ពិធីបិទវគ្គបណ្តុះបណ្តាលស្តីពី ការគ្រប់គ្រងសុវត្ថិភាពចំណីអាហារ និងបច្ចេកទេសខ្សែសង្វាក់ផលិតកម្ម​ផលិតផល​កសិកម្មទំនើបនៅប្រទេសកម្ពុជាឆ្នាំ២០១៨

ចេញ​ផ្សាយ​ ១១ មិថុនា ២០១៨ 21808

នៅព្រឹកថ្ងៃសុក្រ ៣រោច ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០១ ខែមិថុនា ឆ្នាំ២០១៨ នាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ បានរៀបចំពិធីបិទវគ្គបណ្តុះបណ្តាលស្តីពី ការគ្រប់គ្រងសុវត្ថិភាពចំណីអាហារ និងបច្ចេកទេស​ខ្សែសង្វាក់​ផលិតកម្មផលិត​ផលកសិកម្ម​ទំនើបនៅប្រទេសកម្ពុជាឆ្នាំ២០១៨ ក្រោមអធិបតីភាព លោក គង់ ភាជ ប្រធាននាយកដ្ឋានកសិ-ឧស្សាហកម្ម និងលោកស្រី LUO YANQIN នាយកនៃវិទ្យាស្ថានជាតិចិនស្រាវជ្រាវ លើឧស្សាហកម្មអាហារ និងអាហារឡើងមេ។ ក្នុងនោះដែរលោកស្រី LUO YANQIN បាន​មានមតិស្វាគមន៍ និងថ្លែងអំណរគុណចំពោះថ្នាក់ដឹកនាំនាយកដ្ឋានកសិ-ឧស្សាហកម្ម និងអ្នកសម្របសម្រួល​ក្នុងវគ្គបណ្តុះបណ្តាលនេះ ដែលបាន​យកចិត្តទុកដាក់​ក្នុងការរៀបចំវគ្គ​បណ្តុះបណ្តាលនេះឡើង​ប្រកប​​ដោយ​​ជោគជ័យ លើសពីនេះទៅទៀត​លោកស្រីនាយក ក៏បានថ្លែងអំណរ​គុណ​ដល់​សិក្ខាកាមទាំងមូល​ដែលបានយកចិត្ត​​ទុកដាក់ក្នុងការសិក្សារៀនសូត្រ ដើម្បីបង្កើនចំណេះដឹងបន្ថែម និងទទួលនូវ​បទពិសោធន៍​ល្អៗយក​មក​អនុវត្តន៍​​តាមអង្គភាពនីមួយៗ។ លើសពីនេះទៅទៀត លោកប្រធាន គង់ ភាជ បានមានមតិស្វាគមន៍ និងសូមថ្លែង​អំណរគុណ​ដល់វិទ្យាស្ថានជាតិ​ចិន​ស្រាវជ្រាវ លើឧស្សាហកម្ម​អាហារ និងអាហារ​ឡើងមេ ជាពិសេសលោកស្រីនាយក និងសហការីទាំងអស់ ដែលបានរៀបចំវគ្គបណ្តុះបណ្តាលនេះឡើង និងថ្លែងអំណរគុណចំពោះក្រសួងពាណិជ្ជកម្មនៃសាធារណរដ្ឋប្រជាមានិតចិន ដែលបានឧបត្ថម្ភ នៅក្នុងវគ្គ ​បណ្តុះបណ្តាល​នេះ ហើយ​លោកប្រធាន​សង្ឃឹមថាភាគីចិននឹងបន្តការសហការ និងមានចំណងមិត្តភាពល្អ រវាងកម្ពុជា-ចិន ដើម្បីរៀបចំអោយមានជាវគ្គបណ្តុះបណ្តាលទាំងក្នុង និងក្រៅ​ប្រទេស ដើម្បីទទួលបានចំណេះដឹង និងបទពិសោធន៍ល្អៗសម្រាប់យកមកអភិវឌ្ឍន៍វិស័យកសិកម្មនៅក្នុងប្រទេសកម្ពុជ។ ជាទីបញ្ចប់លោកប្រធាន​បាន​ជូនពរដល់លោកស្រីនាយក និងសហការីទាំងអស់ ពេលវិលត្រឡប់ទៅកាន់ប្រទេសវិញ សូមអោយជួបតែសំណាងល្អ សុខសុវត្ថិភាព​ក្នុងការ​ហោះហើរ និងទទួលជោគជ័យគ្រប់ភារកិច្ច៕