ឯកឧត្តមអនុរដ្ឋលេខាធិការ ខាត់ សុធី អញ្ជើញដឹកនាំ វគ្គបណ្តុះ បណ្តាល Farmbook App ដល់មន្ត្រីកសិកម្មឃុំ ក្នុងខេត្តឧត្តមានជ័យ

ចេញ​ផ្សាយ​ ២២ សីហា ២០២៤ 3600

នៅថ្ងៃទី២២ ខែសីហា ឆ្នាំ២០២៤ ឯកឧត្តម ខាត់ សុធី អនុរដ្ឋ លេខាធិការ ក្រសួងកសិកម្ម រុក្ខាប្រមាញ់ និងនេសាទ និង លោក យឹម សារុំ ទីប្រឹក្សាក្រសួងកសិកម្ម រុក្ខាប្រមាញ់ និងនេសាទ បានអញ្ជើញ ដឹកនាំវគ្គបណ្តុះបណ្តាល Farmbook App ផ្តោតលើការទាញយក កម្មវិធី របៀបប្រើប្រាស់កម្មវិធី ដល់មន្ត្រីកសិកម្មឃុំ ដែលប្រព្រឹត្តទៅ នៅមន្ទីរកសិកម្ម រុក្ខាប្រមាញ់ និងនេសាទខេត្តឧត្តមានជ័យ។

វគ្គបណ្តុះបណ្តាលនេះមានការចូលរួមពីលោក ឈឿន ពន្លឺ អនុប្រធាន មន្ទីរកសិកម្ម រុក្ខាប្រមាញ់ និងនេសាទខេត្តឧត្តមានជ័យ និងមន្ត្រី ការិយាល័យនៃនាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ មន្រ្តីកសិកម្មឃុំ សរុបចំនួន២០នាក់ ស្រី្ត ៧នាក់ ដែលវគ្គបណ្តុះ បណ្តាលនេះ គាំទ្រដោយអង្គការ GIZ គម្រោង MUSEFO  PEARL  Aspire AT។

គួរបញ្ជាក់ជូនថា វគ្គបណ្តុះបណ្តាលនេះរៀបចំឡើង ដើម្បីបណ្ដុះ បណ្ដាលមន្ដ្រីកសិកម្មឃុំ អំពីការប្រមូល ព័ត៌មានពីកសិករ និងក្រុមផលិត សិក្សាប៉ាន់ស្មានផែនការតាមតំបន់ និងទំហំផលិតកម្ម សិក្សាពីតម្រូវការនិងព័ត៌មានរបស់ឣ្នកប្រមូលទិញធៀបនឹងទិន្នផល រៀបចំផែនការផលិតសមស្របទៅនឹងតម្រូវការទីផ្សារ ប៉ាន់ប្រមាណ តម្រូវការធាតុចូលកសិកម្ម និងដឹងពីស្ថានភាពភូមិសាស្ត្រតាមតំបន់។ ព័ត៌មានដែលទទួលបានទាំងនេះ នឹងត្រូវចងក្រងជារបាយការណ៍ ផ្ញើទៅកាន់ថ្នាក់ជាតិ ដើម្បីរៀបចំផែនការយុទ្ធសាស្ត្រ និងអន្តរាគមន៍ បានទាន់ពេលវេលា ក្នុងករណីមានបញ្ហាប្រឈម៕