ឯកឧត្តមអនុរដ្ឋលេខាធិការ គី ច័ន្ទរំដួល បានអញ្ជីញដឹកនាំក្រុមការងារ ចុះពិនិត្យគម្រោងព្រៃលំហែកម្សាន្ត និងសួនអាស៊ាន-កូរ៉េ ក្នុងតំបន់ស្ដារ និងអភិវឌ្ឍន៍ព្រៃឈើ «បន្ទាយស្រី» ខេត្តសៀមរាប

ចេញ​ផ្សាយ​ ១៨ កញ្ញា ២០២៤ 2741

នៅថ្ងៃទី១៧ ខែកញ្ញា ឆ្នាំ២០២៤ ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ  បានអញ្ជីញដឹកនាំក្រុមការងារ ចុះពិនិត្យគម្រោងព្រៃលំហែកម្សាន្ត និងសួនអាស៊ាន-កូរ៉េ ក្នុងតំបន់ស្ដារ និងអភិវឌ្ឍន៍ព្រៃឈើ «បន្ទាយស្រី» ស្ថិតនៅស្រុកបន្ទាយស្រី និងស្រុកស្វាយលើ ខេត្តសៀមរាប។

ដំណើរចុះពិនិត្យនេះធ្វើឡើងក្នុងគោលបំណងសំខាន់ៗ រួមមាន ពិនិត្យវឌ្ឍនភាពការសាងសង់គម្រោងព្រៃលំហែកម្សាន្ត និងសួនអាស៊ាន-កូរ៉េ សំណេះសំណាលសួរសុខទុក្ខមន្ត្រីរាជការ បុគ្គលិក ដែលកំពុងបម្រើការងារនៅក្នុងតំបន់ និងស្វែងយល់ពីសក្តានុពលសេដ្ឋកិច្ចបន្ថែម ដើម្បីអភិវឌ្ឍគម្រោងព្រៃលំហែកម្សាន្ត និងសួនអាស៊ាន-កូរ៉េនេះ។

ក្នុងដំណើរចុះត្រួតពិនិត្យរបស់ឯកឧត្តមអនុរដ្ឋលេខាធិការ ក៏មានការអញ្ជើញចូលរួមអមដំណើរពីសំណាក់ រដ្ឋបាលព្រៃឈើ លោកនាយកខណ្ឌ-សង្កាត់ រដ្ឋបាលព្រៃឈើខេត្តសៀមរាបផងដែរ។

នាឱកាសនោះ ឯកឧត្តមអនុរដ្ឋលេខាធិការ បានផ្ដល់នូវគោលការណ៍សំខាន់ៗ ក្នុងការជំរុញការអភិវឌ្ឍ ព្រៃលំហែកម្សាន្ត និងសួនអាស៊ាន-កូរ៉េ រួមមាន មានហូប មានស្នាក់នៅ មានកម្សាន្ត ទើបនាំឱ្យមានបាន និងមាននិរន្តរភាព។

គួរជម្រាបថា នាពេលដ៏ឆាប់ខាងមុខនេះ គម្រោងព្រៃលំហែកម្សាន្ត និងសួនអាស៊ាន-កូរ៉េនេះ មានសេវាកម្មជាច្រើន សម្រាប់ផ្តល់ជូនភ្ញៀវទេសចរណ៍ជាតិ និងអន្តរជាតិ រួមមាន សេវាកម្មស្នាក់នៅ សួនលំហែ ប៉មទស្សនាសត្វព្រៃ ផ្លូវជិះកង់ ផ្លូវដើរ ការថតរូបសត្វព្រៃ កន្លែងបោះតង់ កន្លែងតាំងសមាធិ សួនអនុស្សាវរីយ៍ និងកន្លែងសិក្សាស្រាវជ្រាវព្រៃឈើ-សត្វព្រៃ។ គម្រោងព្រៃលំហែកម្សាន្ត និងសួនអាស៊ាន-កូរ៉េ នេះ មានផ្ទៃដីសរុប ១៨៨៨ ហិកតា ដែលស្ថិតនៅក្រោមការសម្របសម្រួលរបស់វិទ្យាស្ថានស្រាវជ្រាវ និងអភិវឌ្ឍន៍ព្រៃឈើ-សត្វព្រៃ នៃរដ្ឋបាលព្រៃឈើ។

ឯកឧត្តមអនុរដ្ឋលេខាធិការ បានណែនាំដល់ក្រុមការងារ ពិសេសមន្ត្រីសង្កាត់ព្រៃឈើ ត្រូវខិតខំប្រឹងប្រែង យកចិត្តទុកដាក់ឱ្យបានខ្ពស់ ប្រកបដោយប្រសិទ្ធភាព មើលថែរក្សាអភិរក្ស ការពារ ទប់ស្កាត់ និងអភិវឌ្ឍព្រៃឈើ-សត្វព្រៃនៅក្នុងតំបន់នេះឱ្យកាន់តែប្រសើរឡើង៕