ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម បានជួបសំណេះសំណាល និងផ្តល់ការគាំទ្របន្ថែមដល់មន្រ្តីកសិកម្មឃុំ និងការពង្រឹងការសហការរវាងមន្ទីរកសិកម្មខេត្ត លើការគ្រប់គ្រងកត្តាសត្វល្អិតចង្រៃបំផ្លាញដំណាំស្រូវ នៅក្នុងខេត្តចំនួន៣

ចេញ​ផ្សាយ​ ៧ កក្កដា ២០២៤ 2758

នៅថ្ងៃទី៤ និងទី៥ ខែកក្កដា ឆ្នាំ២០២៤ ឯកឧត្តមបណ្ឌិត យ៉ង់ សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានជួបសំណេះសំណាល និងផ្តល់ការគាំទ្របន្ថែមដល់មន្រ្តីកសិកម្មឃុំ និងការពង្រឹងការសហការរវាងមន្ទីរកសិកម្មខេត្ត ក្រុមប្រឹក្សាឃុំ  មេភូមិ ដោយផ្តោតលើការគ្រប់គ្រងកត្តាសត្វល្អិតចង្រៃបំផ្លាញដំណាំស្រូវ នៅខេត្តកណ្តាល ខេត្តព្រៃវែង និងខេត្តស្វាយរៀង។

ឯកឧត្តមក៏បានផ្តាំផ្ញើទៅអាជ្ញាធរពាក់ព័ន្ធ ជាពិសេសអាជ្ញាធរមូលដ្ឋាននៅឃុំឈើកាច់ ស្រុកបាភ្នំ ខេត្តព្រៃវែង និងឃុំគ្រួស ស្រុកស្វាយជ្រុំ ខេត្តស្វាយរៀង និងខេត្តកណ្តាល ជួយធ្វើការណែនាំបន្ថែមដល់ប្រជាកសិករឱ្យយល់ពីការចូលរួមបង្កើតសហគមន៍កសិកម្មទំនើប ដើម្បីទទួលបានអត្ថប្រយោជន៍ដូចជា ជំរុញកំណើនផលិតកម្ម កាត់បន្ថយថ្លៃដើម និងបង្កើនប្រាក់ចំណេញដល់កសិករផងដែរ។

បន្ថែមពីនេះឯកឧត្តមរដ្ឋលេខាធិការក៏បានណែនាំឱ្យប្រធានមន្ទីរកសិកម្មខេត្តទាំងនោះ ជួយរៀបចំការបណ្តុះបណ្តាលបន្ថែមដល់មន្រ្តីកសិកម្មឃុំលើប្រធានបទ ប្រព័ន្ធគ្រប់គ្រងនិងកម្ចាត់សត្វល្អិតចង្រៃតាមបែបមេកានិច និងប្រធានបទថ្នាំកសិកម្ម Pesticides ថែមទៀតផង៕