ព័ត៌មានផ្សេងៗទៀត
កម្ពុជាធ្វើជាម្ចាស់ផ្ទះកិច្ចប្រជុំរដ្ឋមន្ត្រីកសិកម្ម និងព្រៃឈើអាស៊ាន
ចេញផ្សាយ ១៧ មករា ២០១៨ 4799
ឯកឧត្តម បណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៏ កាលពីថ្ងៃទី២២ ខែតុលា នៅពេលដែលឯកឧត្តមបានចូលរួម នៅក្នុងកិច្ចប្រជុំលើកទី១០ នៃឧត្តមមន្ត្រីកសិកម្ម និងព្រៃឈើអាស៊ានបូកបីថា មកដល់ពេលនេះ អាស៊ានបានអនុវត្តនូវគម្រោងសហការគ្នាជាច្រើន ពាក់ព័ន្ធ នឹងស្បៀងអាហារ កសិកម្ម ព្រៃឈើជាច្រើន ដែលរួមមានការផ្លាស់ប្តូរ ពត៍មានផលិតផលកសិកម្ម ការប្រើប្រាស់ និងកែច្នៃ ផលិតផលកសិកម្ម ការបណ្តុះបណ្តាល និងផ្សព្វផ្សាយការស្រាវជ្រាវ និងការអភិវឌ្ឍន៏ ព្រមទាំងការជំរុញពាណិជកម្ម ផលដំណាំ សត្វ ជលផល និងព្រៃឈើជាដើម ប៉ុន្តែទោះបីជាយ៉ាងណាក៏ដោយ ក្នុងបិរបទនៃសកលភាវូបនីកម្ម និងដើម្បីឈានទៅរកការរត់ប្រណាំងប្រជែងនៅលើ ទីផ្សាអន្តរជាតិ ព្រមទាំងរក្សាបាននូវនិរន្តរភាពនៃផលិតកម្ម កសិកម្ម កិច្ចសហប្រតិបត្តិការ នៅក្នុងតំបន់ត្រូវតែបន្តធ្វើ និងពង្រីកឡើងថែមទៀត ។
ឯកឧត្តមរដ្ឋមន្ត្រី បានអោយដឹងថា ការលើកកម្ពស់គុណភាពស្តង់ដារ ធានាសុវត្ថិភាពស្បៀងអាហារ ការកំណត់ស្តង់ដារអាជ្ញាប័ណ្ណពាណិជ្ជកម្ម គឺជាសកម្មភាពអាទិភាពដែលត្រូវអនុវត្ត។ ឯកឧត្តមរដ្ឋមន្ត្រីបន្តទៀតថា សន្តិសុខស្បៀង ការប្រែប្រួលអាកាសធាតុ និងជុំវិញការប្រណាំប្រជែង វិស័យកសិកម្ម ព្រៃឈើ និងជលផល គឺត្រូវតែធ្វើឡើងប្រកបដោយគោលការណ៍វិទ្យាសាស្ត្រ និងបច្ចេកវិជ្ជាដើម្បីបញ្ជូនសារប្រយោជន៏ឲ្យទៅមូលដ្ឋាន ។
ក្រៅពីកិច្ចប្រជុំឧត្តមមន្ត្រីកសិកម្ម និងព្រៃឈើអាស៊ានបូកបីលើកទី១០ កិច្ចប្រជុំរដ្ឋមន្ត្រី កសិកម្ម និងព្រៃឈើអាស៊ានលើកទី៣២ និងបូកបីលើកទី១០ ក៏មានកិច្ចប្រជុំរដ្ឋមន្ត្រី អាស៊ានបូកចិន លើកទី២ ផងដែរ ។
ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម បានបន្ថែមថា រយៈពេលពីថ្ងៃកន្លងមកនេះ ឧត្តមមន្ត្រីកសិកម្ម និងព្រៃឈើ អាស៊ានបានពិនិត្យ និងពិភាក្សាគ្នាយ៉ាងផុលផុសទាំងក្របខ័ណ្ឌបច្ចេកទេស និងនិតិវិធីរដ្ឋបាលសំដៅ ទទួលបាននូវប្រសិទ្ធភាពការងារ ដោយឈរលើបទពិសោធន៏ការងារកន្លងមក។
