ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញចុះជួបសំណេះសំណាល សួរសុខទុក្ខដល់មន្រ្តីជំនាញ និងកងកម្លាំងអន្តរាគមន៍ នៅបឹងទន្លេសាប ខេត្តបាត់ដំបង
ចេញផ្សាយ ៨ មីនា ២០២៥ 2708
នៅថ្ងៃទី០៧ ខែមីនា ឆ្នាំ២០២៥ ឯកឧត្តម ប៉ែន ផល្លីកា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោក មិត្រ សុខសុភ័គ្រ នាយអធិការរដ្ឋបាលជលផលខាងត្បូងបឹងទន្លេសាប និងលោក ជួង សុភា នាយខណ្ឌរដ្ឋបាលជលផលបាត់ដំបង បានចុះជួបមន្រ្តីខណ្ឌផ្នែក និងសង្កាត់ និងកងអន្តរាគមន៍ចំណុះឱ្យយោធពលភូមិភាគ៥ ដែលប្រចាំការនៅឃុំកោះជីវាំង ស្រុកឯកភ្នំ ខេត្តបាត់ដំបង។
នាឱកាសនៃកិច្ចសំណេះសំណាល ឯកឧត្តមអនុរដ្ឋលេខាធិការ បានពាំនាំនូវការផ្តាំផ្ញើសួរសុខទុក្ខពីឯកឧត្តមរដ្ឋមន្រ្តី ឌិត ទីណា និងបានថ្លែងអំណរគុណដល់កងកម្លាំងអន្តរាគមន៍ ដែលបានខិតខំពុះពារច្រើនក្នុងការបំពេញកាតព្វកិច្ចទទួលបាននូវលទ្ធផលគួរជាទីមោទនភាព។
ទន្ទឹមនឹងនោះកិច្ចពិភាក្សា បានផ្តោតទៅលើការបង្រ្កាបបទល្មើសជលផល និងជួយអភិរក្សធនធានជលផលដែលសម្បូរណ៍នៅក្នុងភូមិសាស្រ្តខេត្តនេះ។ ឯកឧត្តមក៏បានផ្តល់ឱ្យមានការពិភាក្សាគ្នា ផ្តោះប្តូរមតិយោបល់ទៅវិញទៅមក ដើម្បីស្វែងរកចំណុចវិជ្ជមាន និងបញ្ហាប្រឈមខ្លះៗមួយចំនួន ដើម្បីប្រតិបត្តិការការទប់ស្កាត់បទល្មើសជលផល ក្នុងរដូវបើកនេសាទនេះ។ ក្រុមពិភាក្សាក៏បានឯកភាពគ្នាឱ្យប្រជានេសាទអាចដាក់ក្រឡាអួនទំហំ៣សង់ទីមែត្រ របាំងប្រវែង១០០ម៉ែត្រ និងគន្លាតពីគ្នាចម្ងាយ១០០ម៉ែត្រផងដែរ។
ជាចុងបញ្ចប់ ឯកឧត្តមអនុរដ្ឋលេខាធិការ បានថ្លែងអំណរគុណក្រុមការងារចំពោះបេសកកម្មប្រកបដោយអត្ថន័យឆន្ទៈជាតិ និងតម្កល់ផលប្រយោជន៍ជាតិជាធំ ដើម្បីជួយទប់ស្កាត់បទល្មើស និងអភិរក្សធនធានជលផលក្នុងបឹងទន្លេសាប ដែលជាធនធានដ៏មានតម្លៃមិនអាចកាត់ថ្លៃបាន ហើយមន្រ្តីជំនាញនឹងចូលរួមសហការក្នុងប្រតិបត្តិការនេះឱ្យកាន់តែមានប្រសិទ្ធភាព ប្រកបដោយផ្លែផ្កា៕
