ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ទឹម បូរក្ស បានដឹកនាំសមត្ថកិច្ចចម្រុះ ចុះបង្រ្កាបបទល្មើសជលផល នៅក្នុងភូមិសាស្រ្តគោលដៅចំនួន២ នៅស្រុកត្បូងឃ្មុំ ខេត្តត្បូងឃ្មុំ
ចេញផ្សាយ ៩ សីហា ២០២៤ 2858
នៅថ្ងៃទី០៨ ខែសីហា ឆ្នាំ២០២៤ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារសមត្ថកិច្ចចម្រុះចុះបង្រ្កាបបទល្មើសជលផល នៅក្នុងភូមិសាស្រ្តគោលដៅចំនួន២ នៅស្រុកត្បូងឃ្មុំ ខេត្តត្បូងឃ្មុំ ដោយបានរុះរើកាប់បំផ្លាញចោលវត្ថុតាងនៃបទល្មើសជលផល និងបានកសាងសំណុំរឿងតាមនិតិវិធីច្បាប់ស្តីពីជលផល។
ក្រុមការងារជំនាញដែលចុះបង្ក្រាបរួមមាន មន្ត្រីជំនាញខណ្ឌរដ្ឋបាលជលផលត្បូងឃ្មុំ លោក ស៊ុន សារ៉ាត់ អនុប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ អធិការដ្ឋានរដ្ឋបាលជលផលមេគង្គ អាជ្ញាធរមូលដ្ឋាន ក្រុមប្រឹក្សាឃុំមៀន ស្រុកអូរាំងឪ កម្លាំងប៉ុស្តិ៍នគរបាលរដ្ឋបាលឃុំមៀន ក្រុមប្រឹក្សាឃុំជីរោទិ៍ទី២ ស្រុកត្បូងឃ្មុំ និងកម្លាំងគណៈកម្មការសហគមន៍នេសាទបឹងក្រពិត ។
ជាលទ្ធផល នៃការបង្រ្កាបបទល្មើសជលផល បានចំនួន២គោលដៅ ដោយបានកសាងសំណុំរឿងតាមនិតិវិធីច្បាប់ស្តីពីជលផល និងរុះរើកាប់បំផ្លាញចោលវត្ថុតាង នៃបទល្មើសជលផលនៅនឹងកន្លែងកើតហេតុរួមមានគោលដៅទី១ នៅភូមិសាស្រ្តបឹងក្រពិត ស្រុកអូររាំងឪ ខេត្តត្បូងឃ្មុំ៖ មានឧបករណ៍លូស្បៃមុងចំនួន៤៧មាត់ របាំងស្បៃមុងប្រវែង៨៩០ម៉ែត្រ បង្គោលចម្រឹងចំនួន៦៣៥ដើម និងបានចាក់លែងកូនត្រីចម្រុះទម្ងន់៩០គីឡូក្រាម។
ចំពោះការបង្រ្កាបនៅគោលដៅទី២ ដែលស្ថិតនៅភូមិសាស្រ្តបឹងក្រចាប់ ឃុំជីរោទិ៍ទី២ ស្រុកត្បូងឃ្មុំ ខេត្តត្បូងឃ្មុំ រឹបអូសបានរួមមាន ៖ ឧបករណ៍លូស្បៃមុងចំនួន២៧មាត់ របាំងស្បៃមុងប្រវែង៨១០ម៉ែត្រ បង្គោលចម្រឹងចំនួន៤៨៦ដើម និងបានចាក់លែងកូនត្រីចម្រុះទម្ងន់៥០គីឡូក្រាម៕
