភូមិពពូល ភូមិសង្កែលាក់ ភូមិពង្រ និងភូមិត្រយឹង។ ចំណែក ស្រូវបាននាំចេញទៅរោងម៉ាស៊ីនមានចំនួនជាង ១៨៤ ៣០៨គីឡូក្រាម ចំណែកតម្លៃស្រូវកសិករទទួលបាន នៅខាងស្វាយចចឹបចន្លោះគឺពី ១ ២៥០៛ ទៅ ១ ៣៥០៛ ក្នុង១គីឡូក្រាម។
គួរបញ្ជាក់ថា កសិករនៅតំបន់នោះបានសម្តែងការត្រេកអរជាខ្លាំង ចំពោះមន្រ្តីកសិកម្មឃុំក្នុងការជួយសម្របសម្រួលទីផ្សារ និងជួយឱ្យកសិករលក់ស្រូវបានតម្លៃថ្លៃសមរម្យជាងមុន និងពុំមានការក្រឡុកតម្លៃ។ កសិករបានស្នើឱ្យមន្រ្តីកសិកម្មឃុំជួយចុះសម្របសម្រួលស្រូវគ្រប់រដូវជូនកសិកររាល់ឆ្នាំ។
កសិករយល់ច្បាស់ថា ការផលិតស្រូវដោយប្រើពូជសុទ្ធ និងសហការគ្នាដើម្បីផលិតលក់ជូនរោងម៉ាស៊ីន ធ្វើឱ្យស្រូវមានតម្លៃល្អ និងមានស្ថិរភាព។ បន្ថែមពីលើនេះ កសិករកាន់តែមានទំនុកចិត្តក្នុងការចូលរួមផលិតរួម និងលក់ស្រូវរួមគ្នា តាមគោលការណ៍ក្រុមសមកាលកម្ម ដោយមានការសម្របសម្រួលពីមន្រ្តីកសិកម្មឃុំ៕
