ដំណើរទស្សនៈកិច្ចរបស់គណៈប្រតិភូជប៉ុន មកកាន់សិប្បកម្មកែច្នៃគ្រាប់ស្វាយចន្ទី ជ័យ សំបូរ

ចេញ​ផ្សាយ​ ២៥ ឧសភា ២០២៣ 26707

ថ្ងៃព្រហស្បតិ៍ ៦កើត ខែជេស្ឋ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី២៥ ខែឧសភា ឆ្នាំ២០២៣ ដោយទទួលបានការអនុញ្ញាតពីលោកបណ្ឌិត ចាយ ជីម ប្រធាននាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ លោក ហាស់ ពិសិទ្ធ អនុប្រធាននាយកដ្ឋានកសិ-ឧស្សាហកម្ម បានបន្តដឹកនាំក្រុមការងារបច្ចេកទេសរបស់នាយកដ្ឋានដើម្បីចូលរួមសម្របសម្រួលដំណើរទស្សនៈកិច្ចរបស់គណៈប្រតិភូជប៉ុន ដឹកនាំដោយលោក SHIMADA KAZUICHI, CEO របស់ក្រុមហ៊ុន MIRARTH HOLDINGS មកកាន់សិប្បកម្មកែច្នៃគ្រាប់ស្វាយចន្ទី ជ័យ សំបូរ ដែលមានទីតាំងស្ថិតនៅស្រុកកំពង់ស្វាយ ខេត្តកំពង់ធំ តាមរយៈក្រុមហ៊ុន Top Planning Japan។
ក្នុងដំណើរទស្សនៈកិច្ចនេះ ក៏មានការទទួលស្វាគមន៍យ៉ាងកក់ក្តៅពី ឯកឧត្តម ជា វណ្ណច័ន្ទ អភិបាលរង នៃគណៈអភិបាលខេត្តកំពង់ធំ លោក ប៉ែន វណ្ណារិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ អភិបាលនៃគណៈអភិបាលស្រុកកំពង់ស្វាយ តំណាងសភាពាណិជ្ជកម្មខេត្តកំពង់ធំ អនុប្រធានសមាគមស្វាយចន្ទីកម្ពុជា មន្ត្រីរាជការសាលាខេត្ត រួមជាមួយប្រជាកសិករដាំស្វាយចន្ទីចូលរួមយ៉ាងច្រើនកុះករ។
គួររំលឹកផងដែរថា ក្រុមហ៊ុន MIRARTH HOLDINGS ជាក្រុមហ៊ុនវិនិយោគដ៏ធំមួយដែលមកពីប្រទេសជប៉ុនលើការផលិតថាមពល និងថែរក្សាបរិស្ថាន និងបានចាប់ដៃគូរសហការជាមួយក្រុមហ៊ុន Top Planning Japan លើវិស័យស្វាយចន្ទីកម្ពុជាឱ្យកាន់តែប្រសើរឡើងទាំងសមត្ថភាពផលិត និងការនាំចេញទៅទីផ្សារជប៉ុន កូរ៉េ ចិន និងអ៊ឺរ៉ុបជាដើម។ ការសហការគ្នារវាងក្រុមហ៊ុនទាំងពីរ នឹងបង្កើនសមត្ថភាពនៃការប្រមូលទិញគ្រាប់ចន្ទីស្រស់ពីកសិករ ក្នុងគោលបំណងកែច្នៃគ្រាប់ស្វាយចន្ទីដែលមានគុណភាពលេខ១សម្រាប់នាំចេញ រួមទាំងការកែច្នៃទៅលើសំបកគ្រាប់ចន្ទីជាប្រេងឥន្ធនៈដែលមានគុណភាពខ្ពស់ផងដែរ។
ដោយយោងលើតួនាទីភារកិច្ចដែលមាន មន្ត្រីបច្ចេកទេសរបស់នាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ នឹងបន្តចូលរួមក្នុងការជួយសម្របសម្រួលជាបច្ចេកទេសដល់ក្រុមហ៊ុន Top Planning Japan និងសិប្បកម្មកែច្នៃគ្រាប់ស្វាយចន្ទី ជ័យ សំបូរ លើការងារកិច្ចសន្យាផលិតកម្មកសិកម្ម ស្តង់ដារកែច្នៃ និងការវិភាគគុណភាព សុវត្ថិភាព ដើម្បីទទួលបានគ្រាប់ស្វាយចន្ទីប្រកបដោយគុណភាពខ្ពស់ លើកកម្ពស់ស្តង់ដារគុណភាព សុវត្ថិភាពសម្រាប់ការនាំចេញទាំងទីផ្សារក្នុងស្រុក និងក្រៅស្រុកផងដែរ។