ឯកឧត្តម សេន សុវណ្ណ រដ្ឋលេខាធិការក្រសួងកសិកម្ម អញ្ជើញ ទទួលជួបពិភាក្សាការងារជាមួយ ឯកឧត្តម Liu Hua ពិភាក្សាពីការពង្រីកគម្រោងសហប្រតិបត្តិការ និងមានលក្ខណៈប្រមូលផ្ដុំគ្រប់អនុវិស័យ ដោយប្រើប្រាស់បច្ចេកវិទ្យានុយក្លេអ៊ែរ

ចេញ​ផ្សាយ​ ២១ មីនា ២០២៤ 19781

នៅរសៀលថ្ងៃទី១៨ ខែមីនា ឆ្នាំ២០២៤ ឯកឧត្តម សេន សុវណ្ណ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានទទួលជួបពិភាក្សាការងារជាមួយ ឯកឧត្តម Liu Hua អគ្គនាយករង និងជាប្រធាននាយកដ្ឋានកម្មវិធី សហប្រតិបត្តិការ បច្ចេកទេស នៃទីភ្នាក់ងារថាមពលបរមាណូ អន្តរជាតិ (IAEA) ដើម្បីពិភាក្សាការងារ ពីការពង្រីកគម្រោង សហប្រតិបត្តិការឲ្យមាន ទំហំធំ និងមានលក្ខណៈប្រមូលផ្ដុំគ្រប់អនុវិស័យ ដោយប្រើប្រាស់បច្ចេកវិទ្យានុយក្លេអ៊ែរ ដែលកិច្ចពិភាក្សាធ្វើឡើងនៅទីស្តីការក្រសួងកសិកម្ម។

ក្នុងជំនួបពិភាក្សានោះ ឯកឧត្តម Liu Hua បានកោត សរសើរចំពោះលទ្ធផល សមិទ្ធផល នៃការអនុវត្តគម្រោង ជំនួយបច្ចេកទេសជាបន្តបន្ទាប់ជាមួយអង្គភាពជំនាញ នៃក្រសួងកសិកម្ម រុក្ខាប្រមាញ់ និងនេសាទ និងបានជម្រាបជូន អំពីគំនិតផ្ដួចផ្ដើមក្នុងការពង្រីកគម្រោងសហប្រតិបត្តិការឲ្យមានទំហំធំ និងមានលក្ខណៈប្រមូលផ្ដុំគ្រប់អនុវិស័យ ដោយប្រើប្រាស់ បច្ចេកវិទ្យានុយក្លេអ៊ែរ សំដៅធានាសន្តិសុខស្បៀងនៅក្នុងតំបន់ និងពិភពលោក។

ក្នុងន័យនេះ ឯកឧត្តម Liu Hua បានស្នើក្រសួងបញ្ជូន លិខិតផ្លូវការ ភ្ជាប់ជាមួយឯកសារទស្សនទានអំពីគម្រោងបឋម ទៅទីភ្នាក់ងារថាមពលបរមាណូអន្តរជាតិ IAEA) ដើម្បីរួមគ្នារៀបចំគម្រោងពេញលេញមួយសម្រាប់ដាក់កៀរគរថវិកាបន្ថែមពីដៃគូ IAEA និងស្ថាប័នហិរញ្ញវត្ថុនានា។ ទីភ្នាក់ងារ IAEA និងក្រសួងរ៉ែនិងថាមពល មានបំណងរៀបចំ Country Partnership Program Framework ដែលនៅក្នុងនោះ មានផ្នែកស្បៀង និងកសិកម្ម (Food and Agriculture) នឹងបានស្នើក្រសួងកសិកម្ម រុក្ខាប្រមាញ់ និងនេសាទ ដឹកនាំរៀបចំផ្នែកនេះ។

ឯកឧត្តម សេន សុវណ្ណ បានសម្ដែងនូវកិច្ចស្វាគមន៍ចំពោះ គំនិតផ្ដួចផ្ដើមកសាងគម្រោងថ្មី និងថ្លែងអំណរគុណទីភ្នាក់ងារ ថាមពលបរមាណូអន្តរជាតិ(IAEA) ចំពោះការផ្ដល់គម្រោងជំនួយ បច្ចេកទេសដល់ក្រសួងកសិកម្ម រុក្ខាប្រមាញ់ និងនេសាទ ហើយក្រសួងនឹងធ្វើការពិនិត្យ ពិភាក្សារៀបចំឯកសារទស្សនទាន អំពីគម្រោងបឋម ដើម្បីឆ្លើយតបនឹងសំណើរបស់ IAEA។

ទន្ទឹមនឹងនេះដែរ ឯកឧត្តម សេន សុវណ្ណ ក៏បានជម្រាបជូន ពីកម្ពុជា អាចសម្រេចបាននូវសន្តិសុខស្បៀង ដោយសារការផ្ដោត យកចិត្តទុកដាក់លើការផលិតប្រកបដោយគុណភាព និងសុវត្ថិភាព ដើម្បីនាំចេញ ក្នុងនោះក្រសួងមានគោលដៅបង្កើត មន្ទីរពិសោធន៍កសិកម្មជាតិ ដើម្បីធ្វើការវិភាគសុវត្ថិភាព ផលិតផលកសិកម្ម ហើយក្រសួងក៏មានគោលដៅបង្កើត បណ្ឌិតសភាវិទ្យាសាស្រ្តកសិកម្មផងដែរ និងបានស្នើ IAEA ធ្វើការសហការ និងគាំទ្រ៕