ឯកឧត្តមរដ្ឋលេខាធិការ ហ៊ាន វណ្ណហន អញ្ជើញជាអធិបតីដឹកនាំកិច្ចប្រជុំគណៈកម្មការដឹកនាំគម្រោងប្រកួតប្រជែងខ្សែច្រវាក់តម្លៃ និងលើកកម្ពស់សុវត្ថិភាពកសិកម្ម លើកទី៣

ចេញ​ផ្សាយ​ ១៥ កញ្ញា ២០២៥ 891

នៅថ្ងៃទី១៥ ខែកញ្ញា ឆ្នាំ២០២៥ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកឧត្តម ប៉ែន ធីរុង្គ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ សហប្រធានគណៈកម្មការដឹកនាំគម្រោងប្រកួតប្រជែងខ្សែច្រវាក់តម្លៃ និងលើកកម្ពស់សុវត្ថិភាពកសិកម្ម (Agricultural Value Chain Competitiveness and Safety Enhancement Project-ACSEP) បានអញ្ជើញដឹកនាំកិច្ចប្រជុំគណៈកម្មការដឹកនាំគម្រោងលើកទី៣ រៀបចំឡើងដោយអង្គភាពគ្រប់គ្រងគម្រោង (PMU) នៃគម្រោង ACSEP នៅសណ្ឋាគារ Sun & Moon Riverside។
កិច្ចប្រជុំនេះ មានការអញ្ជើញចូលរួមពី ឯកឧត្តមបណ្ឌិត សរ ចិត្រា អគ្គលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង រួមជាមួយនឹងឯកឧត្តម លោកជំទាវ លោក លោកស្រី ជាសមាជិក សមាជិកានៃគណ:កម្មការដឹកនាំគម្រោង។ 
នាឱកាសនោះដែរ ក៏មានការអញ្ជើញចូលរួមពីឯកឧត្តម លោកជំទាវ លោក លោកស្រី មកពីអង្គភាពអនុវត្តគម្រោងនៃក្រសួងសេដ្ឋកិច្ច និងហិរញ្ញវត្ថុ និងក្រសួងអភិវឌ្ឍន៍ជនបទ ព្រមទាំងតំណាងធនាគារដៃគូ អគ្គនាយកដ្ឋានសហប្រតិបត្តិការអន្តរជាតិ និងគ្រប់គ្រងបំណុលនៃក្រសួងសេដ្ឋកិច្ច និងហិរញ្ញវត្ថុ ក្រុមទីប្រឹក្សាគាំទ្រការអនុវត្តគម្រោង (Project Implementing Consultant) ក្រុមទីប្រឹក្សាគាំទ្របច្ចេកទេស AVCC និងអង្គភាពអនុវត្តគម្រោងនៃមន្ទីរកសិកម្ម រុក្ខាប្រមាញ់ និងនេសាទខេត្តគោលដៅ សរុបចំនួន ៨៣នាក់ (ស្រ្ដី ១៨នាក់)។ 
អង្គប្រជុំបានពិនិត្យ និងពិភាក្សាយ៉ាងផុលផុសលើលទ្ធផលនៃការអនុវត្តសកម្មភាពក្នុងឆ្នាំ២០២៥ និងពិនិត្យអំពីបញ្ហាប្រឈមនានា និងលើកជាដំណោះស្រាយសំដៅលើកកម្ពស់ការអនុវត្តសកម្មភាពប្រកបដោយប្រសិទ្ធភាព និងប្រសិទ្ធផល។ បន្ថែមពីនេះទៀត អង្គប្រជុំក៏បានពិនិត្យ និងឯកភាពលើផែនការសកម្មភាព និងថវិកាសម្រាប់ឆ្នាំ២០២៦ ផងដែរ៕