ព័ត៌មានផ្សេងៗទៀត
ឯកឧត្តមរដ្ឋលេខាធិការ គង់ ច័ន្ទវាសនា ដឹកនាំក្រុមការងារចុះពិនិត្យខ្សែច្រវាក់ផលិតកម្ម និងផ្តល់ការគាំទ្រដល់ក្រុមហ៊ុនផលិតជីក្នុងស្រុក នៅខេត្តសៀមរាប ខេត្តឧត្ដរមានជ័យ និងខេត្តកំពង់ធំ
ចេញផ្សាយ ១៦ ធ្នូ ២០២៤ 2864
នៅថ្ងៃទី១៤-១៥ ខែធ្នូ ឆ្នាំ២០២៤ ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពីឯកឧត្តម ឡោ រស្មី និងលោកជំទាវ ហ៊ូ សុពណ៌ អនុរដ្ឋលេខាធិការ បានដឹកនាំមន្ត្រីជំនាញនៃអគ្គនាយកដ្ឋានកសិកម្ម និងមន្ទីរកសិកម្ម ចុះពិនិត្យដំណើរការផលិតកម្មជីសរីរាង្គចំនួន ៤ក្រុមហ៊ុន នៅខេត្តសៀមរាប ខេត្តឧត្ដរមានជ័យ និងខេត្តកំពង់ធំ បន្ទាប់ពីបានចុះពិនិត្យទីតាំងផលិតជីសរីរាង្គក្នុងស្រុកចំនួន ៣ក្រុមហ៊ុន នៅខេត្តកំពង់ស្ពឺ កាលពីពេលថ្មីៗកន្លងទៅ។
ជីសរីរាង្គដែលផលិតចេញពីកាកសំណល់ផ្សេងៗក្នុងស្រុក ផ្តល់អត្ថប្រយោជន៍ជាច្រើន ដូចជា ជួយកាត់បន្ថយថ្លៃដើមផលិត និងបង្កេីនប្រាក់ចំណេញរបស់កសិករ ដោយសារមានតម្លៃទាបជាងជីគីមីនាំចូល បង្កើតការងារ រក្សាគុណភាពដី ដោះស្រាយបញ្ហាអនាម័យ និងកាត់បន្ថយផលប៉ះពាល់ផ្នែកបរិស្ថាន។ ក្រសួងកសិកម្ម រុក្ខាប្រមាញ់ និងនេសាទលើកទឹកចិត្តឱ្យបងប្អូនប្រជាកសិករបង្កើនការប្រើប្រាស់ជីសរីរាង្គ ដោយកាត់បន្ថយការប្រេីប្រាស់ និងការពឹងផ្អែកទាំងស្រុងលេីជីគីមីនាំចូលពីបរទេស ហើយក្រសួងនឹងផ្តល់ការគាំទ្រចាំបាច់បន្ថែមដល់ក្រុមហ៊ុនផលិតជីសរីរាង្គក្នុងស្រុក ដេីម្បីបង្កេីនសមត្ថភាពផលិត ស្របតាមតម្រូវការទីផ្សារ និងប្រជាកសិករ។
អ្វីដែលពិសេសនោះគឺថា ក្រុមហ៊ុន Husk Ventures ដែលជាក្រុមហ៊ុនវិនិយោគបរទេស នៅខេត្តកំពង់ធំ បាននាំចេញដោយជោគជ័យនូវផលិតផលជីសរីរាង្គចំនួន ៣០០តោន ទៅកាន់ប្រទេសវៀតណាម ក្នុងឆ្នាំ២០២៤នេះ និងគ្រោងបង្កេីនការនាំចេញដល់ ២០០០តោន នៅឆ្នាំ២០២៥ខាងមុខ។ ក្រុមហ៊ុនក៏មានផែនការពង្រីកទីផ្សារក្នុងស្រុក និងក្រៅស្រុកបន្ថែមទៀតផងដែរ ស្របពេលដែលក្រុមហ៊ុនបានទិញឧបករណ៍ថ្មី និងគ្រោងផលិតជីសរីរាង្គឱ្យបាន ១០ ០០០តោន ក្នុងឆ្នាំ២០២៥។ ជាងនេះទៀត ក្រុមហ៊ុនបានប្រេីប្រាស់បច្ចេកវិទ្យាដែលជួយក្រុមហ៊ុនឱ្យលក់កាបោន ដែលកេីតចេញពីការផលិតជីសរីរាង្គនេះ នៅលេីទីផ្សារអន្តរជាតិបានទៀតផង។
តំណាងក្រុមហ៊ុនផលិតជីក្នុងស្រុកទាំង៤ រីករាយស្វាគមន៍ និងបានថ្លែងអំណរគុណដល់ក្រួងកសិកម្ម រុក្ខាប្រមាញ់ និងនេសាទ សម្រាប់ការយកចិត្តទុកដាក់ និងការគាំទ្រ ព្រមទាំងប្តេជ្ញាបន្តផលិតជីសរីរាង្គប្រកបដោយគុណភាព ដេីម្បីលក់ជូនប្រជាកសិករក្នុងតម្លៃសមរម្យ ជាពិសេស ដល់សហគមន៍កសិកម្មទំនេីបដែលក្រសួងបាននិងកំពុងជំរុញអនុវត្ត។ ជាមួយគ្នានេះ ក្រុមហ៊ុនបានស្នើសុំឱ្យក្រសួងជួយបង្កេីនការផ្សព្វផ្សាយអំពីសារសំខាន់នៃជីសរីរាង្គទៅដល់កសិករឱ្យកាន់តែទូលំទូលាយថែមទៀត៕
