ព័ត៌មានផ្សេងៗទៀត
ឯកឧត្តមរដ្ឋលេខាធិការ ហាស់ សារ៉េត អញ្ជើញដឹកនាំក្រុមការងារចុះពិនិត្យសកម្មភាពប្រមូលទិញត្រីរបស់សមាគមអ្នកផ្គត់ផ្គង់ត្រីកម្ពុជា នៅភូមិដំណាក់អំពិល ខេត្តកំពង់ចាម
ចេញផ្សាយ ២ មេសា ២០២៥ 2782
នៅថ្ងៃទី១ ខែមេសា ឆ្នាំ២០២៥ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មការចំពោះកិច្ចទ្រទ្រង់វិស័យវារីវប្បកម្មកម្ពុជា បានអញ្ជើញដឹកនាំក្រុមការងារចុះពិនិត្យសកម្មភាពប្រមូលទិញត្រីរបស់សមាគមអ្នកផ្គត់ផ្គង់ត្រីកម្ពុជា និងស្វែងយល់ពីដំណើរការចិញ្ចឹមត្រីរបស់វារីវប្បករ នៅភូមិដំណាក់អំពិល ឃុំស្ដើងជ័យ ស្រុកជើងព្រៃ ខេត្តកំពង់ចាម។
ដំណើរនេះ មានការចូលរួមអមដំណើរពី ឯកឧត្តម ទឹម បូរក្ស អនុរដ្ឋលេខាធិការ រួមជាមួយលោកបណ្ឌិត ខូវ គួង អនុប្រធានរដ្ឋបាលជលផល ប្រធានសមាគមអ្នកផ្គត់ផ្គង់ត្រីកម្ពុជា និងក្រុមការងារនៃសហគមន៍កសិកម្ម កសិករសែនជ័យ។
បើតាមឯកឧត្តមរដ្ឋលេខាធិការ កសិដ្ឋាននេះ ទើបបានចាប់ផ្តើមចិញ្ចឹមត្រីក្នុងឆ្នាំទី១ ដែលជាមុខរបរបន្ថែមថ្មី ទទួលបានការគាំទ្រឧបច្ចេកទេសនិងទុនពីសហគមន៍កសិកម្ម កសិករសែនជ័យ ដោយបានដំណើរការចិញ្ចឹមដោយរលូន ទទួលបានផលត្រីដែលមានគុណភាព និងតម្លៃសមរម្យ អាចឱ្យគាត់ទទួលបានប្រាក់ចំណេញសម្រាប់បំពេញនូវតម្រូវការជីវភាពគ្រួសារ។
ម្ចាស់កសិដ្ឋាន មានក្ដីសប្បាយរីករាយដែលថ្នាក់ដឹកនាំ និងមន្ត្រីនៃក្រសួងកសិកម្ម រុក្ខាប្រមញ់ និងនេសាទ បានយកចិត្តទុកដាក់ជួយដល់វារីវប្បករ ទាំងផ្នែកបច្ចេកទេស ដើមទុន និងទីផ្សារផងដែរ។ ជាមួយគ្នានេះ លោកស្រីនាង សុវណ្ណារី ប្រធានសមាគមអ្នកផ្គត់ផ្គង់ត្រីនៅកម្ពុជាបានបញ្ជាក់ថា ក្រុមការងាររបស់សមាគម មានសកម្មភាពប្រមូលទិញត្រីគ្រប់ប្រភេទ តាមបណ្តាខេត្តទូទាំងប្រទេស ដើម្បីផ្គត់ផ្គង់ទីផ្សារក្នុងស្រុកផង និងលើកកម្ពស់មុខរបររបស់វារីវប្បករផង។
ជាទីបញ្ចប់ ក្រុមការងារ បានបន្តចុះពិនិត្យនិងស្វែងយល់សកម្មភាពរបស់សហគមន៍ កសិករសែនជ័យ ដែលបានជួយដល់កសិករដែលជាសមាជិក ធ្វើការចិញ្ចឹមត្រីនិងដាំបន្លែក្នុងផ្ទះសំណាញ់ទទួលបានលទ្ធផលល្អ ធ្វើឱ្យសមាជិកក្នុងសហគមន៍មានមុខរបរ ការងារ និងជីវភាពរស់នៅប្រសើរឡើងជាបន្តបន្ទាប់៕
