ឯកឧត្តមអនុរដ្ឋលេខាធិការ ទឹម បូរក្ស អញ្ជើញដឹកនាំកម្លាំងចម្រុះ ចុះល្បាតត្រួតពិនិត្យ និងបង្ក្រាបបទល្មើសនេសាទតាមដងទន្លេមេគង្គ និងការពារសត្វផ្សោតអន្លង់កាំពី ក្នុងខេត្តក្រចេះ

ចេញ​ផ្សាយ​ ១០ កក្កដា ២០២៥ 2348

នៅថ្ងៃទី៩ ខែកក្កដា ឆ្នាំ២០២៥ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តាមការណែនាំពីឯកឧត្តមរដ្ឋលេខាធិការ ហាស់ សារ៉េត ដោយមានការចូលរួមពីអធិការដ្ឋានរដ្ឋបាលជលផលមេគង្គ កម្លាំងនគរបាលការិយាល័យប្រឆាំងបទល្មើសសេដ្ឋកិច្ចខេត្តក្រចេះ ព្រមទាំងសហគមន៍នេសាទ បានប្រើប្រាស់ទូកម៉ាស៊ីនចំនួន៩គ្រឿង  ដោយអ្នកចូលរួមចំនួន២៥នាក់ ចុះល្បាតត្រួតពិនិត្យ និងបង្ក្រាបបទល្មើសនេសាទតាមដងទន្លេមេគង្គ កន្លែងគ្រប់គ្រង និងការពារសត្វផ្សោត អន្លង់កាំពី ជ្រោយបន្ទាយ វឌ្ឍនៈ សន្តាន់ និងតំបន់កោះផ្តៅ លើយន្តការ២៤ម៉ោង/២៤ម៉ោង។

ក្នុងដំណើរនេះ ក្រុមការងារជំនាញបានចុះល្បាត នៅតំបន់ទ្រនាប់ ដោយដកហូតមងពាក់បានចំនួន ១៤ត្បូង ប្រវែង២៨០ម ក្រលា ៣-១៧សម នៅចំណុចភូមិវឌ្ឍនៈ និងអន្លង់ព្រះគោ ឃុំវឌ្ឍនៈ ស្រុកសំបូរ ហើយឧបករណ៍ល្មើសច្បាប់ហាមឃាត់ទាំងអស់ ត្រូវបានដុតបំផ្លាញចោលនៅលើកោះប្រមៀលបាក់ ភូមិវឌ្ឍនៈ ឃុំវឌ្ឍនៈ។
ជាមួយគ្នានេះ ឯកឧត្តមអនុរដ្ឋលេខាធិការ និងក្រុមការងារ ក៏បានជួបសំណេះសំណាល សួរសុខទុក្ខមន្ត្រីជលផលក្រចេះ និងក្រុមឆ្មាំទន្លេ អភិរក្សសត្វផ្សោត សហគមន៍ដើម្បីពង្រឹងការការអនុវត្តន៍ច្បាប់ក្នុងតំបន់គ្រប់គ្រង និងការពារ "សត្វផ្សោតនិងត្រីមេពូជ" ក្រុមឆ្មាំទន្លេតំបន់កាំពីជ្រោយបន្ទាយ(ក្រុមធំទី២) និងឆ្មាំទន្លេតំបន់កណ្តាល(ទល់មុខសំបូរ)ផងដែរ។

ជាចុងបញ្ចប់ ឯកឧត្តមអនុរដ្ឋលេខាធិការ ក៏បានជួបជុំខណ្ឌរដ្ឋបាលជលផលខេត្តក្រចេះ និងឆ្មាំទន្លេ ដើម្បីផ្តាំផ្ញើរសួរសុខទុក្ខពី ឯកឧត្តម ហាស់ សារ៉េត ជាពិសេស ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ត្រូវពង្រឹងការអនុវត្តន៍ច្បាប់ និងកិច្ចការការពារ "សត្វផ្សោត និងត្រីមេពូជ" ដោយសារប្រើយន្តការ២៤ម៉ោង/២៤ម៉ោង៕