កិច្ចប្រជុំសំណេះសំណាលជាមួយថ្នាក់ដឹកនាំ និងមន្រ្តីរាជការនៃនាយកដ្ឋានកសិ-ឧស្សាហកម្ម

ចេញ​ផ្សាយ​ ១៨ ឧសភា ២០២៣ 9037

នារសៀលថ្ងៃព្រហស្បតិ៍ ១៤រោច ខែពិសាខ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី១៨ ខែឧសភា ឆ្នាំ២០២៣ លោកបណ្ឌិត ចាយ ជីម ប្រធាននាយកដ្ឋានកសិ-ឧស្សាហកម្ម បានដឹកនាំកិច្ចប្រជុំសំណេះសំណាលជាមួយថ្នាក់ដឹកនាំ និងមន្រ្តីរាជការនៃនាយកដ្ឋានកសិ-ឧស្សាហកម្ម។ កិច្ចប្រជុំនេះមានគោលបំណងដើម្បី (១)សំណេះសំណាលជាមួយថ្នាក់ដឹកនាំនិងមន្រ្តីរាជការ (២)ពិភាក្សាអំពីទិសដៅការងារដែលត្រូវអនុវត្តបន្ត ដើម្បីពង្រឹងនិងអភិវឌ្ឍន៍វិស័យកសិ-ឧស្សាហកម្មឱ្យមានការរីកចម្រើនបន្ថែមទៀត និង(៣)សិក្សាអំពីបញ្ហាប្រឈម និងសំណូមពរផ្សេងៗរបស់ការិយាល័យ និងមន្ទីរពិសោធន៍ក្រោមឱវាទនាយកដ្ឋានកសិ-ឧស្សាហកម្ម។ ក្នុងនោះដែរលោកប្រធាននាយកដ្ឋានបានប្តេជ្ញាចិត្ត និងដឹកនាំអង្គភាពដូចតទៅ៖ (១)បន្តសិក្សារៀនសូត្រ ស្រាវជ្រាវ និងខិតខំប្រឹងប្រែងបំពេញការងារឱ្យបានល្អប្រសើ អស់ពីកម្លាំងកាយចិត្ត ប្រកបដោយភាពមឹងមាត់ ទំនួលខុសត្រូវ គណនេយ្យភាព ដើម្បីបង្កើនប្រសិទ្ធភាពនៃការប្រតិបត្តិរបស់នាយកដ្ឋានកសិ-ឧស្សាហកម្ម ស្របតាមចក្ខុវិស័យរបស់ក្រសួងកសិកម្ម រុក្ខាប្រមាញ់ និងនេសាទ និងរាជរដ្ឋាភិបាលកម្ពុជា សម្រាប់ការអភិវឌ្ឍន៍កសិ-ឧស្សាហកម្ម និងកសិកម្ម (២)រក្សាវប្បធម៌ សាមគ្គី ឯកភាពផ្ទៃក្នុងជាមួយថ្នាក់ដឹកនាំ និងមន្រ្តីរាជការក្រោមឱវាទនាយកដ្ឋានកសិ-ឧស្សាហកម្ម និងពង្រឹងកិច្ចសហប្រតិបត្តិការជាមួយបណ្តាអង្គភាព និងស្ថាប័នពាក់ព័ន្ធនានាសំដៅជំរុញ វិស័យកសិ-ឧស្សាហកម្មកម្ពុជា ទទួលបានការរីកចម្រើនប្រកបដោយនិរន្តភាព (៣)ធ្វើការងារដោយគោរពឋានានុក្រមការងារ ផ្អែកតាមភារកិច្ចដែលបានបែងចែក និងទទួលបន្ទុកសំដៅរក្សាបាននូវសណ្តាប់ធ្នាប់ការងារ និងការចៀសផុតពីសតិអារម្មណ៍ក្នុងការបំពេញភារកិច្ច (៤)អនុវត្តការងារជាមួយថ្នាក់ដឹកនាំរបស់ក្រសួង បន្ថែមលើភារកិច្ចដែលទទួលបន្ទុក សំដៅធានាបាននូវដំណើរការព្រមគ្នាជាប្រព័ន្ធ និង(៥)គោរពតាមគោលការណ៍ លិខិតបទដ្ឋានគតិយុត្តពាក់ព័ន្ធ និងអនុវត្តភារកិច្ចផ្សេងៗទៀតដែលថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ប្រគល់ជូន។