ឯកឧត្តមរដ្ឋមន្រ្តី វេង សាខុន បានអនុញ្ញាតលោក អ៊ុង គីគុង នាយកផ្នែកលក់នៃក្រុមហ៊ុនស្រាបៀរអង្គរខេមប្រូ (CAMBREW LTD) និង ចូលជួបសម្តែងការគួរសម និងពិភាក្សាការងារ

ចេញ​ផ្សាយ​ ៦ មេសា ២០១៨ 4069

 នាព្រឹកថ្ងៃច័ន្ទ ០៦រោច ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៧ ខែមីនា គ.ស ២០១៨ នៅនៅទីស្តីការក្រសួងឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានអនុញ្ញាតលោក អ៊ុង គីគុង នាយកផ្នែកលក់នៃក្រុមហ៊ុនស្រាបៀរអង្គរខេមប្រូ (CAMBREW LTD) និងសហការីចូលជួបសម្តែងការគួរសមនិងជូនពរឆ្នាំថ្មី។ មានប្រសាសន៍ក្នុងជំនួបនេះ ឯកឧត្តមរដ្ឋមន្រ្តីបានសម្តែងនូវអំណរគុណយ៉ាងជ្រាលជ្រៅជូនចំពោះក្រុមហ៊ុនដែលបានដាក់ទុនវិនិយោគក្នុងព្រះរាជាណាចក្រកម្ពុជា។ ការវិនិយោគនេះបានជួយជំរុញកំណើនសេដ្ឋកិច្ចជាតិ ពិសេសសេដ្ឋកិច្ចគ្រួសារតាម រយៈការបង្កើតការងារជូនបងប្អូនប្រជាពលរដ្ឋនៅនិងកន្លែង និងក្មួយៗនិស្សិតដែលបានបញ្ចប់ការសិក្សាពីសាកលវិទ្យាល័យថ្មីៗ ហើយសកម្មភាពនេះគឺបានឆ្លើយតបទៅនឹងគោលនយោបាយរបស់រាជរដ្ឋាភិបាលស្តីពីយុទ្ធសាស្រ្តអភិវឌ្ឍវិស័យធនធានមនុស្ស។ នាឱកាសនេះលោកអ៊ុង គីគុង បានជម្រាបជូនឯកឧត្តមរដ្ឋមន្រ្តីជ្រាបថាបច្ចុប្បន្នក្រុមហ៊ុនមានបុគ្គលិកបម្រើការគ្រប់កម្រិតថ្នាក់ចំនួនជាង ២ពាន់នាក់ ជារៀងរាល់ឆ្នាំក្រុមហ៊ុនបានផ្តល់អាហារូបករណ៍ដល់និស្សិតចំនួន ១០០នាក់គ្រប់ជំនាញ ដែលគិតមកទល់បច្ចប្បន្នមាននិស្សិត ៥ ជំនាន់ហើយស្នើនិង ៥០០ នាក់។ គិតមកទល់បច្ចុប្បន្នក្រុមហ៊ុនបាននាំផលិតផលស្រាបៀរអង្គរដែលជាផលិតផលស្រាបៀររបស់កម្ពុជាដំបូងគេបង្អស់ទៅកាន់ ១២ ប្រទេស រួមទាំងទីផ្សារប្រទេសចិនផងដែរ។ មានមតិណែនាំដល់ក្រុមហ៊ុនឯកឧត្តមរដ្ឋមន្រ្តី ស្នើសុំឲ្យក្រុមហ៊ុនពិនិត្យពិចារណាលប្រើប្រាស់វត្ថុធាតុដើមក្នុងស្រុកឲ្យអស់លទ្ធភាពប្រយោជន៍ដើម្បីកាត់បន្ថយបរិមាណនាំចូលពីបរទេសនេះម៉្យាង ម៉្យាងទៀតគឺជួយគាំទ្រផលិតផលកសិកម្មក្នុងស្រុក។ ឯកឧត្តមរដ្ឋមន្រ្តីស្នើសុំឲ្យក្រុមហ៊ុនសហការជាមួយវិស័យឯកជន ដោយអនុវត្តគោលការណ៍នៃការធ្វើកសិកម្មតាមកិច្ចសន្យា ចៀសវាងនាំចូលវត្ថុធាតុដើមសម្រាប់ក្រុមហ៊ុន និងទុកដីឲ្យនៅទំនេរចោលដោយមិនបានទាញយកប្រយោជន៍។ អនាគត ឯកឧត្តមរដ្ឋមន្រ្តីថានឹងគ្រោងរៀបចំកិច្ចប្រជុំមួយរវាងក្រុមហ៊ុនផលិត ឬកែច្នៃ ជាមួយអ្នកវិនិយោគដើម្បីសិក្សាពីលទ្ធភាពផលិតវត្ថុធាតុដើមដែលរោងចក្រត្រូវការ ហើយនេះក៏ជាឱកាសសម្រាប់ភាគីពាក់ព័ន្ធទាំងអស់ចែករំលែកបទពិសោធន៍ និងសិក្សាពីចំណុចខ្លាំងនិងចំណុចខ្សោយ រួចដាក់ចេញនូវយន្តការអនុវត្តជាក់ស្តែងមួយសម្រាប់គ្រប់ភាគីយកទៅអនុវត្តឲ្យទទួលបានជោគជ័យ។