ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំកិច្ចប្រជុំបូកសរុបការងារកសិកម្មខេត្តរតនគិរី ប្រចាំត្រីមាសទី៣ ឆ្នាំ២០២៥ និងលើកទិសដៅអនុវត្តបន្ដ

ចេញ​ផ្សាយ​ ២៩ កញ្ញា ២០២៥ 867

នៅថ្ងៃទី២៩ ខែកញ្ញា ឆ្នាំ២០២៥ ឯកឧត្ដម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ទទួលបន្ទុកការងារខេត្ដរតនគិរី បានអញ្ជើញដឹកនាំកិច្ចប្រជុំបូកសរុបការងារប្រចាំត្រីមាសទី៣ ឆ្នាំ២០២៥ និងលើកទិសដៅបន្ដ នៅទីស្តីការមន្ទីរកសិកម្ម រុក្ខាប្រមាញ់ និងនេសាទខេត្ត។ 
កិច្ចប្រជុំនេះ មានការអញ្ជើញចូលរួមពីលោក លោកស្រី ថ្នាក់ដឹកនាំមន្ទីរ ប្រធាន អនុប្រធាន និងមន្រ្ដី នៃការិយាល័យ ព្រមទាំងនាយខណ្ឌរដ្ឋបាលទាំងអស់ ក្រោមឱវាទមន្ទីរ ព្រមទាំងមន្រ្ដីកសិកម្មឃុំចំនួន ៥៧ រូប (នារី ៨រូប)។ 
តាមរយៈកិច្ចប្រជុំ ឯកឧត្តមរដ្ឋលេខាធិការ បានស្តាប់សេចក្តីរាយការណ៍របស់លោក ង៉ែត ធារ៉ា អនុប្រធានមន្ទីរកសិកម្ម រុក្ខាប្រមាញ់ និងនេសាទ អំពីលទ្ធផលការងារសម្រេចបានរយៈពេល៩ខែ ដើមឆ្នាំ២០២៥ និងរបាយការណ៍អំពីផលប៉ះពាល់លើដំណាំកសិកម្មដោយគ្រោះទឹកជំនន់ក្នុងមូលដ្ឋានភូមិ-ឃុំ ពីមន្រ្តីកសិកម្មឃុំ ព្រមទាំងការលើកឡើងអំពីបញ្ហាប្រឈមនានាពីលោក លោកស្រី ជាប្រធាន អនុប្រធាន ការិយាល័យ និងនាយខណ្ឌរដ្ឋបាលរបស់មន្ទីរកសិកម្ម រុក្ខាប្រមាញ់ និងនេសាទខេត្ត។ 
ក្រោយពីបានស្តាប់សេចក្តីរាយការណ៍ របាយការណ៍ និងបញ្ហាប្រឈមនានារួច ឯកឧត្ដមរដ្ឋលេខាធិការ បានណែនាំដល់មន្ទីរឱ្យលើកទិសដៅអនុវត្តសម្រាប់ត្រីមាសបន្ត បញ្ចប់ការប្រមូលទិន្នន័យស្ថិតិដំណាំត្រឹមបំណាច់ខែតុលា និងបន្តការតាមដាន និងបណ្តុះបណ្តាលបច្ចេកទេសដែលឆ្លើយតបផែនការសមាហរណកម្ម។ បន្ថែមពីនេះ ឯកឧត្ដម ហ៊ាន វណ្ណហន បានស្នើថ្នាក់ដឹកនាំ និងមន្រ្តីជំនាញរបស់មន្ទីរ រួមទាំងមន្រ្ដីកសិកម្មឃុំ នៅឃុំដែលមានការរងផលប៉ះពាល់ពីទឹកជំនន់ ឱ្យបន្ដចុះសិក្សា និងវាយតម្លៃតាមដំណាក់កាលបន្ថែមទៀត ដោយត្រូវបន្តសហការជាមួយអាជ្ញាធរពាក់ព័ន្ធដើម្បីចាត់វិធានបន្ធូរបន្ថយកម្រិតខូចខាតតាមលទ្ធភាព។ 
ជាមួយគ្នានោះដែរ ឯកឧត្តមរដ្ឋលេខាធិការ ក៏បានណែនាំឱ្យពិនិត្យលទ្ធភាពបង្វែរបណ្ដាសកម្មភាពតាមអនុកម្មវិធី កម្មធី និងចង្កោមសកម្មភាពរបស់មន្ទីរ ពីតំបន់ដែលមានសក្តានុពលសម្រាប់ការស្តារឡើងវិញ នៅត្រីមាសទី៤ ឆ្នាំ២០២៥ ទៅអនុវត្តនៅតំបន់ដែលរងផលប៉ះពាល់ដោយគ្រោះទឹកជំនន់ និងតាមដានការឆ្លងរាលដាលជម្ងឺលើសត្វចិញ្ចឹម និងដំណាំកសិកម្មរបស់ប្រជាពលរដ្ឋ ក្រោយពេលទឹកជំនន់ស្រក៕