ឯកឧត្តមរដ្ឋលេខាធិការ ចាន់ សុវុឌ្ឍ បានដឹកនាំក្រុមការងារចម្រុះ ចុះពិនិត្យទីតាំងផលិតស្រូវប្រាំងនៅខេត្តបាត់ដំបង

ចេញ​ផ្សាយ​ ២៧ ឧសភា ២០២៥ 2537

នៅថ្ងៃទី១៤ ខែមករា ឆ្នាំ២០២៥ ឯកឧត្តម ចាន់ សុវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារចម្រុះ ចុះពិនិត្យទីតាំងផលិតស្រូវប្រាំង OM ៥៤៥១ និងបញ្ហាប្រឈមដែលកើតមានឡើងនៅក្នុងអំឡុងពេលប្រមូលផលចុងខែមករា និងដើមខែកុម្ភៈ ស្ថិតនៅឃុំបាយដំរាំង ខេត្តបាត់ដំបង។

ដំណើរចុះពិនិត្យនេះ មានការចូលរួមពីឯកឧត្តម សុខ លូ អភិបាល នៃគណៈអភិបាលខេត្ត អភិបាលរងស្រុកបាណន់ មេឃុំបាយដំរាំ មេភូមិ កងកម្លាំង ប្រធានមន្ទីរ មន្ត្រីមន្ទីរពាណិជ្ជកម្ម  មន្ត្រីព័ត៌មានខេត្ត មន្ត្រីជំនាញ សរុប២០នាក់ និងប្រជាពលរដ្ឋចំនួន៨៣នាក់។

នាឱកាសនោះ ឯកឧត្តមគូសបញ្ជាក់ថា នៅតំបន់​ទួលសំរោង ភូមិតាស៊ង ឃុំបាយដំរាំ ស្រុកបាណន់ ការដាំដុះស្រូវ OM ៥៤៥១ មាន​ចំនួន​៣៩០០ហិចតាបច្ចុប្បន្នប្រមូលផល​​បានត្រឹមតែ៥%ប៉ុណ្ណោះ​ហើយ​លក់​បាន​​តម្លៃ​៧៥០រៀលក្នុង​១គីឡូក្រាម​ស្រូវ​។ ​បើតាមការប៉ាន់ស្មានការ​ប្រមូល​ផល​និង​បញ្ចប់​នៅដើមសប្តាហ៍ទី២ ឫចុង​ខែកុម្ភៈ​ ដែលសរុបបរិមាណផល២១៤៥០តោន។ តម្លៃស្រូវ OM ៥៤៥១ បច្ចុប្បន្ន បើធៀបទៅឆ្នាំមុន មានការធ្លាក់ចុះបន្តិច ប៉ុន្តែទិន្នផលស្រូវរបស់កសិករដែលផលិតបាន ច្រើនជាងឆ្នាំមុន ។

ឯកឧត្តមបានណែនាំទៅប្រជាកសិករចូលរួមបង្កើតសហគមន៍កសិកម្មទំនើប និងពិចារណាឡើងវិញ នៅក្នុងការប្រើប្រាស់នៅពូជសែនក្រអូប ដែលធានាលំនឹងទីផ្សារ មានអ្នកទិញច្បាស់លាស់ ហើយទទួលបានតម្លៃខ្ពស់ ក្នុងចន្លោះពី១២៥០រៀល ដល់១៣៥០រៀលក្នុងមួយគីឡូក្រាម។

ឯកឧត្តមក៏បានលើកទឹកចិត្តដល់ប្រជាកសិករ ដែលមានបញ្ហាបន្ទាន់ ត្រូវធ្វើការពិភាក្សាគ្នាជាមួយអាជ្ញាធរមូលដ្ឋាន ភូមិ ឃុំ និងគណៈអភិបាលស្រុក និងមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង ដើម្បីធ្វើការសម្របសម្រួល និងចុះប្រមូលទិញតាមតម្លៃជាក់ស្តែង និងដោះស្រាយបញ្ហាប្រឈមជូនប្រជាកសិករឱ្យបានទាន់ពេលវេលា៕