ព័ត៌មានផ្សេងៗទៀត
កិច្ចប្រជុំបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារសម្រាប់ឆ្នាំ២០២៤ របស់នាយកដ្ឋានកសិ-ឧស្សាហកម្ម
ចេញផ្សាយ ៥ មករា ២០២៤ 28335
នាថ្ងៃព្រហស្បតិ៍ ៨រោច ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៤ ខែមករា ឆ្នាំ២០២៤បានរៀបចំកិច្ចប្រជុំ បូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារសម្រាប់ឆ្នាំ២០២៤ របស់នាយកដ្ឋានកសិ-ឧស្សាហកម្ម ក្រោមអធិបតីភាព ឯកឧត្តម អ៊ួង កុសល រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយមានការអញ្ជើញចូលរួមពីឯកឧត្តម ប៉ក់ សម័យសុនីតិ អនុរដ្ឋលេខាធិការ ថ្នាក់ដឹកនាំនាយកដ្ឋានកសិ-ឧស្សាហកម្ម លោក លោកស្រី ជាថ្នាក់ដឹកនាំការិយាល័យនិងមន្ទីរពិសោធន៍ និងមន្រ្តីរាជការនៃនាយកដ្ឋានកសិ-ឧស្សាហកម្ម ព្រមទាំងថ្នាក់ដឹកនាំ និងមន្រ្តីការិយាល័យកសិ-ឧស្សាហកម្មនៃមន្ទីរកសិកម្ម រុក្ខាប្រមាញ់ និងនេសាទ រាជធានី ខេត្ត សរុបចំនួន ១១៦រូប។
ក្នុងកិច្ចប្រជុំបូកសរុបនេះដែរ លោកបណ្ឌិត ចាយ ជីម ប្រធាននាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ បានរាយការណ៍អំពីលទ្ធផលដែលសម្រេចបានក្នុងឆ្នាំ២០២៣ និងលើកទិសដៅបន្តសម្រាប់ការអនុវត្តន៍ការងារបន្តឆ្នាំ២០២៤ របស់នាយកដ្ឋានកសិ-ឧស្សាហកម្ម។
ជាមួយគ្នានេះដែរ ដើម្បីឱ្យកិច្ចប្រជុំនាថ្ងៃនេះទទួលបានលទ្ធផលជាផ្លែផ្កាបន្ថែមទៀត ឯកឧត្តមប្រធានអង្គប្រជុំ បានផ្តល់អនុសាសន៍ណែនាំដល់អង្គប្រជុំចំនួន៣ចំនុច៖ (១)ស្នើអ្នកចូលរួមត្រូវយកចិត្តទុកដាក់ស្តាប់បទបង្ហាញ ដែលឆ្លុះបញ្ចាំងដល់លទ្ធផលសកម្មភាពការងារ (២)ការពិភាក្សាគ្នាឱ្យបានផុសផុល ជាពិសេសធាតុចូលនូវរាល់ចំនុចខ្វះខាត ដើម្បីស្វែងរកវិធីសាស្រ្តថ្មី ដាក់ចេញជាផែនការសម្រាប់អភិវឌ្ឍន៍កសិ-ឧស្សាហកម្មរួមគ្នា (៣)ការរៀបចំច្បាប់ស្តីពីផលិតកម្មកសិកម្មតាមកិច្ចសន្យា និងច្បាប់ស្តីពី គុណភាព សុវត្ថិភាពផលិតផលកសិកម្ម គឺជាគន្លឹះចម្បងសម្រាប់ការងារកសិ-ឧស្សាហកម្ម សូមអង្គពិធីយកចិត្តទុកដាក់ពិភាក្សា និងផ្តល់ធាតុចូលសម្រាប់ការរៀបចំច្បាប់ទាំងពីរនេះ។
