ព័ត៌មានផ្សេងៗទៀត
ឯកឧត្តមរដ្ឋលេខាធិការ ប្រាក់ ដាវីដ ចុះពិនិត្យច្បារពូជ និងចម្ការពិសោធន៍ម៉ូណូក្លូននៃក្លូនកៅស៊ូកម្ពុជា CRRI 12 និង CRRI 19
ចេញផ្សាយ ៤ ធ្នូ ២០២៤ 4873
នាថ្ងៃទី៣ ខែធ្នូ ឆ្នាំ២០២៤ ឯកឧត្តម ប្រាក់ ដាវីដ រដ្ឋលេខាធិការ បានអញ្ជើញចុះពិនិត្យច្បារពូជក្លូនកៅស៊ូកម្ពុជា CRRI 12 និង CRRI 19 របស់វិទ្យាស្ថានស្រាវជ្រាវកៅស៊ូកម្ពុជា ស្ថិតក្នុងភូមិសាស្ត្រខេត្តត្បូងឃ្មុំ។ បេសកកម្មនេះ មានការចូលរួមផងដែរ ពីសំណាក់លោកជំទាវ អ៊ឹម រចនា អនុរដ្ឋលេខាធិការ លោក ឃុន កក្កដា អគ្គនាយកស្តីទីនៃអគ្គនាយកដ្ឋានកៅស៊ូនិងសហការី លោក ផេន ភារុន នាយករងវិទ្យាស្ថានស្រាវជ្រាវកៅស៊ូកម្ពុជា និងសហការី។
គួរកត់សម្គាល់ថា វិទ្យាស្ថានស្រាវជ្រាវកៅស៊ូកម្ពុជា បានយកចិត្តទុកដាក់ដល់ការស្រាវជ្រាវបង្កាត់ពូជកៅស៊ូ សំដៅបង្កើតនូវក្លូនកៅស៊ូកម្ពុជាដែលមានសក្តានុពល បន្ស៊ាំនឹងបម្រែបម្រួលអាកាសធាតុ មានទិន្នផលខ្ពស់ និងលូតលាស់ល្អសមស្របនឹងលក្ខណ្ឌបរិស្ថាននៃប្រទេសកម្ពុជា។
ពូជកៅស៊ូកម្ពុជាចំនួន២ គឺ CRRI 12 និង CRRI 19 ដែលឯកឧត្តមរដ្ឋលេខាធិការអញ្ជើញពិនិត្យនាពេលនេះ ប្រសូត្រចេញពីការសិក្សាស្រាវជ្រាវ និងឆ្លងកាត់ការធ្វើពិសោធនៅលើស្ថានីយ៍ពិសោធន៍នៃវិទ្យាស្ថានស្រាវជ្រាវកៅស៊ូកម្ពុជា អស់រយៈពេល១៤ឆ្នាំ តាមរយៈកិច្ចសហប្រតិបត្តិការជិតមួយទសវត្សរ៍ រវាងវិទ្យាស្ថានស្រាវជ្រាវកៅស៊ូកម្ពុជា និងមជ្ឍមណ្ឌលសហប្រតិបត្តិការស្រាវជ្រាវអន្តរជាតិដើម្បីអភិវឌ្ឍន៍កសិកម្ម (CIRAD)។
នៅឆ្នាំ២០២៤ នេះ វិទ្យាស្ថានស្រាវជ្រាវកៅស៊ូកម្ពុជា បានទទួលវិញ្ញាបនបត្របញ្ចេញប្រភេទពូជដំណាំពីក្រសួងកសិកម្ម រុក្ខាប្រមាញ់ និងនេសាទ លើក្លូនកៅស៊ូកម្ពុជាទាំងពីរ ដើម្បីបញ្ចេញឱ្យប្រើប្រាស់ជាផ្លូវការ៕