ឯកឧត្តមរដ្ឋមន្ត្រី បានលើកឡើងទៀតថា ជារួមផែនទីបង្ហាញផ្លូវរបស់សហគមន៏អាស៊ាន ២០០៩-២០១៥ គឺជាមាគា៍ប្រតិបត្តមួយយ៉ាងល្អ ដែលយើងអាចបំពេញការងារជាមួយគ្នាយ៉ាងជោគជ័យ ។ ផែនទីបង្ហាញផ្លូវនោះក៏ត្រូវបាន ចង្អុលបង្ហាញបន្ថែមយ៉ាងច្បាស់ ក្នុងកិច្ចប្រជុំសហប្រតិបត្តការអាស៊ានបូកបី នៅហួរហីន អំពីសន្តិសុខស្បៀង និងការអភិវឌ្ឍន៏ជីវថាមពល ។
ដូច្នេះការអនុវត្តន៏តាមការចង្អុលបង្ហាញ របស់ថ្នាក់ដឹកនាំអាស៊ានបូកបី និងបំពេញការងារ របស់យើងពាក់ព័ន្ធ និងសន្តិសុខស្បៀង ការប្រែប្រួលអាកាសធាតុ និងជុំវិញការប្រណាំងប្រជែង វិស័យកសិកម្ម ព្រៃឈើ និងជលផល តាមរយៈការធ្វើអោយប្រសើឡើងនូវ ការស្រាវជ្រាវវិទ្យាសាស្ត្រ និងបច្ចេកវិជ្ជា ក្នុងន័យធ្វើយ៉ាងណា ជួយបញ្ជូនសារដ៏មានសារប្រយោជន៏នេះ ទៅដល់មូលដ្ឋានដែលជាតួរអង្គត្រូវអនុវត្តផ្ទាល់ គឺជាកិច្ចការអាទិភាពបំផុត ។
លោកឯកឧត្តម បណ្ឌិត ច័ន្ទ សារុន ក៏បានអំពាវនាវ ឲ្យមានការគាំទ្រ និងសហការជំរុញការងាររបស់រដ្ឋមន្ត្រីកសិកម្មអាស៊ាន ឲ្យឆ្ពោះទៅមុខ និងបង្កើតគម្រោងថ្មី ៗ និងគំនិតផ្តួចផ្តើមថ្មីដែលនឹងផ្តល់ ផលប្រយោជន៏ដល់ប្រជាជាតិយើងទាំងមូល ។
ជាមួយនិងការប្រមើលមើលដ៏មានតម្លៃ និងការណែនាំប្រកបដោយគតិបណ្ឌិត របស់រដ្ឋមន្ត្រីកសិកម្មព្រៃឈើអាស៊ាន បូកបី ឯកឧត្តមបណ្ឌិត ច័ន្ទ សារុន ជឿជាក់ថា យើងនឹងអាចសំរេចទៅដល់គោលដៅរួមនៃកិច្ចប្រជុំ និងទទួលបានលទ្ធផលផ្លែផ្កាជាទីគួរជាទីពេញចិត្តជាពុំខាន ។
តាមកម្មវិធីដែលបានគ្រោងទុក កិច្ចប្រជុំរដ្ឋមន្ត្រី កសិកម្ម និងព្រៃឈើអាស៊ានបូកបី ដែលរួមមាន ប្រទេសចិន កូរ៉េ និង ជប៉ុននៅថ្ងៃទី ២៣ ខែតុលានេះ នឹងប្រារព្វពិធីបើកកិច្ចប្រជុំនៅវិមានសន្តិភាព (អគារទីស្តីការនាយករដ្ឋមន្ត្រីដែលទើបបើកសម្ភោធ) ក្រោមអធិបតីភាពដ៏ខ្ពង់ខ្ពស់របស់សម្តេចនាយករដ្ឋមន្ត្រី នឹងឡើងថ្លែងសន្ទរកថាបើកកិច្ចប្រជុំផងដែរ ៕
