ឯកឧត្តមរដ្ឋមន្ត្រីបានអញ្ជើញមកពិនិត្យកសិដ្ឋានចិញ្ចឹមទាយកស៊ុតរបស់ លោក ចាប ប៊ុនហន នៅភូមិត្របែក ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ

ចេញ​ផ្សាយ​ ២២ កក្កដា ២០១៩ 4590

កម្មវិធីទី៧ ៖ ខេត្តបន្ទាយមានជ័យ

ក្នុងដំណើរបេសកកម្មពិនិត្យការងារបង្កបង្កើនផង និងស្ថាន ភាពរាំងស្ងួតនៅបណ្តាខេត្តជុំវិញបឹងទន្លេសាប ឯកឧត្តមរដ្ឋមន្ត្រីបានអញ្ជើញមកពិនិត្យកសិដ្ឋានចិញ្ចឹមទាយកស៊ុតរបស់ លោក ចាប ប៊ុនហន នៅភូមិត្របែក ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ។

កសិដ្ឋាននេះបានបង្កើតឡើងតាំងពីឆ្នាំ ១៩៩៨ ដោយចាប់ផ្តើមចិញ្ចឹមមានតែ ៣០០ក្បាលតែប៉ុណ្ណោះ។ ដោយមុខរបរនេះទទួលបានការគាំទ្រជាបន្តបន្ទាប់ រហូតបច្ចប្បន្នបានពង្រីកផ្ទៃដីកសិដ្ឋានបានដល់ ១០ហត និងមានមេទាជាង ៥ម៉ីនក្បាល អាចផ្តល់ស៊ុតបានប្រមាណជា ៣ម៉ីនស៊ុតក្នុង ១ថ្ងៃ សម្រាប់ផ្គត់ផ្គង់ទូទាំងខេត្តបន្ទាយមានជ័យ ខេត្តសៀមរាប និងខេត្តបាត់ដំបង។ ពាក់ព័ន្ធនឹងតម្លៃបោះដុំ ក្នុងថ្ងៃនេះសម្រាប់ស៊ុតលេខ១ គឺទទួលបាន ៣៨០រៀល ក្នុង ១គ្រាប់ និងលេខ២ ទទួលបាន ៣៤០រៀល ក្នុង ១គ្រាប់ ដែលគាត់បានបញ្ជាក់ថា ជាតម្លៃមួយសមរម្យ និងអាចផ្តល់ឱកាសជូនគាត់ទទួលបានប្រាក់ចំណេញសមស្របសម្រាប់ចិញ្ចឹមគ្រួសារ និងបន្តការពង្រីក។

ឯកឧត្តមរដ្ឋមន្ត្រីបានធ្វើការវាយតម្លៃខ្ពស់ចំពោះការវិវឌ្ឍន៍រីកចម្រើន និងឆន្ទៈតស៊ូពង្រីករបបនេះកាន់តែធំឡើងៗ ហើយលោកក៏បានណែនាំដល់មន្ទីរខេត្តបន្ទាយមានជ័យ និងមន្ត្រីជំនាញផលិតកម្មសត្វ និងសុខភាពសត្វបន្តផ្តល់ការគាំទ្រដល់គាត់ និងកសិដ្ឋានដទៃទូទាំងខេត្តនូវបច្ចេកទេសចិញ្ចឹមថ្មីៗ និងការងារអនាម័យ ធ្វើយ៉ាងណាបង្កើនគុណភាព និងធានាបាននូវសុខភាពជូនសាធារណៈ។ មួយវិញទៀត មន្ត្រីជំនាញត្រូវសហការជាមួយពួកគាត់ក្នុងការបង្កើតកន្លែងភ្ញាស់ស៊ុតមកចិញ្ចឹម ដើម្បីកាត់បន្ថយការនាំចូលពីក្រៅ។