ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា ទទួលជួបពិភាក្សាការងារបន្ត ជាមួយសារព័ត៌មានអេអ៊ឹមអេស អំពីការពង្រឹងកិច្ចសហការក្នុងការផលិតព័ត៌មាន អំពីវិស័យកសិកម្ម
ចេញផ្សាយ ៤ មេសា ២០២៥ 3383
នៅថ្ងៃទី០៣ ខែមេសា ឆ្នាំ២០២៥ លោកជំទាវ អ៊ឹម រចនា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានជួបពិភាក្សាការងារជាមួយសារព័ត៌មានអេអ៊ឹមអេស (AMS) អំពីអំពីការពង្រឹងកិច្ចសហការក្នុងការផលិតព័ត៌មាន អំពីវិស័យកសិកម្ម។
នៅក្នុងកិច្ចប្រជុំនេះ លោកជំទាវអនុរដ្ឋលេខាធិការ បានថ្លែងអំណរគុណចំពោះសារព័ត៌មាន AMS និងសារព័ត៌មានជាច្រើនទៀត ដែលបានផ្សព្វផ្សាយពីការចូលរួមដោះស្រាយបញ្ហារបស់កសិករ តាមរយៈជួយផ្សព្វផ្សាយបច្ចេកទេស ស្វែងរកទីផ្សារកសិផលជូនកសិករ និងតែងតែផលិតព័ត៌មានផ្សព្វផ្សាយ ពីសក្ដានុពលនៃវិស័យកសិកម្មកម្ពុជា ជាពិសេសស្របតាមគោលនយោបាយរបស់ក្រសួងគឺ៖ «មានហូប មានប្រើ មានបាន និងមានរហូត»។
ចំពោះគោលបំណងរបស់សារព័ត៌មាន AMS ដែលចង់ជំរុញកិច្ចសហការជាមួយក្រសួងឲ្យដល់កម្រិតជាដៃគូផ្សព្វផ្សាយយុទ្ធសាស្ត្រសម្រាប់វិស័យកសិកម្ម លោកជំទាវបានសម្ដែងការស្វាគមន៍ និងត្រៀមខ្លួនរួចជាស្រេចដើម្បីសម្រេចគោលដៅនេះ ក្នុងបំណងពង្រីកការផ្សព្វផ្សាយព័ត៌មានពិត និងគ្រប់ជ្រុងជ្រោយពីវិស័យកសិកម្ម ដើម្បីផលប្រយោជន៍ប្រជាកសិករ និយាយដោយឡែក និងសម្រាប់វិស័យកសិកម្ម និងសេដ្ឋកិច្ចកម្ពុជា និយាយជារួម៕
