អង្គភាពគ្រប់គ្រងគម្រោងនៃ “គម្រោងការលើកកម្ពស់ជីវភាពធន់នឹងអាកាសធាតុនៃសហគមន៍ផលិតស្រូវនៅតំបន់បឹងទន្លេសាប (PCRL)” រៀបចំកិច្ចប្រជុំគណៈកម្មាធិការតម្រង់ទិសលើកដំបូងរបស់ខ្លួន ក្រោមអធិបតីភាពរបស់ ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម

ចេញ​ផ្សាយ​ ១៥ កុម្ភៈ ២០២៤ 3610

កាលពីព្រឹកថ្ងៃទី១៤ ខែកុម្ភៈ ឆ្នាំ២០២៤ អង្គភាពគ្រប់គ្រងគម្រោងនៃ “គម្រោងការលើកកម្ពស់ជីវភាពធន់នឹងអាកាសធាតុនៃសហគមន៍ផលិតស្រូវនៅតំបន់បឹងទន្លេសាប (PCRL)” បានរៀបចំកិច្ចប្រជុំគណៈកម្មាធិការតម្រង់ទិសលើកដំបូងរបស់ខ្លួន ក្រោមអធិបតីភាពរបស់ ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មាធិការតម្រង់ទិសរបស់គម្រោង PCRL នៅសាលប្រជុំទន្លេបាសាក់ II ។

វត្តមានអ្នកចូលរួមនៅក្នុងកិច្ចប្រជុំនេះ រួមមាន  ឯកឧត្តមបណ្ឌិត ងិន ឆាយ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានកសិកម្ម និងជាអនុប្រធានអចិន្ត្រៃយ៍នៃគណៈកម្មាធិការតម្រង់ទិស ឯកឧត្តម ស៊ី រ៉ាមុនី អគ្គនាយកនៃអគ្គនាយកដ្ឋានសហគមមូលដ្ឋាននៃក្រសួងបរិស្ថាន កញ្ញា Rebekah BELL តំណាង FAO ប្រចាំប្រទេសកម្ពុជា  សមាជិកគណៈកម្មការតម្រង់ទិស និងតំណាងអង្គការដៃគូអនុវត្ត ព្រមទាំងសមាជិកនៃអង្គភាពគ្រប់គ្រងគម្រោងសរុបចំនួន ២៩នាក់។

កិច្ចប្រជុំលើកដំបូងនេះត្រូវបានរៀបចំឡើងក្នុងគោលបំណង ដើម្បីពិនិត្យលើវឌ្ឍនភាព បញ្ហាប្រឈម និងសកម្មភាពកែតម្រូវមួយចំនួនក្នុងយុទ្ធសាស្ត្រអនុវត្តគម្រោងពិភាក្សា និងដោះស្រាយលើបញ្ហាប្រឈមនានា ក៏ដូចជា ពិនិត្យកែសម្រួលលើផែនការសកម្មភាព និងថវិកាសម្រាប់ឆ្នាំ ២០២៤ របស់គម្រោងផងដែរ។

ជាលទ្ធផលនៃកិច្ចប្រជុំ គណៈកម្មការតម្រង់ទិស និងក្រុមការងារសម្រេចបាននូវការព្រមព្រៀងលើចំណុចសំខាន់ៗ ដូចជា ធ្វើការពិនិត្យឡើងវិញលើលទ្ធភាពក្នុងការផ្លាស់ប្តូរ ឬជ្រើសរើសសហគមន៍ និងឃុំគោលដៅថ្មីបន្ថែម និងបញ្ចូលខេត្តកំពង់ឆ្នាំងជាខេត្តគោលដៅ បន្ថែមឱ្យបានចំនួន ៦ ខេត្តនៃតំបន់ជុំវិញបឹងទន្លេសាប  កែសម្រួលផែនការសកម្មភាពមួយចំនួន ដើម្បីឱ្យឆ្លើយតបនឹងក្របខ័ណ្ឌគោលនយោបាយអាទិភាពថ្មីរបស់ក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន ជុំវិញការអភិវឌ្ឍសហគមន៍កសិកម្មទំនើប កិច្ចសហការ និងការបណ្តុះបណ្តាលមន្រ្តីកសិកម្មឃុំ ដែលរដ្ឋាភិបាលបាននិងកំពុងដាក់ពង្រាយនៅតាមឃុំគោលដៅនៃគម្រោង បង្កើនសមត្ថភាពកសិករលើការបន្ស៉ុំាទៅនឹងការប្រែប្រួលអាកាសធាតុ បច្ចេកទេសក្នុងការធ្វើកសិកម្មវៃឆ្លាត ដើម្បីជំរុញការផលិតស្រូវ និងការបន្សុទ្ធពូជស្រូវនានា ពិសេសពូជផ្ការំដួល និងពូជសែនក្រអូប។

កិច្ចប្រជុំនោះ ឯកឧត្តមបណ្ឌិត យ៉ង សាំងកុមារ និង ឯកឧត្តមបណ្ឌិត ងិន ឆាយ បានផ្តល់អនុសាសន៍មួយចំនួន ជាពិសេសលើការស្នើឱ្យពិនិត្យឡើងវិញ ចំពោះផែនការសកម្មភាពរបស់គម្រោង PCRL សម្រាប់ឆ្នាំ ២០២៤ និងកំណត់សកម្មភាពអាទិភាពសំខាន់ៗ ដែលឆ្លើយតបនឹងគោលនយោបាយថ្មីរបស់រាជរដ្ឋាភិបាល ក្នុងការអភិវឌ្ឍន៍ វិស័យកសិកម្ម និងបរិស្ថាន ជាពិសេសទាក់ទងនឹងការអភិវឌ្ឍសហគមន៍កសិកម្មទំនើប ការផលិតស្រូវ (ពូជស្រូវដែលមានការទទួលស្គាល់) និងកិច្ចសហការគាំទ្រដល់មន្រ្តីកសិកម្មឃុំ នៅតាមឃុំគោលដៅរបស់គម្រោង ថែមទៀតផង។

ដោយឡែក ក្រសួងបរិស្ថានផ្តោតសំខាន់លើការងារទាក់ទងនឹងការប្រែប្រួលអាកាសធាតុ   បរិស្ថាន ការអភិវឌ្ឍន៍បៃតង និងជីវភាពសហគមន៍ក្នុងតំបន់ការពារធម្មជាតិ  ការសម្របសម្រួលលើការពន្លឿនលំហូរថវិកាសម្រាប់ អនុវត្តគម្រោង ពន្លឿនក្នុងការជ្រើសរើសបុគ្គលិក ដែលនៅសេសសល់ និងពិនិត្យលើលទ្ធភាពហិរញ្ញវត្ថុសម្រាប់ការទិញសម្ភារៈការិយាល័យបន្ថែម  ពន្លឿនក្នុងការចុះហត្ថលេខាលើកិច្ចព្រមព្រៀង LoAs ជាមួយអង្គការដៃគូអនុវត្តទាំងបី ដើម្បីអនុវត្តសកម្មភាពជាក់លាក់ជាច្រើនរបស់គម្រោងដែលបានកំណត់រួច និងការស្វែងរកប្រភពសហហិរញ្ញប្បទានសំខាន់ៗបន្ថែមទៀត សម្រាប់អនុវត្តគម្រោង PCRL តាមរយៈគម្រោង ដៃគូផ្សេងទៀត៕