Other News
ឯកឧត្ដម យ៉ង សាំងកុមារ និងឯកឧត្ដម ឃុន សាវឿន អញ្ជើញជាអធិបតីភាពក្នុងពិធីបើក និងបិទវគ្គបណ្តុះបណ្តាល ការពង្រឹងសមត្ថភាពដល់មន្រ្តីកសិកម្មឃុំ ស្ដីពី «ការត្រៀមបង្ការគ្រោះមហន្តរាយក្នុងវិស័យកសិកម្ម» នៅខេត្តសៀមរាប
ចេញផ្សាយ ២២ មករា ២០២៦ 1649
នៅថ្ងៃទី២១ ខែមករា ឆ្នាំ២០២៦ ក្រសួងកសិកម្ម រុក្ខាប្រមាញ់ និងនេសាទ បានរៀបចំវគ្គបណ្ដុះបណ្ដាល «ការពង្រឹងសមត្ថភាពដល់មន្ត្រីកសិកម្មឃុំ ស្តីពី «ការគ្រប់គ្រងគ្រោះមហន្តរាយក្នុងវិស័យកសិកម្ម» នៅក្នុងខេត្តសៀមរាប ក្រោមអធិបតីភាពឯកឧត្ដមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកឧត្ដមរដ្ឋលេខាធិការ ឃុន សាវឿន ទទួលបន្ទុកដឹកនាំអភិវឌ្ឍន៍ការងារកសិកម្ម រុក្ខាប្រមាញ់ និងនេសាទខេត្តសៀមរាប។
វគ្គបណ្តុះបណ្តាលនេះ រៀបចំឡើងក្នុងគោលបំណង ពង្រឹងសមត្ថភាព ដល់មន្ត្រីកសិកម្មឃុំ-សង្កាត់ លើការងារសំខាន់ៗមានដូចជា៖ ការត្រៀមបង្ការ និងតាមដានគ្រោះមហន្តរាយ ការប្រមូលទិន្នន័យ និងរាយការណ៍អំពីគ្រោះមហន្តរាយក្នុងឃុំគោលដៅ ការកសាងសមត្ថភាពគាំទ្រកសិករក្នុងការត្រៀមបង្ការ និងបន្ធូរបន្ថយផលប៉ះពាល់ពីគ្រោះមហន្តរាយ។
ថ្លែងក្នុងពិធីបើកវគ្គបណ្តុះបណ្តាល ឯកឧត្ដម ឃុន សាវឿន បានគូសបញ្ជាក់អំពីកម្មវិធីគោលនយោបាយអាទិភាពទី៥ និងទី៦ របស់រាជរដ្ឋាភិបាល នីតិកាលទី៧ ជូនអង្គពិធី។ បន្ថែមពីនេះ ឯកឧត្តមរដ្ឋលេខាធិការ បានណែនាំឱ្យមន្ត្រីកសិកម្មឃុំ យកចិត្តទុកដាក់ស្តាប់បទបង្ហាញរបស់គ្រូឧទ្ទេស ដើម្បីទទួលបានចំណេះដឹងថ្មីៗ និងបទពិសោធន៍ល្អៗ សម្រាប់អភិវឌ្ឍន៍សមត្ថភាព និងយកទៅបម្រីការងារ ជួយដល់បងប្អូនប្រជាកសិករក្នុងមូលដ្ឋានឱ្យកាន់តែមានប្រសិទ្ធភាព និងចំគោលដៅ។
សម្រាប់ពិធីបិទវគ្គបណ្តុះបណ្តាល ឯកឧត្ដមបណ្ឌិត យ៉ង សាំងកុមារ បានអញ្ជើញបិទវគ្គបណ្តុះបណ្ដាល និងផ្ដល់មតិណែនាំដល់មន្រ្តីកសិកម្មឃុំ ឱ្យខិតខំចងក្រងទិន្នន័យ បន្តសហការ និងធ្វើជាមន្រ្តីគំរូជួយដល់មូលដ្នាន យកចិត្តទុកដាក់ តាមដានជាប្រចាំ នូវសភាពការណ៍នានា ពាក់ព័ន្ធនឹងគ្រោះមហន្តរាយ រួមមាន៖ ទឹកជំនន់ គ្រោះរាំងស្ងួត ជំងឺសត្វ សត្វល្អិតបំផ្លាញដំណាំ និងតម្លៃកសិផល។ ទន្ទឹមនឹងនេះ ឯកឧត្ដមរដ្ឋលេខាធិការ បានសង្កត់ធ្ងន់លើការរាយការណ៍ព័ត៌មានឱ្យបានទាន់ពេលវេលា ដើម្បីឱ្យការអន្តរាគមន៍នានា មានប្រសិទ្ធភាព និងប្រសិទ្ធផលខ្ពស់៕
