ព័ត៌មានផ្សេងៗទៀត
ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម និងក្រុមការងារជំនាញ បានអញ្ជើញចុះពិនិត្យ និងវាយតម្លៃប៉ះពាល់ដំណាំស្រូវ រងផលប៉ះពាល់ដោយការបំផ្លាញដោយសត្វ «រុយស» នៅស្រុកកំពង់ត្របែក ខេត្តព្រៃវែង
ចេញផ្សាយ ៨ កក្កដា ២០២៤ 2594
នៅថ្ងៃទី០៦ ខែកក្កដា ឆ្នាំ២០២៤ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងក្រុមការងារជំនាញ បានអញ្ជើញចុះពិនិត្យស្ថានភាពជាក់ស្តែង និងវាយតម្លៃផលប៉ះពាល់ដំណាំស្រូវ ដែលទទួលរងការបំផ្លាញដោយសត្វ «រុយស» និងចាត់វិធានការបាញ់ថ្នាំអន្តរាគមន៍ជូនកសិករ នៅភូមិកំពង់ស្វាយកើត ឃុំកំពង់ត្របែក ស្រុកកំពង់ត្របែក ខេត្តព្រៃវែង។
សមាសភាពចូលរួមក្នុងដំណើរចុះត្រួតពិនិត្យនោះរួមមាន ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម លោកប្រធានមន្ទីរកសិកម្មខេត្តព្រៃវែង លោកអភិបាលស្រុកកំពង់ត្របែក ប្រធាន អនុប្រធាន មន្រ្តីការិយាល័យកសិកម្មស្រុក ក្រុមប្រឹក្សាឃុំកំពង់ត្របែក មន្រ្តីកសិកម្មឃុំពាមមន្ទារ មេភូមិ និងប្រជាកសិករ។
លទ្ធផលនៃការចុះពិនិត្យបង្ហាញថា នៅក្នុងឃុំកំពង់ត្របែក ដំណាំស្រូវចំនួន ៣៧៥ ហិកតា បានរងផលប៉ះពាល់ ហើយក្រុមការងារបានអន្តរាគមន៍បាញ់ថ្នាំ បានចំនួន២១៥ហិកតា ហើយអាជ្ញាធរមូលដ្ឋានបាននឹងកំពុងបន្តអន្តរាគមន៍ ដើម្បីជួយសង្គ្រោះដំណាំស្រូវជាបន្តបន្ទាប់ទៀត។
នាដំណើរចុះពិនិត្យនោះ ប្រធានមន្ទីរកសិកម្មខេត្តព្រៃវែង បានធ្វើការណែនាំពីវិធានការកម្ចាត់ និងធាតុសកម្មលើសំបកថ្នាំកសិកម្ម ដើម្បីកម្ចាត់ពពួក«រុយស» ជូនដល់កសិករក៏ដូចជាមន្រ្តីអាជ្ញាធរពាក់ព័ន្ធដើម្បីទប់ស្កាត់ការរីករាលដាលនៃពពួក«រុយស» ដោយបានធ្វើការបង្ហាញពីវិធានការការពារពេលលាយថ្នាំគីមី ការប្រើប្រាស់ផ្លាស់ប្តូរធាតុសកម្ម បានធ្វើការបាញ់ថ្នាំបង្ហាញលើស្រែកសិករផ្ទាល់ និងសូមឱ្យកសិករត្រូវសហការ និងស្តាប់ការណែនាំពីឯកឧត្តមរដ្ឋលេខាធិការ ប្រធានមន្ទីរ អភិបាលស្រុក និងមន្រ្តីកសិកម្មឃុំជាដើម៕
