ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម បានអញ្ជើញចូលរួមកិច្ចប្រជុំក្រុមការងារពាណិជ្ជកម្ម និងវិនិយោគ ជាមួយសហភាពអឺរ៉ុប នៅប្រទេសប៊ែលហ្សិក

ចេញ​ផ្សាយ​ ២៤ មេសា ២០២៤ 2146

នៅថ្ងៃទី២២ ខែមេសា ឆ្នាំ២០២៤ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងសហការី បានអញ្ជើញចូលរួមក្នុងកិច្ចប្រជុំក្រុមការងារពាណិជ្ជកម្ម និងវិនិយោគ ជាមួយសហភាពអឺរ៉ុប នៅទីក្រុងប្រ៊ុចសែល ប្រទេសប៊ែលហ្សិក។ 

កិច្ចប្រជុំនេះធ្វើឡើងក្នុងគោលបំណងពិនិត្យ និងពិភាក្សាលើវឌ្ឍនភាពនៃការធ្វើពាណិជ្ជកម្មនៃភាគីកម្ពុជា និងសហភាពអឺរ៉ុប និងដោះស្រាយនូវបញ្ហាមួយចំនួនដែលពាក់ព័ន្ធនឹងការធ្វើពាណិជ្ជកម្មកន្លងមក។ 

ឯកឧត្តម ប្រាក់ ដាវីដ បញ្ជាក់ថា អង្គប្រជុំបានពិនិត្យ និងពិភាក្សាលើភាពអនុគ្រោះនៃការធ្វើពាណិជ្ជកម្មរបស់កម្ពុជា ការពិភាក្សាលើទិដ្ឋភាពនៃការវិនិយោគនៅកម្ពុជា ការបើកទីផ្សារ និងបរិស្ថាននៃការធ្វើពាណិជ្ជកម្មរវាងភាគីទាំងពីរ រួមទាំងពិនិត្យលើក្របខណ្ឌនៃកិច្ចសហប្រតិបត្តិការបច្ចេកទេស និងកិច្ចសហការផ្នែកឯកជនក្នុងការធ្វើពាណិជ្ជកម្មនៃភាគីទាំងពីរ។

ក្រៅពីនេះ អង្គប្រជុំក៏បានពិនិត្យ និងពិភាក្សាលើកិច្ចសហការក្នុងកម្រិតតំបន់អាស៊ាន និងសហភាពអឺរ៉ុប ដោយពិនិត្យមើលលើវឌ្ឍនភាពការអនុវត្ត ASEAN Integration and Regional Agreement in the Asia-Pacific Region និងធ្វើបច្ចុប្បន្នភាពនៃការវិវត្តទំនាក់ទំនងពាណិជ្ជកម្មក្នុងតំបន់អាស៊ាន-សហភាពអឺរ៉ុប ក៏ដូចជាធ្វើបច្ចុប្បន្នភាពអំពីការវិវត្តទូទៅនៃការធ្វើពាណិជ្ជកម្មពិភពលោកនាពេលបច្ចុប្បន្ន៕