ព័ត៌មានផ្សេងៗទៀត
ឯកឧត្តមរដ្ឋមន្រ្តី វេង សាខុន បានអញ្ជើញចូលរួមជាមួយឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម បានចូលរួមក្នុងពិធីផ្សារណាត់បន្លែសុវត្តិភាព
ចេញផ្សាយ ៤ កក្កដា ២០១៨ 4738
នៅទីរួមខេត្តកំពង់ចាមនាព្រឹកថ្ងៃពុធ ៧រោច ខែបឋមាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៤ ខែកក្កដា គ.ស ២០១៨ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ រួមជាមួយឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម បានចូលរួមក្នុងពិធីផ្សារណាត់បន្លែសុវត្តិភាព និងផលិតផលសុវត្តិភាព ក្រោមគម្រោងសាកល្បងលើកដំបូងរបស់រាជរដ្ឋាភិបាលសម្រាប់ការជំរុញផលិតកម្មស្បៀងក្នុងខេត្តគោលដៅចំនួន១១ ដែលបានបោះទុនវិនិយោគចំនួនប្រមាណ២០ លានដុល្លារអាមេរិក ។ ការរៀបចំពិធីផ្សារណាត់បន្លែសុវត្តិភាព និងផលិតផលសុវត្តិភាព នាថ្ងៃនេះឡើងគឺក្នុងគោលបំណងបំផុសឲ្យប្រជាជនទូទៅមានចំណាប់អារម្មណ៍ក្នុងទិញបន្លែដែលមានគុណភាព និងសុវត្តភាព យកទៅបរិភោគ និងបង្ហាញឲ្យអ្នកទទួលទិញដុំយកទៅលក់នៅផ្សារដ៏ទៃ បានទទួលស្គាល់ពីសមត្ថភាពនៃការផលិតបន្លែប្រកបដោយគុណភាព និងសុវត្តភាពរបស់កសិករ ក្នុងខេត្តនេះ។ សូមបញ្ជាក់ថា គម្រោងខាងលើនេះមានគោលបំណងការលើកស្ទួយផលិតផលកសិកម្មជាតិ និងកាត់បន្ថយការនាំចូល ដោយត្រូវបង្កើនការផលិតនូវផលិតផលកសិកម្មប្រកបដោយគុណភាពនិងសុវត្តិភាព និងបង្កើនប្រាក់ចំណូលរបស់កសិករខ្នាតតូច និងមធ្យម ដែលកំពុងមានបញ្ហាប្រឈមនឹងការធ្វើចំណាកស្រុក តាមរយៈ៖ 1) ការបង្វែរទិសដៅនៃការផលិត ពីការអភិវឌ្ឍតាមបែបវិបុលកម្ម ទៅកាន់ការអភិវឌ្ឍតាមបែបប្រពលវប្បកម្ម និងកសិពាណិជ្ជកម្ម 2) ការបញ្ចូលបច្ចេកទេសទំនើបនៃការដាំដុះដំណាំ ការប្រើប្រាស់ពូជដំណាំ ការពង្រីកសមត្ថភាពដាំដុះលើផ្ទៃដីដែលមានស្រាប់ និងការផលិតនូវផលិផលកសិកម្មប្រកបដោយគុណភាព និងសុវត្តិភាព 3) ការបញ្ចូលបច្ចេកទេសស្រោចស្រពដំណក់ទឹក 4) ការកែលម្អរចនាសម្ព័ន្ធខ្សែចង្វាក់ផលិតកម្មក្នុងការផលិត 5) ការផលិតតាមគោលការណ៍នៃការអនុវត្តកសិកម្មល្អ 6) ការផ្តល់នូវចំណេះដឹងដល់កសិករក្នុងការផលិត វេចខ្ចប់ ស្របតាមស្តង់ និងតម្រូវការទីផ្សារ។ លើសពីនេះទៀត គម្រោងសាកល្បងនេះបាន និងកំពុងចូលរួមចំណែកក្នុងការផ្តល់ជាចក្ខុវិស័យ និងការរៀបចំកសាងគោលនយោបាយជាយុទ្ធសាស្រ្តក្នុងការអភិវឌ្ឍវិស័យកសិកម្មជាតិ សម្រាប់ឆ្នាំ ២០១៩ ដល់ឆ្នាំ២០៣០ ដែលត្រូវប្រែក្លាយកសិកម្មកម្ពុជាទៅជាកសិកម្ម ទំនើប មានលក្ខណៈប្រគួតប្រជែង បរិយាប័ន្ន ធន់នឹងការប្រែប្រួលអាកាសធាតុ និងនិរន្តភាព ដែលនាំដល់ការកើនឡើងនៃប្រាក់ចំណូលគ្រួសារកសិករស្របតាមកំណើនសេដ្ឋកិច្ច ប្រកបដោយវិបុលភាព និងសុខមាលភាពរបស់ប្រជាពលរដ្ឋកម្ពុជា ។
